MATHAI

MATHAI 1

Jisu achaimani bosong

(Luk 3.23-38)

1Omo Jisu Khristo achaimani bosong, bo wng kha Daud bosongni, Daud wng kha Abraham bosongni.

2Abraham wng kha Isakni bupha; Isak Jakobni; Jakob Juda tei bini takhuksongni; 3Juda khe Peres bai Serani bupha, Tamar khe bórokni buma; Peres khe Hesronni bupha; Hesron khe Ramni; 4Ram Aminadabni; Aminadab Nasonni Nason khe Salmonni bupha; 5Salmon khe Boasni bupha; Rahab khe bini buma; Boas Obedni bupha, Rut bini buma; Obed khe Jisaini bupha; 6Jisai khe habugra Daudni bupha.

Daud wng kha Solomonni bupha (bini buma swkango Uriani bihik); 7Solomon Rehoboamni; Rehoboam Abiani; Abia Asani; 8Asa Jihosapatni; Jihosapat Joramni; Joram Ujiani; 9Ujia Jothamni; Jotham Ahasni; Ahas Hiskiani; 10Hiskia Manaseni; Manase Amonni; Amon Josiani; 11Josia Jikonia bai bini takhuksongni bupha, Israilrok Babilono tlangjak phuru bórok tongo.2Ha 24.14-15; 2Bo 36.10; Jir 27.20. 12Israilrok Babilono tlangjakmani ulo: Jikonia wng kha Sialtialni bupha; Sialtial Serubabelni; 13Serubabel Abiudni; Abiud Eliakimni; Eliakim Asorni; 14Asor Sadokni; Sadok Akhimni; Akhim Eliudni; 15Eliud Eliasarni; Eliasar Mathanni; Mathan Jakobni; 16Jakob Josepni; Josep wng kha Mariamni bwsai, Mariamni ogo’-no Masia hwnjaknai Jisu achai-o.

17Omo tẃi khe Abrahamni simi Daud jora piri chibrwi ká-o, Daudni simi Israilrok Babilono tlangjakma jora piri chibrwi ká-o; phiya Masia achaima jora piri chibrwi

ká-o.

Jisu Khristo achaimani

(Luk 2.1-7)

18Jisu Khristo achaimani kók khe ahai: Bini buma Mariam bai Josepni kók sẃngjak, hai phano bórok káijak ya sini’-no Phola Kwthar bai bo sakderiya wngmani sijak kha.Luk 1.27. 19Bo bai kók sẃngjaknai Josep wng kha borok kaham, bo lukuni bwskango Mariamni mwkhang sókna muchungjak ya, hakhe tepsa khe kók seplena hwnwi bwkha chap kha. 20Bo omo hai uansugui tong phuru Subraini suari khoroksa imango nukjagwi hai hwnwi sa phai kha, “Daudni bosong Josep, Mariamno nini hik khlainani ta kiri di, bo Phola Kwthar bai se sakderiya wngo. 21Bo bwsa chwla khoroksa bánai, hakhe nwng bono Jisu hwnwi mung phar di, tamni hwn khe bo bini bororokno bórokni sumsokni yakni phiyóknai.”Luk 1.31.

22Subraini a diyarini khúk tẃi hai hwnwi samani abo nang phaina bagwi omorok bebak’-no wngo, 23“Nai di, bwrwi sikla-kwthar khoroksa sakderiya wngwi bwsa chwla khoroksa bá anw, hakhe bo Imanuel hwnjaknai” (abo “Kaitor chwng bai baksa tongo” hwnmani se.)Jis 7.14. 24Hakhe Josep thumani bachaui Subraini suari sama tẃi’-no khlai kha, bo Mariamno káijak kha, 25tamo khe bo bini puilani bwsa chwlano bá ya sak bini sak tang li ya. Hakhe Josep bono Jisu hwnwi mung phar kha.

----------------------------------------------------------------------------------------------------------

MATHAI 2

Salkabaini phainairok

1Herod habugra wngwi tong phuru Judia hani Betlehem tauno Jisu achai-o. Bo achai kheno salkabaini khoroknwi-khoroktham athukiri naiwi lekhanairok Jerusalemo phaiwi 2hai hwnwi sẃng phai kha, “Judairokni bugra wngna hwnwi achainai a chwrai buro wng kha? Chwng salkabai-o bini athukiri kama nuk kha, hakhe chwng bono khulumna phai-o.” 3O kókno khna kheno habugra Herod uanajak kha, Jerusalemni joto borokbo uanajak kha. 4Bo ochai okrarok bai Kerong phrwngnairok bebakno kwrẃngsa khe ringwi “Masia buro achaino?” hwnwi sẃng kha. 5Hakhe “Judiani Betlehem tauno” hwnwi bórok sa kha. “Tamni hwn ba diyari hai hwnwi swi lang kha:

6“ ‘O ha Judani Betlehem,

nwng ha Judani tei bokhorokrokni slái kisa phano kechen ya;

nini bising tẃi bokhorok khoroksa phai anw,

bo ani borok Israilrokno

chabwi tẃi anw.’ ”Mik 5.2.

7Herod salkabaini phainairokno tepsa khe ringwi a athukiri buphuru nukjak kha abono sẃngwi narwk kha. 8Hakhe bo bórokno hai hwnwi saui Betlehemo rohor kha, “Tháng di, a chwraino kaham khe rutuk di. Norok bono nuk khe anobo sa phai di, hakhe angbo thángwi bono khulumui anw.”

9O kókno khnaui bórok tháng kha. Lama-o bórok salkabai-o nukmani a athukirino nuk phi kha; abo a chwrai tong thani-o bathagwi ya sak bórokni swkang swkang wngwi tong kha. 10A athukirino nugwi bórok bwswk se bwkha srang kha, bwswk se tongthok kha! 11Bórok nok bisingo habwi a chwraino bini buma Mariam bai nuk kha. Bórok yáskú sungwi bono khulum kha, hakhe bórokni bokcha khengwi bono rangchak, satrai motom tei mur belengtwi hili rw kha. 12Kaitor bórokno imango “Herodni aro kiphilwi ta tháng di,” hwnwi sa kha, hakhe bórok kubun lama tẃi bórokni ha-o kiphilwi tháng kha.

Josep bai Mariam Jisuno tẃi Ijibo khármani

13Bórok tháng bai khe imango Subraini suari khoroksa Josepno nukjagwi hai hwnwi sa kha, “Bacha di, chwrai bai bumano tẃiwi Ijibo khár di, ang kutul di hwn ya sak nwng aro tong di. Herod o chwraino butharna hwnwi rutuknai.” 14Hakhe Josep bachaui chwrai bai bumano tẃi horni bisingo’-no Ijibo lam rw kha. 15Herod thwi ya sak bo aro tong kha.Hos 11.1.

“Ang ani Sajlano Ijipni ring kha,” hwnwi Subrai bini diyarini khúk tẃi samani abo nang phaina bagwi se omo wngo.

Chwrairokno butharmani

16A salkabaini phainairok bono bandiui klang kha hwnwi saui man kheno Herod belai khe jolijak kha. A phainairok bai sajakma hai’-no a athukiri nukjakmani mol romwi bo Betlehemni tei gana-ginini bisiknwi tei bisiknwi pung ya bebak chwla bwsarokno buthar di hwnwi dagi kha. 17Omo tẃi kheno Jirimia diyari ahai hwnwi samani a kók nang phai kha:

18“Rama-o khorang khna kha,

chiri-mokorok bai kap lai-

kok lai khna kha.

Rahel bwsarokni bagwi kabo,

bo kap sini kabwi asi yókjak ya,

bórok bebak’-no thwi bai

kha ba.”Jir 31.15.

Josep bai Mariam Jisuno tẃiwi Ijipni kiphilmani

19Herod thwi bai khe Ijibo Subraini suari khoroksa Josepno imango nukjak phai kha, 20hakhe ahai hwnwi sa kha, “Bacha di, chwrai bai bumano tẃi ha Israilo kiphilwi tháng di; o chwraino butharna nainairok thwi bai kha.” 21Hakhe Josep bachaui chwrai bai bumano tẃi ha Israilo kiphilwi tháng kha. 22Arkhelano bupha Herodni yakchu-o ha Judiani bugra wngwi tongo hwnwi khnaui Josep aro thángwi tongwinani kirijak kha. Bo imango teibo sajakma bai Galili amchoi-o tháng kha, 23hakhe Nasaret hwnwi taun khungsa-o tongwi kha. “Bo Nasaretsa hwnjaknai,” hwnwi diyarirok samani abo nang phaina bagwi se omo wngo.

MATHAI 3

Baptisma rwnai Johon pírmani

(Mar 1.1-8; Luk 3.1-18; Joh 1.19-28)

1Aphuru baptisma rwnai Johon Judia hasing panthoro phaiwi 2“Sumsok yakar di, Kaitorni ha sampha kha!” hwnwi pír phai kha.Mat 4.17; Mar 1.15. 3Johon wng kha Jisaia diyari ahai hwnwi sa langmani a borok se,Jis 40.3.

“Hasing panthoro khoroksa

hai hwnwi chirikhókjak:

‘Subraini bagwi lahar snam di;

bo himnani lamano kepleng

khe ton di!’ ”

4Johonni rí mangingang buikhumuni takjak; bo bukur bai bwchang kha-o, kúkthora bai bolongni piya modu se bo chá-o.2Ha 1.8. 5Jerusalemni bororok bini thani phai kha, Judia angkor gwnangwi tei Jordan twimani gana-ginini ha gwnangwini bororok bini thani phai kha. 6Bórok sak sakni sumsokno gosi kha, hakhe bo bórokno Jordan twima-o baptisma rw kha. 7Johon kwbángma Pharisai tei Sadukairokno bini thani baptisma wngna phaima nuk khe bo bórokno hai hwnwi sa kha, “Chibukni bosongrok, Kaitor yagul suna naiwi tongmani yakni khárwi yók di hwnwi sabo norokno uansuk rw lang?Mat 12.34; 23.33. 8Norok sumsok yakar kha hwnwi sijakna tẃi khe tong di. 9‘Abrahamno chini apha,’ hwnwi saui norok yók anw abo khá ta ka di. Ang norokno o kók sa-o, Kaitor o holongroknibo Abrahamni bwsa tikhlai mano.Joh 8.33. 10Buphang yaphango rua harjak; bwthái kaham thái ya buphangno tanwi hóro khiklai sókjaknai.Mat 7.19. 11Norok sumsok yakar kha hwnwi ang norokno twi bai baptisma rw-o; tamo khe ani slái ulo phainai bo le norokno Phola Kwthar tei hór bai se baptisma rwnai. Bo ani slái kwplai kuk; ang bini yaklap tẃinani suda se chúk ya. 12Khamparni bebak gomno chokna bagwi baling bini yago’-no tongo; bo gomno thumwi gula-o da bainai, gundakno khe thwi phlai ya hóro sógwi khibi bainai.”

Jisu baptisma wngmani

(Mar 1.9-11; Luk 3.21-22)

13Aphuru Jisu Galilini Jordano tháng kha, hakhe baptisma wngna hwnwi Johonni thani phai kha. 14Johon bono kiphil rwna nai kha. “Ang se nwng bai baptisma wngthai bla! Ahai twtwi bahai khe nwng ani thani phai?” hwnwi bo sa kha. 15Phiya Jisu bono hai hwnwi sa kha “Tabuk omo wng gra si thung, tamni hwn khe Kaitor naima tẃi’-no chwng omo hai kheno ma khlainai.”

Hakhe Johon soi kha 16Jisu baptisma wng bai kheno twini kasa kha. Aphuru bini bagwi nokha phiyokjak kha, hakhe bo Kaitorni Pholano pharuk hai khe birkhlai bini sago bá phaima nuk kha. 17Aphuru chuknohani hai hwnwi sakhlaijak kha, “Omono ani khájani Sajla, ang bono’-no belai khe hamjago.”

MATHAI 3

Baptisma rwnai Johon pírmani

(Mar 1.1-8; Luk 3.1-18; Joh 1.19-28)

“Hasing panthoro khoroksa

hai hwnwi chirikhókjak:

‘Subraini bagwi lahar snam di;

bo himnani lamano kepleng

khe ton di!’ ”

Jisu baptisma wngmani

(Mar 1.9-11; Luk 3.21-22)

------------------------------------------------------------------------------------------------------

MATHAI 5

Hathái-o kasaui Jisu phrwngmani

1Jisu borok kwbángma nugwi hathái-o kasa kha, bo aro achuk kha. Bini sagrirok bono chorsa khe kuthum kha, 2hakhe bo phrwngna chengsa kha.

Lama Kaham

(Luk 6.20-23)

3“Kaitorni thani koiwi tongnairok

bórok hamchajak;

Kaitorni ha bórokni’-no!

4“Khá khamnairok bórok hamchajak;

Kaitor bórokno khá kwchang rwnai!Jis 61.2.

5“Khá sutrangrok bórok hamchajak;

Kaitor rwna hwnmano bórok mannai!Lob 37.11.

6“Kaitor naima tẃi simi tongna nainairok,

bórok hamchajak;

Kaitor bórokno khá kochom rw suknai!Jis 55.1-2.

7“Buino maya chánairok bórok hamchajak;

Kaitorbo bórokno maya chánai!

8“Khá kuphurrok bórok hamchajak;

bórok Kaitorno nuknai!Lob 24.3-4.

9“Buino kwtha rwnairok bórok hamchajak;

Kaitor bórokno bini bwsarok hwnnai!

10“Kaitor naima tẃi tongwi sátokjaknairok bórok hamchajak;

Kaitorni ha bórokni’-no!1Pi 3.14.

11“Norok ani borok wngma bai bui norokno lachi rw khe, norokno sátok khe, norokno tatal khe kók hamya sa khe norok hamchajak.1Pi 4.14. 12Khá srang di, tongthok di, tamni hwn khe chuknoha-o norokni bagwi sokat kwbángma khatijak tongo. Norokni slái swkang tongnai diyariroknobo bororok omo tẃi kheno sátok kha.”2Bo 36.16; Sam 7.52.

Sóm bai chati

(Mar 9.50; Luk 14.34-35)

13“Norok khe swngcharni sóm. Phiya ba sóm pab ya wngwi tháng khe abono pab rw phinani tei lama kwrwi. Abo mungsa samungo phano chúk ya, aboni bagwi khibiui rwjago, hakhe bororokbo kádulwi thángo.Mar 9.50; Luk 14.34-35.

14“Norok khe swngcharni chati. Hathái sakani tauno huiwi tonwi man ya.Joh 8.12; 9.5. 15Khoroksa phano twk bai thuklubwi tonna hwnwi chati phnang ya; tamo khe thopna saka’-ono tono, hakhe nokni bebak bororok pohor nugo.Mar 4.21; Luk 8.16; 11.33. 16Omo tẃi kheno bororokni thani norokni chati ma chẃng thai, hakhe norok samung kaham khlaimano nugwi bórok chuknoha-o norokni Phano ma lob anw.”1Pi 2.12.

Kerongni kókno tẃiwi phrwngmani

17“Ang Musini kerong bai diyarirok phrwngmarokno swkwmana phai-o hwnwi khá ta ka di. Ang swkwmana phai ya, a phrwngmarokno samungo phnangna se phai-o. 18O kókno muitu narwk di, ha bai nokha tong sak Kerongni kók tháisa láisa phano kwmaui tháng glak; bebak páisuk ya sak’-no tong anw.Luk 16.17. 19Hakhe Kerongni kók kisa phano rákhok yaui buinobo abo hai’-no tongna phrwngnai borok bo Kaitorni ha-o jotoni slái kotoi wngnai. Phiya ba Kerong rákhogwi buinobo abo hai’-no tongna phrwngnai borok bo Kaitorni ha-o kotor wngnai. 20Ang norokno o kók sa-o, Kerong phrwngnairok bai Pharisairokni slái kaham khe Kaitor naima tẃi tong khe simi se norok Kaitorni ha-o habwi man anw.”

Jolimani kókno tẃiwi phrwngmani

21“Norok agini bororokno ‘Borok ta buthar di; borok butharnai bo buj thumjak anw,’ hwnwi sajakmani o kókno khna kha.Lam 20.13; Uái 5.17. 22Phiya ba ang norokno o kók sa-o: Takhukno jolijaknai borok bo buj thumjak anw; takhukno ‘Natha’ hwnnai borok bo Kaunsil bwskango tubujak anw; phiya takhukno ‘Bepotar’ hwnnai borok bo morkeni hóro khiklaijakna bagwi birman nang anw. 23Aboni bagwi nwng Kaitorni háyá-o barokna phuru nini bebailo nini takhukni kók tongo hwnwi muitu man khe. 24A barokmano háyá-ono klangwi nini takhuk bai kwthaui gra di; hakhe kiphilwi phaiwi Kaitorno barok phai di.

25“Khoroksa swk phano nini mungwi kuto kes phnang khe kuto tháng ya sini’-no bo bai kwthaui pái di; kuto tháng khe bo nono jojni yago yapharnai, joj pulisni yago nono yapharnai, hakhe nwng alongo chopjaknai. 26Ang nono o kók sa-o, lepsa kwrwi tẃi jurbanda rw bai ya sak nwng aro ma tongnai.”

Lupchani kók

27“ ‘Buitali-buitala ta wng di,’ hwnwi sajakmani o kókno norok khna kha.Lam 20.14; Uái 5.18. 28Phiya ba ang norokno o kók sa-o, bwrwi khoroksano phano nugwi sak tangna muchungnai borok bo khá bising bising lupcha wngma klai-o. 29Aboni bagwi nini yagrani mokol nono sumsogo khiklai khe abono ekhregwi khibi di. Nini bebak bwsak morke-o khiklaijakmani slái bwsakni mungsaswk kwmama phano ham kugo.Mat 18.9; Mar 9.47. 30Nini yagra yak nono sumsogo khiklai khe abono tansu-ui khibi di. Nini bebak bwsak morke-o khiklaijakmani slái bwsakni mungsaswk kwmama phano ham kugo.”Mat 18.8; Mar 9.43.

Kak laimani kók

(Mat 19.9; Mar 10.11-12; Luk 16.18)

31“ ‘Khoroksa swk bini bihikno kak khe kaksen swiwi ma rwnai,’ hwnwi sajakmani o kókbo tongo.Uái 24.1-4; Mat 19.7; Mar 10.4. 32Phiya ba ang norokno o kók sa-o, buitali wng ya phano khoroksa swk hikno kak khe, phiya a bwrwi tei khoroksano káijak khe, hakhe a chwla a bwrwino buitali khlaima klai-o; phiya a kakjak bwrwino nanai borok bo’-bo lupcha.”Mat 19.9; Mar 10.11-12; Luk 16.18; 1Ko 7.10-11.

Swmai tangmani kók

33“ ‘Nwng swmai ta swbai di, tamo khe Kaitorni thani swmai tangma hai’-no khlai di,’ hwnwi agini bororok sajakmani o kókno norok khna kha.Leb 19.12; Lek 30.2; Uái 23.21. 34Phiya ba ang norokno o kók sa-o, norok kók rw phuru swmai ta tang di; chuknohani mungwi ta tang di, abo Kaitorni achukthai;Jak 5.12; Jis 66.1; Mat 23.22. 35hano romwi buya, abo bini yakung boksajaknai; Jerusalemni mungwi buya, abo bugra kotorni taun.Jis 66.1; Lob 48.2. 36Nini khorokno romwibo swmai ta tang di, tamni hwn khe bwkhnai twngsano phano nwng kuphurbo khlai man ya, kosombo khlai man ya. 37‘I’n’ khe ‘I’n’ hwn di, ‘I’nhi’ khe ‘I’nhi’ hwn di, aboni slái bára wng khe abo Soitanni aroni ongkhorma se.”

Yagul su lai phimani kók

(Luk 6.29-30)

38“ ‘Mokolni bodla mokol, buani bodla bua,’ hwnwi sajakmani o kókno norok khna kha.Lam 21.24; Leb 24.20; Uái 19.21. 39Phiya ba ang norokno o kók sa-o, nini hamya khlainai borokno yagul ta su phi di. Khoroksa swk nono yagra khangaro thapra rw khe yaksi khangarno chagwi rw phi di. 40Khoroksa swk nini kamchlwini bagwi kes phnang khe nini dulainobo bono ahai’-no rwui rw di. 41Khoroksa swk nono bini poja juraboli khe mail kaisa tẃi di hwn khe tei mail kaisa ahai’-no tẃi di. 42Khoroksa swk nini thani mungsa swk san khe bono abono rw di; khoroksa swk solok nai khe bono abono rw di.”

Kena arirokno hamjak di

(Luk 6.27-28,32-36)

43“ ‘Nini nok-arini bororokno hamjak di, tei kena arirokno naisler di,’ hwnwi sajakmani o kókno norok khna kha.Leb 19.18. 44Phiya ba ang norokno o kók sa-o, norokni kena arirokno hamjak di, norokno swrainairokno hamari rw di, norokno naislernairokni kaham khlai di, norokni hamya khlainairokni bagwi tei sátoknairokni bagwi suri san di; 45hakhe norok chuknohani norokni Phani sajla wngnai, tamni hwn khe bo bini satungno borok kahamnobo rw-o, borok hamyanobo rw-o; phiya kaham khlainainobo uatwi rw-o, hamya khlainainobo rw-o. 46Norokno hamjaknairokno simi norok hamjak khe Kaitor tamo wngwi norokno sokat rwnai. Teks romnairokbo abo tẃi hamjak lai bla! 47Norokni bororok bai simi kók sa lai khe buini slái kwbáng tamo khlaima klai? Tei buirokbo abo tẃi ba sa lai bla! 48Chuknohani norokni Pha kaham wng tẃi norokbo katswi bo hai’-no kaham wng di.”

--------------------------------------------------------------------------------------------------------

MATHAI 6

Samung kahamni kók

1“Hus wng di, bui nukna tẃi norok lukuni bwskango samung kaham ta khlai di. Norok abo hai khlai khe chuknohani norokni Phani aroni mungsa phano sokat man glak.Mat 23.5.

2“Aboni bagwi phatrarok thumnokrogo tei lamarogo khlai tẃi kwrwirokno rw phuru nwng kham ta bu di. Bororok bórokno kaham hwn anw hwnwi se bórok abo khlai-o. O kókno muitu narwk di, bórok sokat manẃi pái kha. 3Tamo khe nwng kwrwino rw phuru nini yagra yak tamo khlai nini yaksi yak suda saui ta man rw di, 4hakhe omo tepsa khe khlaijaknai se. Hakhe nwng tepsa khe khlaimano nuknai Nwpha nono sokat rwnai.”

Suri sannani kók

(Luk 11.2-4)

5“Nwng suri san phuru khe phatrarok hai ta wng di. Bui nuk thung hwnwi bórok thumnokrogo tei lama buprarogo bachaui suri sanna hamjago. O kókno muitu narwk di, bórok sokat manẃi pái kha.Luk 18.10-14. 6Nwng suri san phuru khe nini nok bisingo habwi dugar soui nukjak ya Nwphani thani suri san di. Hakhe nwng tepsa khe khlaimano nuknai Nwpha nono sokat rwnai.

7“Norok suri san phuru bui sa tẃi kók nang ya kwbángma ta sa di. Bórok tángma tángsa suri sanma bai Kaitor khna anw hwnwi bórok khá ka-o. 8Bórok hai ta wng di; norok san ya sini’-no norokni tamo nang nang ya abo norokni Pha saui mano. 9Aboni bagwi norok omo tẃi khe suri san di:

Chuknohani o chini Apha,

nini mung kwthar surijak

thung;

10nini ha phai thung;

nini muchung tẃi

chuknoha-o wngma hai

o ha-obo ahai’-no wng thung.

11Tinini nangmani chámung

chwngno rw di.

12Bui chini hamya khlaimano

chwng nakar tẃi

nwngbo chwng hamya

khlaimano nakar di.

13Chwngno belai khe ta amjok di,

phiya Hamyani yakni kati rw di.

[Tei tamni hwn khe ha phankrak tei chẃngsacha mol brúm brúm bebak nini máng se. Amen.]

14“Bui norokni hamya khlaimano norok nakar khe chuknohani norokni Phabo norokno nakarnai. 15Phiya bui hamya khlaimani norok nakar ya khe chuknohani norokni Phabo norok hamya khlaimano nakar glak.”Mar 11.25-26.

Ubasni kók

16“Norok ubas tong phuru phatrarok tong tẃi mwkhang mokjak khe ta tong di. Bórok ubas tongo hwnwi bui saui manna tẃi khe bórok mwkhang kosom khe tongo. O kókno muitu narwk di, bórok sokat manẃi pái kha. 17Nwng ubas tong phuru mwkhang sú di, bwkhnai-o thok phul di; 18hakhe nwng ubas tongo hwnwi bui saui man glak; nukjak ya Nwpha simi saui man anw. Hakhe nwng tepsa khe khlaimano nuknai Nwpha nono sokat rwnai.”

Chuknoha-o se khati hor di

(Luk 12.33-34)

19“Norok o swngcharo rang-rí ta khati di, oro kurumabo khunti-o, sorbo khi-o, sikhokbo habwi khogo.Jak 5.2-3. 20Aboni slái chuknoha-o se rang-rí khati di, aro kurumabo khunti ya, sorbo khi ya, sikhokbo habwi khogwi man ya. 21Tamni hwn khe rang-rí tong thani’-no norokni bwkhabo tongo.”

Bwsakni chati

(Luk 11.34-36)

22“Mokol wng kha bwsakni chati. Nini naisikma kepleng khe bwsak gwnangwi chẃngnai; 23phiya nini naisikma bejua khe bwsak mwnaknai. Aboni bagwino nini bisingni pohor chẃng ya khe abo bwswk kirimasingcha khe mwnak no!”

Kaitorni thani khá bera di

(Luk 16.13; 12.22-31)

24“Khoroksa phano nokphang khoroknwini seleng wngwi man ya; bo khoroksano naisler khe tei khoroksano hamjaknai, eba khe khoroksano khá súk khe tei khoroksano samung nangjak glak. Nwng Kaitorni seleng twtwi rang-ríni seleng wngwi man ya.

25“Aboni bagwino ang norokno o kók sa-o, tamono cháui nungwi thangnai hwnwi ta uana di, phiya tamono kannai, tamono chumnai hwnwibo ta uana di. Chámungni slái langma tor kuk ya diba? Phiya rí-chumni slái bwsak tor kuk ya diba? 26Nokhani toksa-toktẃirokno nahar di: bórok maibo sar ya, rabo ra ya, mayamobo da ya; chuknohani norokni Pha bórokno naiwi tongo. Norok toksa-toktẃirokni slái tor kuk ya diba? 27Norokni bere sabo uansugui ayukni bára tei salsa swk thangwi mannai tong?

28“Rí-chumni bagwi tamni uana? Khumrok bahai khe tor lok nahar di: bórok samungbo tang ya, ríbo tak ya. 29Hai phano ang norokno o kók sa-o, Solomon jolma jolsa gwnang phano omorokni barsani slái se aswk naithogwi man lang ya.1Ha 10.4-7; 2Bo 9.3-6. 30Charani jabra-tini tong khe khwna kwrwi, thapa-o sókjaknai; abono se Kaitor aswk naithok rwui ton khe bo norokno naithok rw glak diba? Norok bwswk se poito kisa gwja! 31Aboni bagwino tamono chánai, tamono nungnai, tamono kannai-chumnai, abono ta uana di. 32(Poito kwrwirok’-no omorokno manna nai-o.) Omorok bebak norokni samung nango hwnwi chuknohani norokni Pha saui mano. 33Tamo khe nwng Kaitorni hani bagwi se uansuk gra di, bo naima tẃino tongna bagwi se uansuk gra di; hakhe bo norokno aswk manwirokno rw anw. 34Aboni bagwino khwnani bagwi ta uana di, khwnani khwna uansukjak anw. Tini tangmani tinini wngo.”

--------------------------------------------------------------------------------------------------------

MATHAI 7

Buino majra ta ber di

(Luk 6.37-38,41-42)

1“Kaitor norokno majra ber ya tẃi khe norok buino majra ta ber di, 2tamni hwn khe norok buino majra ber tẃi’-no Kaitorbo norokno majra bernai. Norok buino khlai tẃi’-no Kaitorbo norokno abo hai khlainai.Mar 4.24. 3Hakhe tamni nini takhukni mokolo buphang biphiring tongma simi nwng nuk? Nini mokolni buphang bokocho le tamni nuk ya sla? 4Nini mokolo buphang bokocho tongtwtẃi nwng bahai khe nini takhukno ‘Phai di, nini mokolni buphang biphiring tikhlai grana,’ hwnwi sa rak de? 5O phatra, nini mokolni buphang bokocho tikhlai gra di, hakhe nini takhukni mokolni buphang biphiring kaham khe nuk anw; aphuru nwng tikhlai man anw.

6“Sẃirokno manwi kwtharno ta rw di; rw khe bórok kiphilwi se norokno riphrik phir anw; norokni muktanobo uakrokni bwskango ta rw di; rw khe bórok abórokno ká simi se kádul anw.”

San di, naituk di, dugar bu di

(Luk 11.9-13)

7“San di, hakhe norok mannai; naituk di, hakhe norok nuknai; dugar bu di, hakhe norok phiyogwi rwjaknai. 8Tamni hwn khe sannai borok bo mano, naituknai borok bo nugo, dugar bunai borok bo phiyogwi rwjago. 9Bwsla ruti san khe holongsiki rwnai abo tẃi bupha norokni bisingo sabo tong? 10Eba khe á san khe chibuk rwnai sabo tong? 11Norok aswk hamya twtwi se norokni bwsarokno manwi kahamno rwna siui tongo. Hakhe chuknohani norokni Phani thani sannairokno bo manwi kaham rwnai o kók bwswk se kubui!

12“Norok bui bai khlaijakna muchung tẃi norokbo buino khlai di: o kók khe Musini Kerong bai diyarirok phrwngma kók se.”Luk 6.31.

Dugar kesep

(Luk 13.24)

13“Dugar kesep tẃi hap di, tamni hwn khe morke lamani dugar wng kha kuar, lamabo kotor, hakhe borok kwbángma’-no abo tẃi himo. 14Thangnani lamani dugar wng kha kesep, lamabo kutuk, hakhe kisa bororok’-no abono saui mano.

Bwthái bai’-no buphang sinijago

(Luk 6.43-44)

15“Diyari phatrarok bai hus khe tong di; bórok saka saka mera hai khe norokni thani phai-o, phiya khá bisingo le bórok thamchi kutung geguma hai se. 16Bórokni samung bai’-no norok bórokno sini anw. Busulwngo angur thái ya, raisoklwngobo khwichang thái ya. 17Buphang kaham bwthái kaham thái-o, buphang hamyabo bwthái hamya thái-o. 18Buphang kaham khe bwthái hamya thái man ya; buphang hamyabo bwthái kaham thái man ya. 19Bwthái kaham thái ya buphang khe tanwi hóro khiklai sókjago.Mat 3.10; Luk 3.9. 20Hakhe aboni bagwino norokbo diyari phatrarokno bórokni samung bai’-no sini anw.”Mat 12.33.

Ang norokno si se sini ya

(Luk 13.25-27)

21“Ano ‘Subrai, Subrai!’ hwnnairok bórok bebak’-no Kaitorni ha-o habwi man glak, tamo khe chuknohani Aphani muchung tẃi tongnairok simi se habwi man anw. 22A Salo borok kwbángma’-no ano hai hwnwi hwn anw, ‘Subrai, Subrai! Nini mungwi chwng Kaitorni kók sa kha, nini mung bai chwng mwtai hamya kwbángmano rwkhlai kha, nini mung bai uanamasingcha samung kwbángma’-no khlai kha!’ 23Ang aphuru khe bórokno hai hwnwi sa anw, ‘Ang norokno si se sini ya. Ani oroni tháng di chengtarok!’ ”Lob 6.8.

Nok tangnai khoroknwirok

(Luk 6.47-49)

24“Hakhe tabuk, ani o kókrok khnaui abo hai’-no tongnai borok bo holongdap saka nok tangnai siyan kwrwng borok hai. 25Uatwi lukhlai kha, twisarokbo lom bai kha, nokbar kotorbo phai kha, hai phano a nok bái li ya, abo holongdap saka tangjak.

26“Phiya ani o kókrok khnaui abo hai tong ya borok bo hasingcha saka nok tangnai siyan kwrwi borok hai. 27Uatwi lukhlai kha, twisarokbo lom bai kha, nokbar kotorbo phai kha, hakhe a nok báiwi tháng kha. A nok báimani bwswk bwkha korom rere.”

Jisu suar gwnang khe phrwngo

28Jisu omorokno sa bai khe lukurok bo phrwngmano uanajak kha. 29Bo bórokni Kerong phrwngnairok hai phrwng ya, suar gwnang khe se phrwngo.

-------------------------------------------------------------------------------------------------------

MATHAI 8

Biyadi chájakno Jisu ham rwmani

(Mar 1.40-45; Luk 5.12-16)

1Jisu hatháini ongkhorwi phai khe luku kwbángma bono rwkthar kha. 2Aphuru biyadi chájak khoroksa bini thani phaiwi yáskú sungwi hai hwnwi sa kha, “Hodasa, nwng ano ham rwna khe ham rwui mano.”

3Jisu yak phologwi bono tangwi “Ham di, ang nai-o,” hwnwi sa kha. Hai kheno doropsa bini biyadi ham kha. 4Jisu bono hai hwnwi sa kha, “Khna di, o kókno kebono ta sa di. Tháng di, ochaino thángwi phunugui di. Nwng tabuk ham kha hwnwi lukuno phunukna bagwi Musi rathar di hwnwi dagima hai’-no ratharwi di.”Leb 14.1-32.

Rumni sengkrak okrani selengno Jisu ham rwmani

(Luk 7.1-10)

5Jisu Kapharnaumo hap khe Rumni sengkrak okra khoroksa bo bai malaiwi bono hai hwnwi koiwi kha. 6“Hodasa, ani seleng nogo hamya klaijak, kisa phano bachaui man ya belai khe klai tong kha.”

7“Ang thángwi bono ham rwui anw,” hwnwi Jisu sa kha.

8Sengkrak okra hai hwnwi sa kha, “I’nhi, hodasa, ani nogo nono kasa rwna ang chúk ya. Nwng hwn khe’-no ani seleng ham anw. 9Angbo bokhorok khoroksani yago, ani yagobo sengkrakrok tongo. Ang khoroksano ‘Tháng di!’ hwn khe bo thángo, tei khoroksano ‘Phai di!’ hwn khe bo phai-o, ani selengnobo ‘Omono khlai di!’ hwn khe bo abono khlai-o.”

10O kók khnaui Jisu uanajak kha, bono rwktharnairokno bo hai hwnwi sa kha, “Norokno ang o kók sa-o, Israilrokni bisingo phano bo hai poito gwnang borok ang nuk ya kho. 11Ang norokno o kók sa-o, borok kwbángma salkabaini salthángbaini phaiwi Kaitorni ha-o Abraham, Isak tei Jakob bai baksa achugwi chá lai anw;Luk 13.2. 12a ha-o tongna hwnnairok khe phatarni mwnakma-o khiklai rwjak anw, bórok aro ua hului ma kap anw.”Mat 22.13; 25.30; Luk 13.28. 13Hakhe Jisu sengkrak okrano hai hwnwi sa kha, “Nogo tháng di, nwng poito khlai tẃi’-no nini bagwi khlaijak anw.”

Hakhe a sengkrak okrani seleng aphuru’-no ham kha.

Borok kwbángmano Jisu ham rwmani

(Mar 1.29-34; Luk 4.38-41)

14Jisu Pitorni nogo tháng kha, bo aro Pitorni bwkrajwkno lumui klaiwi tongma nuk kha. 15Bo bini yak tang kha, aphuru kulum swraui tháng kha; hakhe bo bachaui bono chá rw kha khan rw kha.

16Sanja klai kheno bororok mwtai hamya kolobjakrok kwbángmano Jisuni thani tubu kha. Hakhe Jisu kók tháisa bai’-no mwtai hamyarokno rwkhlai kha, bebak hamyaroknobo ham rw kha. 17“Bo sakphang’-no chini hamyano hor kha, chini bemukrok ruju-ui tlang kha,” hwnwi Jisaia diyari sa langmani abo nang phaina bagwi omo wngo.Jis 53.4.

Jisuni logi tongna nainairok

(Luk 9.57-62)

18Jisu luku kwbángmano bono chorsa khe kuthumma nugwi bini sagrirokno twibomni ayang naro thángna hwnwi dagi kha. 19Kerong phrwngnai khoroksa bini thani phaiwi hai hwnwi sa kha, “Hodakra, nwng tháng thani-o ang thángna gosi-o.”

20Jisu bono hai hwnwi sa kha, “Siyalni hakhor tongo, toksa-toktẃirokni bothop tongo, Borokni Sajlani le kwrẃngsa phano bokhorok bomna se kwrwi.”

21Tei khoroksa sagri hai hwnwi sa kha, “Hodakra, swkang aphano phobwi rwui grana.”

22Jisu hai hwnwi sa kha, “Nwng ani logi phai di, kwthwi bai kwthwi’-no phob lai thung.”

Jisu nokbar kotor thak rwmani

(Mar 4.35-41; Luk 8.22-25)

23Jisu rungo ka kha, bini sagrirokbo bini logi tháng kha. 24Achomsa twibomo nokbar kotor sibcha khe rungo twi aphal pung phai kha. Aphuru Jisu thu-ui tongo. 25Sagrirok bini thani thángwi bono socha lai “Subrai, chwngno mwthang di, chwng thwina naiwi tong lai kha!” hwnwi sa kha.

26“Norok tamni bagwi aswk kirijak? Norokni poito tamo swk kisa gwja!” hwnwi Jisu hwn kha. Hakhe bo bachaui nokbar bai twino damrogwi rw kheno bebak kwchang kwchang wng kha.

27Bebakno uanajak bai kha, “Omo bubo tẃi borok hwno? Nokbarrok bai twirok suda bini kók khnaui ma tongo!” hwnwi bórok sa lai kha

Jisu mwtai hamya kolobjak khoroknwino ham rwmani

(Mar 5.1-20; Luk 8.26-39)

28Jisu twibom ayang narni Gadara amchoi-o phai khe simalwngni ongkhorwi phainai borok khoroknwi bini thani sók phai kha. Bórok mwtai hamya kolobjak, bórok belai kirimasingcha, aboni bagwi khoroksa phano a lama tẃi him rak ya. 29Logi logi’-no bórok hai hwnwi chirikhók kha, “O Jisu, Kaitorni Sajla, nwng chwng bai tamo nangjak? Mol sók phai ya sini’-no da nwng chwngno sátokna phai?” 30Aro uak kwbángma ada chá laiwi tongmani, abo bai kwbáng chal tha ya. 31“Nwng chwngno rwkhlaina khe u uak bodolo chwngno rohor ja di,” hwnwi mwtai hamyarok Jisuno koi kha.

32“Tháng di,” hwnwi Jisu bórokno hwn kha. Hakhe bórok ongkhorwi uakrokni bisingo thángwi habwi kha. Hakhe aswk uak bebak’-no harwbra tẃi ongkhor klaiwi twibomo kwlwgwi thwi bai kha.

33Uak mwrwknairok khárwi tauno tháng lai kha, hakhe bebak kókno khupro-ui saui bai kha, a mwtai hamya kolobjakrok tamo wng kha a kóknobo saui bai kha. 34Aboni bagwi taunni khoroksa kwrwi tẃi Jisu bai malaina hwnwi tháng kha. Bórok bo bai malai khe bono bórokni amchoini ongkhorwi tháng di hwnwi koi kha.

---------------------------------------------------------------------------------------------------

MATHAI 9

Yakung yak man yano Jisu ham rwmani

(Mar 2.1-12; Luk 5.17-26)

1Jisu rungo kasaui twibom láiwi bini tauno kiphilwi phai kha. 2Borok khoroknwi khoroktham uaingo khe yakung yak man ya khoroksano balwi bini thani tubu-ui phai kha. Bórok aswk poito khlaimano nugwi Jisu a yakung yak man yano “Ta uana di, chwlasa. Nini sumsok nakarjak kha,” hwnwi sa kha.

3Hakhe Kerong phrwngnairok baksa khá bising bising hai hwnwi uansuk lai kha, “O borok ba Kaitorno se hamya sa bla!”

4Bórok uansukma kókno Jisu saui manẃi hai hwnwi sa kha, “Tamo wngwi norok omo hai kók hamya uansuk lai? 5‘Nini sumsok nakarjak kha,’ hwnwi sana da lai kuk, eba khe ‘Bachaui him gra di,’ hwnwi sana da lai kuk; bubo lai kuk? 6Hakhe o swngcharo Borokni Sajla sumsok nakarwi mano abono ang norokno phunuk anw.” Hakhe Jisu a yakung yak man yano “Bacha di, nini uaing khochaui nogo tháng di!” hwnwi sa kha. 7A borok bachaui nogo tháng kha. 8Abono nugwi bororok kirijak bai kha Kaitor bororokno omo tẃi phan rwma bai bórok Kaitorno lob lai kha.

Jisu Mathaino ringmani

(Mar 2.13-17; Luk 5.27-32)

9Jisu aroni kutulwi tháng kha, hakhe him te him te Mathai hwnwi teks romnai khoroksano bini tangnogo achugwi tongma nugwi kha. “Ani logi phai di,” hwnwi Jisu bono sa kha.

Hakhe Mathai bachaui bini logi tháng kha. 10Mathaini nogo Jisu mai cháui tong phuru teks romnairok bai basijak borok kwbángma bo bai tei bini sagrirok bai baksa chá thani achuk phai kha. 11Khoroknwi khoroktham Pharisairok abono nugwi bini sagrirokno hai hwnwi sẃng kha, “Norokni hodakra tamo wngwi teks romnairok bai tei basijakrok bai chá lai nung lai khlai sla?”Luk 15.1-2.

12Jisu bórokni kók khnaui hai hwnwi sa kha, “Kahamni daktor nang ya, hamyani se nango. 13‘Ang pun tok nai ya, khairokma se nai-o,’ hwnwi elembakni o kók tamo hwnwi sa kha thángwi nai di. Bórom gwnangrokno ang ringna phai ya, tamo khe basijakrokno se bwkha kiphil thung hwnwi ang ringna phai-o.”Hos 6.6; Mat 12.7.

Ubasni kók sẃngmani

(Mar 2.18-22; Luk 5.33-39)

14Aphuru baptisma rwnai Johonni sagrirok phaiwi Jisuno hai hwnwi sẃng kha, “Chwng bai Pharisairok ba tamo wngwi ubas tong tong lai sla? Nini sagrirok le kisa phano tong ya sla?”

15Jisu hai hwnwi sa kha “Káijaknaisa logi tong twtwi kái lai panda-o phainairok mogwi tong anw hwnwi da norok khá ka? I’nhi, ahai ya! Tamo khe omo tẃi sal phai anw, káijaknaisa bórok bai swkagwi tlangjak anw, aphuru khe bórok chá yaui ma tong anw.

16“Rí kwchamo khoroksa phano rí kwtal thap ya; omo tẃi khe thabmani abo rí kwchamno teibo kichik rwui bwlam uar rwnai. 17Eba khe khoroksa phano angur bwtwi kwtalno twk mosonjago ton ya; ton khe a twk rechek rachak wngnai, hakhe bwtwibo kwsarnai, twkbo báinai. Tamo khe angur bwtwi kwtalno twk kwtalo’-no tono, hakhe kwnwi nwi’-no kaham tong anw.”

Hodani bwsajwk bai Jisuni dulai tangnaijwk

(Mar 5.21-43; Luk 8.40-56)

18Jisu o kókno bórokno saui tong phuru hoda khoroksa phaiwi yáskú sungwi hai hwnwi sa kha, “Angsajwk tabuk’-no thwi dorop. Phai di, nwng bini sago yak bera kheno bo thangchanai.” 19Hakhe Jisu bachaui bini logi tháng kha bini sagrirokbo bo bai baksa tháng kha.

20Bwrwima khoroksa nokha bisi chiknwi wng kha rí súma thak ya, bo uklok tẃi phaiwi Jisuni dulai buchuk tangwi rw phai kha. 21“Ang bini dulai buchuk tang kheno hamnai,” hwnwi bo khá bising bising uansuk kha.

22Jisu uphilwi bono naisigwi hai hwnwi sa kha, “Bwrwima, ta uana di. Nini poito nono ham rw kha.” Aphuru’-no a bwrwima ham kha.

23Hakhe Jisu a hodani nogo tháng kha. Kwthwini tamnairokno tei bebak borokno kutuk laijak nugwi. 24Bo hai hwnwi sa kha, “Jotono ongkhorwi tháng bai di! O chwrai thwi ya; bo thu-ui se tongo!”

Bui bebak’-no bono mwnwi bai kha. 25A bororokno tikhlai rw bai kheno a chwrai tongma nogo Jisu habwi bini yak romwi kha, hai kheno a chwrai bacha kha. 26O kók a ha gwnangwi pírjak kha.

Mokol phula khoroknwino Jisu nuk rwmani

27Jisu aroni kutulwi tháng kha, hakhe himwi tong phuru mokol phula khoroknwi bono rwkthar lai kha. “O Daudni Sajla, chwngno khairok jaba di!” hwnwi bórok chirik lai kha.

28Jisu nogo tháng kheno a mokol phula khoroknwirok bini thani phai kha. “Ang omo hai khlaiwi mano hwnwi norok poito da tháng?” hwnwi Jisu bórokno sẃng kha.

“I’n, poito thángo, hodasa,” hwnwi bórok sa kha.

29Jisu aphuru khe bórokni mokol tangwi “Norok poito tháng tẃi’-no wng thung!” hwnwi sa kha. 30Hakhe bórok mokol nuk kha. “O kókno khoroksano phano ta sa di,” hwnwi Jisu bórokno ragdama khe sa kha.

31Bórok thángwi Jisuni kók a ha gwnangwi pír kha.

Kók man ya khoroksano Jisu ham rwmani

32A borok khoroknwirok tháng kheno khoroknwi khoroktham bororok mwtai hamya kolobjak kók man ya khoroksano Jisuni thani tubu lai kha. 33A mwtai hamya rwkhlaijak kheno a borok kók sacha kha. Jotono uanajak bai kha. “Israilrokni bisingo omo hai chwng nuk ya kho,” hwnwi bórok sa lai kha.

34Pharisairok khe “Mwtai hamyarokni bokhorok bai se bo mwtai hamyarokno rwkhlai-o,” hwnwi sa lai kha.Mat 10.25; 12.24; Mar 3.22; Luk 11.15.

Jisu lukuno hamjakmani

35Jisu bebak taunrogo kamirogo tháng kha. Bo bórokni thumnokrogobo phrwng kha, Kaitorni hani Kothoma Kahambo pír kha, bebak bemuk gwnang hamyaroknobo ham rw kha.Mat 4.23; Mar 1.39; Luk 4.44. 36Bo lukurokno nugwi belai khairokjak kha, tamni hwn khe mwrwknai kwrwi merarok hai bórok khairok susuk piring-poroi gwja.Lek 27.17; 1Ha 22.17; 2Bo 18.16; Esk 34.5; Sak 10.2; Mar 6.34. 37Aboni bagwino bo bini sagrirokno hai hwnwi sa kha, “Mai kwbángma munui tong kha, yang ranai se báng ya. 38Aboni bagwino bini mai rana bagwi ‘Teibo borok rohor di,’ hwnwi nokphangsano san di.”

----------------------------------------------------------------------------------------------------

MATHAI 10

Jisuni chonghor chiknwirok

(Mar 3.13-19; Luk 6.12-16)

1Jisu bini sagri chiknwirokno kwrẃngsa khe ringwi mwtai hamyarok rwkhlainani bai bebak bemuk gwnang hamyarokno ham rwnani phan rw kha. 2Omorok wng kha a sagri chiknwirokni bumung: swkang Simon (bono Pitor hwno) tei bini takhuk Andria; Jakob bai bini takhuk Johon, bórok wng kha Sebedaini bwsarok; 3Philip tei Bartholomai, Thoma tei teks romnai Mathai; Alphaini bwsla Jakob tei Thadai; 4Kanansa Simon, hwn khe Jisuno rom rwnai Judas Iskariot.

Chonghor chiknwirokno pírna rohormani

(Mar 6.7-13; Luk 9.1-6)

5Jisu o chiknwirokno hai hwnwi saui rohor kha, “Buini bororokni ha-o tei Samariarokni taun khungsa-o phano ta tháng di, 6mera kwmajak hai Israilrokni thani se tháng di. 7‘Kaitorni ha sampha kha!’ hwnwi thángwi pírwi di. 8Hamyano ham rw di, kwthwino mwthangwi di, biyadi chájakno ham rw di, mwtai hamyano rwkhlai di. Norok ahai’-no manmani, ahai’-no rw di. 9Nini kholjango mungsa phano ta tẃi di, rangchak buya, rukphai buya, tamani rang buya; 10lamani bagwi bogol ta tẃi di, kamchlwi kangsani bára ta tẃi di, yaklabo ta tẃi di, raidangbo ta tẃi di. Samung tangnaisa bini chámung manthai klai-o.1Ko 9.14; 1Ti 5.18.

11“Norok taun khungsa swgo kami khungsa swgo sók phai khe aro habwi norokno nogo kasa rwna muchungnai abo tẃi borokno naituk di, hakhe aroni kutul ya sak a borok bai tong di. 12Norok noksingo ma hap khe ‘Khá kwchang di,’ hwnwi hwn di. 13A nokni bororok norokno yachak sok khe norok ‘Khá kwchang di,’ hwnmani a kók nang thung. Phiya bórok yachak sok ya khe a kók ta nang thung. 14Phiya noksa swk phano taun khungsa swk phano norokno nogobo kasa rw ya khe, norokni kókbo khna ya khe, hakhe yakungni hadlwi bupraui klangwi aroni kutulwi tháng di.Sam 13.51. 15O kókno muitu narwk di, Jerani Salo a taunni bororokni slái Sodom bai Gomorani bororokno Kaitor maya chá kuk anw.Mat 11.24; Yap 19.24-28. Luk 10.4-12.

Sátokjaknani kók

(Mar 13.9-13; Luk 21.12-17)

16“Khna di, ang norokno geguma khola-o merano rohor tẃi se rohoro. Norok chibuk hai hus gwnang wng di, pharuk hai kwchang kwchang wng di.Luk 10.3. 17Hus khe tong di, bororok norokno khaui kuto tlang anw, thumnokrogo norokno swprak anw. 18Gobornorrok bai bugrarok tei buini bororokno Kothoma Kaham sana bagwi norok gobornorrok bai bugrarokni bwskango ani bagwi buj thumna tubujak anw. 19Norok buj thumjak phuru tamono sanai bahai khe sanai abono ta uana di; aphuru norok tamo sanai abo norokno saui rwjak anw. 20Tamni hwn khe norok samani kók abo norok sa glak; abo norokni Phani Phola se norokni khúk tẃi sanai.Mar 13.9-11; Luk 12.11-12; 21.12-15.

21“Takhuk takhukno butharna bagwi rom rwui rohor anw, buphabo hai’-no bwsano khlai anw; bwsa-bẃtẃirokbo buma buphani kena ari wngwi bórokno butharna rohor anw.Mar 13.12; Luk 21.16. 22Ani bagwi bebak borok norokno naisler anw, tamo khe soiwi man suknai borok bo se mwthangjaknai.Mat 24.9,13; Mar 13.13; Luk 21.17. 23Bórok taun khungsa swgo norokno sátok khe tei khungsa-o khárwi tháng di. Ang norokno o kók sa-o, Israilni bebak tauno norok samung khlai bai ya sini’-no Borokni Sajla phainai.

24“Phrwngnaini slái srwngnai tor ya; selengbo nokphangni slái tor ya.Luk 6.40; Joh 13.16; 15.20. 25Aboni bagwino srwngnaibo phrwngnai bai baksa wng kheno, selengbo nokphang bai baksa wng kheno khá kochom thai klai-o. Nokphang Belsebul hwnjak khe bini nokni bororokbo bwswk se hamya hwnjak no!”Mat 9.34; 12.24; Mar 3.22; Luk 11.15.

Sabono kirithai klai?

(Luk 12.2-7)

26“Hakhe bororokno ta kiri di, kholobwi tonjak phiyokjak anw, kotonwi tonjak sijak anw.Mar 4.22; Luk 8.17. 27Ang norokno mwnago samani abo pohoro sa phi di, norok tepsa khe khnamani abo kami kami sa di. 28Mangno simi butharwi mannairokno ta kiri di, bórok pholano butharwi man ya. Kaitorno se kiri di, bo le mang bai phola-o mungnwino’-no morke-o sokomorwi mano. 29Norok lepsa bai’-no chwrwi maknwi paiwi mano; hai phano norokni Pha muchungjak ya khe omo tẃirok suda masa phano ha-o klai ya. 30Norokni khe bokhorokni bebak bwkhnai suda se lekhajak. 31Abo bai’-no ta kiri di; chwrwi kwbángmani slái norok tor kugo.”

Luku bwskango Khristono gosi khe

(Luk 12.8-9)

32“Luku bwskango ano gosi khe angbo chuknohani Aphani bwskango a borokno gosinai. 33Phiya luku bwskango ano gosi ya khe angbo chuknohani Aphani bwskango a borokno gosi glak.”2Ti 2.12.

Ang kwtha rwnai ya, uálai rwnai se

(Luk 12.51-53; 14.26-27)

34“Swngcharni bororokno kwtha rwna hwnwi ang phai-o hwnwi khá ta ka di. I’nhi, ang kwtha rwna hwnwi phai ya, seng rw phaina hwnwi se phai-o. 35Ang bupha bai bwsano, buma bai bwsajwkno, kwrajwk bai hamjwkno uálai rwnani bagwi se phai-o; 36nokni borok’-no nokni bagwi kena ari wngnai.Mik 7.6.

37“Ano hamjakmani slái buma buphano hamjak kuknai borok bo ani borok wngna chúk ya; phiya ano hamjakmani slái bwsa-bẃtẃino hamjak kuknai borok bo’-bo ani borok wngna chúk ya. 38Sakni krus tẃiwi ani logi phai ya khe a borok ani borok wngna chúk ya.Mat 16.24; Mar 8.24; Luk 9.23. 39Kwthang tongna muchungnai borok bo thwinai; ani bagwi thwinai borok bo kwthang tongnai.”Mat 16.25; Mar 8.35; Luk 9.24; 17.33; Joh 12.25.

Sokatni kók

(Mar 9.41)

40“Norokno yachaknai borok bo anobo yachago; phiya ano yachaknai borok bo ano rohornainobo yachago.Luk 10.16; Joh 13.20; Mar 9.37; Luk 9.48. 41Kaitorni diyarino diyari hwnwi yachaknai borok bo diyari bai baksa sokat mannai; borok kahamno kaham hwnwi yachaknai borok bo a borok bai baksa sokat mannai. 42O kókno muitu narwk di, ani bororokni bere jotoni slái kusuno phano ani borok hwnwi twi kwchang khopsa khannai borok bo bini sokat ma se mannai.”

----------------------------------------------------------------------------------------------------

MATHAI 11

Baptisma rwnai Johonni sagrirok Jisu bai malaimani

(Luk 7.18-35)

1Jisu bini sagri chiknwirokno hai hwnwi phrwngwi pái khe aroni kutulwi thángwi gana-ginini taunrogo phwbo phrwngwi kha, píbo pírwi kha.

2Baptisma rwnai Johon alongo tongwi Khristoni samungrokni kók khna khe bini sagri khoroknwi khorokthamno bini thani rohor kha. 3Bórok Jisuno hai hwnwi sẃng kha, “Chwngno sa di, borok khoroksa phainai hwnwi Johon samani nwng da a borok? Chwng ba tei khoroksa swkno da naisingwi tongnai?”

4Jisu hai hwnwi sa kha, “Norok khnamano norok nukmano Johonno saui di: 5phula nuk kha, khora him kha biyadi ham kha, nathong khna kha, kwthwi mwthangjak kha, phiya kwrwirokni thani Kothoma Kaham pírjak kha.Jis 35.5-6; 61.1. 6Ani bagwi khá udru mudru wng ya borok bono hamchajak!”

7Johonni sagrirok kiphilwi tháng phuru Jisu lukurokno Johonni kók hai hwnwi sa kha, “Norok hasing panthoro Johonni thani tháng phuru tamo naina muchungwi tháng? Nokbar bai narjak nolphangno da naina tháng? 8Hakhe tamo naina tháng sla? Rí jilik jalak kanjakno da naina tháng? Abo tẃi kannai chumnairok bórok dolan-paki-o se tongo! 9Sa di, tamo naina tháng sla? Diyarino da? Au, ang norokno o kók sa-o, diyarini slái phano teibo kotorno norok nuk bu kha. 10‘Iko, omono ang rohormani a borok hwnwi Kaitor sa-o; nini lama hokna bagwi ang bono nini slái swkang rohor anw,’ hwnwi Elembago swijak tongmani abono Johon.Mal 3.1. 11O kókno muitu narwk di, o swngcharo phainairokni bisingo Johonni slái kotor kwrwi, hai phano se Kaitorni hani jotoni borok kusu phano se bini slái kotor. 12Johon bini kók pír phuruni simi tabukbo Kaitorni ha mar khe buprajagwi tongo, bupranairokbo abono sekna nai tongo. 13Johonni mol jora bebak diyarirok tei Musini Kerong Kaitorni hani kók sa kha;Luk 16.16. 14norok bórok samano khna khe Johonno a phainai hwnmani Elia hwnwi saui man anw.Mal 4.5; Mat 17.10-13; Mar 9.11-13. 15Khunju tong khe ba o kókno khna di.

16“Hakhe tabukni bororokno ang tamo bai sunai? Bórok bajar kwcharo achugwi hai hwnwi sa lai hornai chwrairok hai. 17‘Norokni thani chwng kái lai pandani sumui tam kha, norok le mw se mwsa ya! Chwng kwthwini kapmung kap kha, norok le ka se kap ya!’ 18Johon bo maibo chá ya, angur bwtwibo nung ya, hakhe ‘Bo mwtai hamya kolobjak,’ hwnwi jotono hwn kha. 19Phiya Borokni Sajla bo chábo chá-o, nubo nungo, hakhe jotono ‘Iko, nahar di u borokno! Bo cháphlak-nungphlak, teks romnairok bai basijakrokni bayap!’ hwnwi sa lai ti kha. Hai phano samung bai se Kaitorni elem sói khe sijago.”

Poito Kwrwi taunrok

(Luk 10.13-15)

20Jisu ha-o nuk ya samung khlai kukmani taunrokni bororok sumsok yakar ya kho hwnwi bo a taunrokno hwn kha. 21“O Khorasin, nwng bwswk se hamya sitra no! O Betsaida, nwngbo bwswk se hamya sitra no! Norokni bisingo ha-o nuk ya samung khlaijakma hai Tur bai Sidono khlaijakma tlai aroni bororok sumsok yakar kha hwnwi phunukna bagwi bú masíngo’-no pudri kanwi sago thapla phulwi tong kha mun.Jis 23.1-18; Esk 26.1—28.26; Jol 3.4-8; Amo 1.9-10; Sak 9.2-4. 22Hakhe o kókno muitu narwk di, Jerani Salo norokni slái Tur bai Sidonni bororokno Kaitor maya chá kuk anw. 23Nwng la Kapharnaum! Nwng da chuknoha swk chukna naimani! Nwng morke-o khiklaijak anw! Nini aro ha-o nuk ya samungrok khlaijakma hai Sodomo khlaijakma te tabukbo abo tong kha mun.Jis 14.13-15; Yap 19.24-28. 24Hakhe o kókno muitu narwk di, Jerani Salo nini slái Sodomno Kaitor maya chá kuk anw,”Mat 10.15; Luk 10.12.

Ani thani lengla phai di

(Luk 10.21-22)

25Aphuru Jisu hai hwnwi sa kha, “O chuknoha bai swngcharni bugra Apha, ang nono hambai rw-o, tamni hwn khe nwng elem gwnang bai sinairokno khogwi tonmano siyarokno si rw kha. 26Au, Apha, nwng omono kaham hwnwi khá chongmani.

27“Apha ani yago bebak’-no rw bai kha. Aphano karwi Sajlano sininai kwrwi; phiya Sajla bai Sajla sini rwna muchungma borokno karwi Aphano sininai kwrwi.

28“Poja hilik tẃiwi lengjak bebak bororok ani thani phai di, ang norokno lengla rw anw. 29Norok ani jual tisaui bal di, ani thani srwng di, tamni hwn khe ang borok kwbo kwchang, kobo koinene hakhe norok lenglaui man anw. 30Ang norokno jual rwna hwnmani abo heleng se; ang norokno poja bokna hwnmani abo’-bo heleng se.”

-----------------------------------------------------------------------------------------------

MATHAI 12

Sabat salni kók sẃngmani

(Mar 2.23-28; Luk 6.1-5)

1Aboni ulo Sabat salo Jisu gom bwlwng kwchar tẃi himwi thángmani. Bini sagrirok ok khuijagwi gom bwtang cherwi chána cheng lai kha. 2Pharisairok abono nugwi Jisuno hai hwnwi sa kha, “Nai di, nini sagrirok Sabat salo abo hai khlaimani abo chini Kerongno swbaima klai-o.”

3Jisu hai hwnwi sa kha, “Daud bai bini logisongrok ok khuijak phuru tamo khlai kha abo norok poriui nai ya kho diba? 4Bo Kaitorni nogo hap kha, hakhe Kaitorni thani barokmani a ruti bo bai bini logisongrok chá lai kha; aile ochairok simi se a ruti cháui mano, bui chá khe Kerong swbaima klai-o.1Sa 23.1-6. Leb 24.9. 5Eba khe Sabat brúm brúm noktharni ochairok Sabat salni kerongno swbai phano majra klai ya, abono norok Musini Kerongo ma pori ya kho diba?Lek 28.9-10. 6Ang norokno o kók sa-o, oro noktharni slái phano mungsa kotor tongo. 7‘Ang pun tok nai ya, khairokma se nai-o,’ hwnwi elembakni o kókno norok saui man sukma te norok majra klai ya borokno majra ber glak kha mun;Hos 6.6; Mat 9.13. 8tamni hwn khe Borokni Sajla wng kha Sabat salni bokhorok.”

Yak hoichajakno Jisu ham rwmani

(Mar 3.1-6; Luk 6.6-11)

9Jisu aroni kutulwi thángwi bórokni thumnogo tháng kha. 10Aro yak hoichajak borok khoroksa tongo. Aro baksa borok Jisu samung cha ya khlai khe bono majra berna naiwi tongo. Hakhe bórok bono hai hwnwi sẃng kha, “Sabat salo ham rwmani abo Kerong swbaima da klai?”

11Jisu hai hwnwi sa kha, “Norokni bere khoroksa swkni mera masa Sabat salo hakhoro klai khe bo abono tisa anw bla?Luk 14.5. 12Merani slái borok tor kugo! Aboni bagwino Sabat salo chubana samung khlai mano hwnwi chini Kerong sa-o,” 13Hakhe bo a borokno “Yak pholok di,” hwnwi sa kha.

Bo yak pholok kheno tei kongsa yak hai’-no a yakbo ham phi kha. 14Pharisairok tháng laiwi Jisuno butharna bagwi kók chap lai kha.

Kaitorni chongjak seleng

15Omono khna kheno Jisu aroni tháng kha, hakhe borok kwbángma bono rwkthar kha. Bo bebak hamyano ham rw kha, 16hakhe bini kókno buino ta sa di hwnwi bórokno sa kha. 17Omo tẃi khe Jisaia diyarini khúk tẃi Kaitor hai hwnwi samani abo nang phai-o,

18“Iko, ani seleng,

bono’-no ang chongmani,

bono’-no ang hamjago,

bo bai’-no ang khá kochomo.

Bono’-no ang ani Phola

rwnai hakhe bo bebak bororokni thani ang buj thumna hwnmano sanai.

19Bo uálai glak,

chiri-mokorok wng glak,

bo lama lama sotonwi kók sa glak.

20kahamno kwplai khlai ya sak

bo nol-khagra swbai glak,

chati thwi muru muru

buthar glak;

21phiya bebak dophano

bono khá tung anw.”Jis 42.1-4.

Jisu ba Belsebul bai mwtai hamya rwkhlai pho

(Mar 3.20-30; Luk 11.14-23)

22Aphuru borok khoroksa Jisuni thani tubujak kha, a borok mwtai hamya kolobjakma bai mokolbo nuk ya, kókbo man ya. Jisu bono ham rw kha, hakhe bo mokolbo nuk kha, kókbo saui man kha. 23Lukurok uanajagwi “Bo Daudni Sajla ya wng glak diba?” hwnwi sa lai kha.

24Omono khnaui Pharisairok hai kwnwi sa kha, “Mwtai hamyarokni bokhorok Belsebulni phan bai se bo mwtai hamya rwkhlai-o.”Mat 9.34; 10.25.

25Bórok uansukma kókno Jisu saui manẃi bórokno hai hwnwi sa kha, “Hani bororok uálai kak lai khe a ha tong glak; taun khungsani bororok eba khe núkhung khungsani bororok uálai-kak lai khe abo’-bo bái thángnai. 26Abo hai’-no Soitanni ha-o dolsa tei dolsa bai uálai khe abo kak laima se klai-o, hakhe a ha dakti’-no bái thángnai. 27Belsebul rwmani phan bai se ang mwtai hamya rwkhlai-o hwnwi norok sa lai-o. Hai hwn khe norokni bororokno mwtai hamya rwkhlainani phan sabo rw sla? Norokni bororokno norokni o kókno cha ya hwnwi phunugo. 28Ahai ya, Kaitorni Phola se ano mwtai hamya rwkhlainani phan rw-o, abo’-no Kaitorni ha norokni thani sók phai kha hwnwi sijak rw-o.

29“Phan gwnang borokno swkang baira kha ya khe bini nogo habwi manwirok segwi tubu-ui man ya; kha khe se bini nok sodro-podro khlai mano.

30“Ani bwkhak tong ya borok bo ani kena ari se; ang bai thumchru ya khe a borok piring-poroi se khlai-o.Mar 9.40. 31Aboni bagwino ang norokno o kók sa-o: bororok jesa sumsok khlaimani, jesa kók hamya samani abo nakarjakna tongo; tamo khe Phola Kwtharno hamya sanai borok bo nakarjak glak. 32Borokni Sajlano hamya sanai borok bo nakarjakna tongo, tamo khe Phola Kwtharno hamya sanai borok bo nakarjak glak; tabuk buya, ulo buya.”Luk 12.10.

Bwthái bai’-no buphang sinijago

(Luk 6.43-45)

33“Bwthái kaham manna khe buphang kaham wngna nango; buphang hamya khe bwthái hamya mannai, Buphang bini bwthái bai’-no sinijago.Mat 7.20; Luk 6.44. 34Norok chibukrok; norok hamya twtwi bahai khe norok kók kaham saui man? Bwkha-o kupulung wngwi tongma hai’-no borok búkhúk bai sa-o.Mat 3.7; 23.33; Luk 3.7; Mat 15.18; Luk 6.45. 35Borok kaham bwkha-o kaham chu-ui tongmani aroni kaham tikhlai-o; borok hamya ba hamya chu-ui tonmani aroni hamya tikhlai-o.

36“Ang norokno o kók sa-o: Jerani salo joto kók nang ya saui phaimani aboni isap ma rw anw. 37Nwng majra gwnang da majra kwrwi abo nini kók bai’-no nwng manjak anw.”

Bui soidomni samung naina pho

(Mar 8.11-12; Luk 11.29-32)

38Aphuru khoroknwi khoroktham Kerong phrwngnairok bai Pharisairok hai hwnwi sacha kha, “Hodakra, nwng soidomni samung khlaimani chwng kisa naina muchungo.”Mat 16.1; Mar 8.11; Luk 11.16.

39Jisu hai hwnwi hwn kha, “Tabukni bororok bwswk se chengta gwja! Kaitorno bwswk se kiri ya gwja! Norok ano soidom phunuk di hwn kho. I’nhi, Jona diyarini a soidomno karwi tei mungsa soidom phano norok phunukjak glak.Mat 16.4; Mar 8.12. 40Jona á kotorni bohok bisingo saltham hortham tongma tẃi’-no Borokni Sajlabo saltham hortham ha tola-o tong anw.Jon 1.17. 41Jerani salo Ninobini bororok bachaui norokno majra ber anw, tamni hwn khe bórok Jona kók samano khnaui sumsok yakar kha. Ang norokno o kók sa-o, oro Jonani sláibo teibo mungsa kotor tongo.Jon 3.5. 42Jerani salo ha salgrabaini isiri bachaui norokno majra ber anw, tamni hwn khe Solomonni kók elemi khnanani hwnwi bo ha buchukni phai kha; ang norokno o kók sa-o, oro Solomonni sláibo teibo mungsa kotor tongo.”1Ha 10.1-12; 2Bo 9.1-12.

Mwtai hamya kiphilmani

(Luk 11.24-26)

43“Borok khoroksa swkni sakni mwtai hamya ongkhor khe, bo ha kwrano himgurungwi bathakthai naituk gra-o. Ulo kwrẃngsa phano nuk ya khe 44‘Ang ongkhorwi phaima a nogo tháng phir anw,’ hwnwi bo khá bising bising sa-o. Hakhe bo kiphilwi thángwi a nokno bukcha, pharjak-sipjak tei thiti nugwi-o. 45Abono nugwi thángwi bo bini slái chengta mwtai hamya tei maksnino ringwi tubu-ui arono aro tong phai-o. Hakhe a borok swkangni slái teibo digi-sigi wngo. Tabukni borok hamyarokbo abo hai’-no wngnai.”

Jisuni sakni borok

(Mar 3.31-35; Luk 8.19-21)

46Jisu bororok bai kók saui tong phuru bini buma bai bini takhuksong phaiwi sók phai kha, Bo bai kók sa laina hwnwi bórok phataro bachaui tong lai kha. 47Hakhe aroni borok khoroksa bono hai hwnwi sa kha, “Nahar di ayang, nini nwma bai nini takhuksong nwng bai kók sa laina hwnwi phataro bacha laijak.”12.47: Kaisa kuisu kók séma-o o bwtang 47 kwrwi.

48Jisu a kók sanaino hai hwnwi sa kha, “Sabo ani ama? Sabo ani takhuksong?” 49Hakhe bo bini sagrirokno yasi surwi hai hwnwi sa kha, “Iko, bo se ani ama, bórok se ani takhuksong! 50Chuknohani Aphani muchung tẃi tongnai borok bo’ se ani takhuk, ani bukhuk, ani ama.”

---------------------------------------------------------------------------------------------

MATHAI 13

Maichlwi sarmani rwngthoma

(Mar 4.1-9; Luk 8.4-8)

1A salono Jisu a nokni ongkhorwi twibom rukungo thángwi phrwngna hwnwi achugwi kha. 2Bini thani aswk borok kwbángma kuthum phaima bai bo rung khungsa-o kasaui achugwi kha, yang khe aswk borok twi rukungo bacha laijak.Luk 5.1-3. 3Hakhe bo bórokno rwngthoma bai kók kwbángma sa kha.

“Borok khoroksa maichlwi sarna hwnwi tháng kha. 4Sar phuru baksa maichlwi lama-o klai kha, hakhe toksa-toktẃirok phaiwi cháui khibi kha. 5Baksa ba ha kwrwi thani holongsiki-o klai kha. Ha báng thayani bai maichlwi dakti’-no bumuk per kha. 6Sal kasaui phai phuru khe a bumuk kwlwi khampraui tháng kha, hakhe yarwng kwbáng sukhlai man yani bai dakti’-no hoichaui tháng kha. 7Baksa ba busulwngo klai kha, hakhe busurok torsaui a bumukno kobolwi khibi kha. 8Baksa ba ha kahamo klai kha, bwtháibo thái kha; baksa sara, baksa khe dokchi, baksa khe kwthamchi thái kha.”

9Jisu hai hwnwi saui kók mwthak kha, “Khunju tong khe ba o kókno khna di.”

Tamni bagwi rwngthoma sajak kha

(Mar 4.10-12; Luk 8.9-10)

10Hakhe sagrirok Jisuni thani phaiwi hai hwnwi sẃng kha, “Bororokno kók sa phuru nwng tamo wngwi rwngthoma bai sa sla?”

11Jisu hai hwnwi sa kha, “Kaitorni hani bisingni kókno norokno saui man rw kha, bórokno khe saui man rw li ya. 12Tamni hwn khe khoroksa swkni kisa tong khe bono teibo rwjak anw, hakhe bo teibo kwbángma man anw, phiya ba kwrwini khe kisa tongma suda bini yakni najak anw.Mat 25.29; Mar 4.25; Luk 8.18; 19.26. 13Bórok naisik anw, hai phano nuk glak, bórok khna anw, hai phano khna glak eba romwi man glak; omo tẃini bagwi se ang bórokni thani rwngthoma bai kók sa-o. 14Aboni bagwino Jisaia diyari hai hwnwi sa langmani abo bórokni thani nang phai kha:

“ ‘Norok khunju kaichomwi

khna anw,

hai phano romwi man glak;

norok mokol kaichomwi

naisik anw,

hai phano nuk glak;

15tamni hwn khe o bororok

khá si ya,

bórok khunjubo muthubo,

mokolbo kholobo;

wng ya khe mokol da nuk

lang no,

khunju da khna lang no,

bwkha da si lang no,

hakhe bórok ani bwkhak

khá kiphil lang no,

phiya ang da bórokno ham

rw lang no hwnwi Kaitor sa-o.’Jis 6.9-10.

16“Norok khe bwswk talikha kaham gwja! Norokni mokol nuk kha, norokni khunju khna kha. 17O kókno muitu narwk di, norok nukmano aswk diyarirok bai Kaitorni aswk bororok naina muchungwi suda nuk ya, norok khnamano khnana muchungwi suda khna ya.”Luk 10.23-24.

Maichlwi sarmani rwngthomano Jisu swbai samani

(Mar 4.13-20; Luk 8.11-15)

18“Hakhe maichlwi sarmani rwngthoma-o tamo sajak kha abo khna di. 19Kaitorni hani kók khnaui romwi man yarok bórokno wng kha lama klainai maichlwi hai. Bórokni bisingo sarjakmani abo Soitan segwi tlang phai-o. 20Kók khna khe’-no khápang srangjagwi khá-o chopnairok bórokno wng kha holongsiki-o klainai maichlwi hai. 21Tamo khe abo bórokni bwkha-o hap súk yani bai bórok kwbáng dwgwi tongwi man ya. Aboni bagwino a kókni bagwi tekto man phuru khe eba sátokjak phuru khe bórok phatsa uslu-o. 22Baksa ba a kókno khna-o, tamo khe bórok swngcharni kók uansugo, rang-ríno mokol chẃngo, abo bai’-no a kók koboljagwi thángo, hakhe bwthái thái ya wngo. Omo tẃi bororok’-no busulwngo klainai maichlwi hai. 23Kók khnaui abono romwi mannairok bórok wng kha ha kahamo klainai maichlwi hai. Bórok bwtháibo thái-o, baksa sara, baksa khe dokchi, baksa khe kwthamchi thái-o.”

Jabrani rwngthoma

24Jisu bórokno tei tháisa rwngthoma sa kha, “Kaitorni ha khe omo hai: Borok khoroksa bini kheto maichlwi kaham sar kha. 25Horsa khe jotono muktrwi thángwi tongma jora kena ari khoroksa phaiwi mai bisingo jabra bwchlwi sarwi klangwi tháng kha. 26Buphang torwi bwthái thái khe jabrabo nukjak kha. 27Hakhe a borokni munirok bini thani phaiwi hai hwnwi sa phai kha, ‘Nokphangsa, nwng ba maichlwi kahamno sarma se bla! Buroni o jabra phai lang?’ 28‘Kena ari khoroksa swk omono khlai khna,’ hwnwi bo sa kha. ‘Nwng chwngno a jabrano phui di da hwn?’ hwnwi bórok sẃng kha. 29Bo hai hwnwi sa kha, ‘I’nhi, ta phui di, jabra bai baksa maibo phuichajakna tongo. 30Mai rana wng ya sak mungnwi nwi’-no tor gra thung. Aphuru ang ranairokno hai hwnwi sanai, jabrano swkang phuicha di, hóro sókna bagwi bochop khe kha di; hakhe maino thumwi ani mayam nogo da di.’ ”

Horua bwchlwini rwngthoma

(Mar 4.30-32; Luk 13.18-19)

31Jisu bórokno tei tháisa rwngthoma sa kha, “Kaitorni ha wng kha borok khoroksa bari-o káimani horua bwchlwi hai. 32Abo jotoni slái bwchlwi kotoi, phiya a buphang tor phuru khe aswk samphangrokni slái bo se tor kugo. Abo buphang kotor wngma bai toksa-toktẃirok bedego bothop thum phai bai-o.”

Chuanni rwngthoma

(Luk 13.20-21)

33Jisu bórokno tei tháisa rwngthoma sa kha, “Kaitorni ha chuan hai se. Bwrwi khoroksa abono mai balingsa-o sablu-ui bulma le bebak mai se lomwi tháng kha.”

Jisu tamo wngwi rwngthoma bai kók samani

(Mar 4.33-34)

34Jisu lukurokno rwngthoma bai se omorok bebak’-no sa-o, rwngthoma baiyasa tháisa phano sa ya. 35Diyari hai hwnwi sa langmani abo nang phaina bagwi omo wngo,

“Ang bórokno rwngthoma bai se kók sanai,

swngchar snam phuruni simi

khogwi tonjak kókrokno

ang bórokno sanai.”Lob 78.2.

Jisu jabrani rwngthomano swbai samani

36Aphuru Jisu lukurok bai kagwi noksingo hap kha. Bini sagrirok bini thani phaiwi “Khetoni jabrani rwngthomano chwngno sa di,” hwnwi sa kha.

37Jisu hai hwnwi sa kha, “Maichlwi kaham sarnai khe Borokni Sajla se; 38swngchar wng kha kheto; Kaitorni hani bororok wng kha maichlwi kaham; Soitanni bororok wng kha jabra; 39Soitan wng kha jabra sarnai a kena ari; rana jora wng kha mol pái phuru; ranairok wng kha suarirok. 40Jabrano thumwi hóro sókma hai’-no mol pái phuru abo hai wng anw. 41Borokni Sajla bini suarirokno rohor anw, bórok Kaitorni hani bisingni bororokno sumsogo khiklainairokno tei samung hamya khlainairokno saiwi thum anw, 42hakhe hórni kundulo khiklai anw, bórok aro ua hul laiwi ma kap lai anw. 43Aphuru Kaitorni bororok bórokni Phani ha-o sal hai chẃngwi tong anw. Khunju tong khe ba o kókno khna di.”

Rang gola phobjakni rwngthoma

44“Kaitorni ha wng kha kheto rang gola phobjak hai se. Borok khoroksa abono achomsa nuk kha, hakhe hai’-no hai phobwi kabu kha. Bo belai khá srangwi thángwi bini je tong-kwrwi phal bai kha, hakhe kiphilwi thángwi a khetono pai kha.”

Muktani rwngthoma

45“Phiya Kaitorni ha wng kha mukta kaham rutugwi painai borok hai se. 46Bo belai mukta kaham kolsa nuk kha, hakhe thángwi bini je tong-kwrwi phal baiwi a muktano pai kha.”

Cheini rwngthoma

47“Phiya Kaitorni ha wng kha twibomo khiklaijak podrepot á nangjak chei hai se. 48Abo pung súk khe gaborrok abono tisa kha, hakhe a bak laina achuk kha; kahamrokno khe dula-o da kha, hamyarokno khe khibiui rw kha. 49Mol pái phuru khe omo hai wngnai, suarirok thángwi borok kahamrokni bisingni hamyarokno saiwi thum anw, 50hakhe hórni kundulo khiklai anw, bórok aro ua hul laiwi ma kap lai anw.”

Kók kwtal bai kók kwcham

51“Norok omorokno rom súgwi da man kha?” hwnwi Jisu sẃng kha.

“I’n, man kha bugra,” hwnwi bórok sa kha.

52Hakhe bo hai hwnwi sa kha, “Kók khe hai, Kaitorni hani sagri wngnai joto Kerong phrwngnai bo manwi kwtal bai kwchamno gulani tikhlainai nokphang hai se.”

Nasaretsong Jisuno gwnda khlai ya wngmani

(Mar 6.1-6; Luk 4.16-30)

53O rwngthomarok sa bai kheno Jisu aroni kutul kha, 54hakhe bini ha-o tháng kha. Bo aroni thumnogo phrwng kha, hakhe bini kók khnanairok uanajagwi hai hwnwi sa lai kha, “Omo tẃi elem bo buroni man? Bo ha-o nuk ya samung khlaimarok abo tamo sla? 55Bo a mistrini bwsla ya diba? Mariam bini buma ya diba? Jakob, Josep, Simon tei Juda bini buphayungsong ya diba? 56Bini bahanokjwksong bebak’-no chwng bai baksa oro tong ya diba? Omorokno bo buroni man kha ba?” 57Hakhe bórok bono gwnda khlai lai li ya.Joh 4.44.

Jisu bórokno hai hwnwi sa kha, “Diyari joto jaga-o bórijago, bini ha bai bini nogo simi se bórijak ya.” 58Bórok poito khlai yani bai bo aro ha-o nuk ya samung kwbáng khlai li ya

-----------------------------------------------------------------------------------------------------

MATHAI 14

Baptisma rwnai Johonno butharmani

(Mar 6.14-29; Luk 9.7-9)

1Aphuru Galilini habugra Herod Jisuni kók khna kha. 2Bo bini tangphangrokno hai hwnwi sa kha, “O borok kubui’-no baptisma rwnai Johon se thangcha phi kha. Aboni bagwino bini bisingo omo tẃi samung khlainani phan tongo.”

3Herod Johonno rom rw kha, bono kha rwui alongo chop kha; bini takhuk Philipni bihik Herodiani bagwi se Herod omo khlai-o. 4Tamo wngwi hwn khe baptisma rwnai Johon Herodno “O bwrwino namani bai nini cha ya!” hwnwi sama tongo. 5Hai kheno Herod bono butharna nai kha, tamo khe bo bororokno kirijago, bórok le Johonno diyari hwnwi hwn bla.

6Herodni achaima sal pálai phuru Herodiani bwsajwk aswk borokni bwskango mwsa kha, hakhe Herod belai hamjagwi 7bono “Nwng ano jesa phano san khe ang abono nono rw anw,” hwnwi swmai tang kha.

8Bini bumani kók bai bo aphuru khe hai hwnwi san kha, “Baptisma rwnai Johonni bokhorokno mairango khe aro ano rw phai di!”

9Bugra belai khá hamya wng kha, hai phano panda phainairokni bwskango swmai tangma bai bo sanmano rw di hwnwi dagi kha. 10Hakhe bo alongo Johonno tan rw kha. 11Johonni bokhorokno mairango khe tubu-ui a bwrwimano rw phai kha, bo abono bumani thani tlang kha. 12Johonni sagrirok phaiwi bini mang kwthwino tlangwi phobwi kha; hakhe bórok thángwi Jisuno saui kha.

Borok khorok basaino Jisu chá rwmani

(Mar 6.30-44; Luk 9.10-17; Joh 6.1-14)

13A kók khna kheno Jisu aroni kutulwi rung bai siring siring kwrẃngsa-o tháng kha. Bororok abo saui manẃi taunrokni ongkhor baiwi ha tẃi bini thani tháng lai kha. 14Jisu rungni ongkhor phuru borok kwbángmano nugwi khairokjak kha, hakhe bórokni bere hamya tongnairokno ham rw kha.

15Sanja wng kheno bini sagrirok bini thani phaiwi hai hwnwi sa kha, “Belai lerwi tháng kha, oro mungsa phano manthok ya. Kamirogo thángwi chámung paiwi manna tẃi khe o bororokno rohor si di.”

16“Bórok thángna nang glak; norok’-no chá rw di,” hwnwi Jisu sa kha.

17“Chini thani bebagwi ruti lepba tei á maknwi se tongo,” hwnwi bórok sa kha.

18“Abórokno ani oro tubu di,” hwnwi Jisu sa kha. 19Bo bororokno jabra-o achuk di hwnwi hwn kha; hakhe bo ruti lepba bai á maknwino naui nokhasa naisaui Kaitorno hambai rw kha. Bo a ruti swkagwi sagrirokni yago rw kha, hakhe sagrirok a bororokno rw kha. 20Jotono ok pungwi chá kha. Hakhe bára tong rwkmano sagrirok khochamani ura khung chiknwi pung kha. 21Chánairok bwrwirok bai chwrairokno karwi chwlarok simi’-no basai ká twtwi.

Jisu twi saka tẃi himmani

(Mar 6.45-52; Joh 6.15-21)

22Hai kheno Jisu bini sagrirokno rungo kasa rwui twibom ayang naro bini slái swkang’-no rohor kha; yang khe bo lukuroknobo rohor kha. 23Bororokno rohor bai khe bo suri sanna bagwi tepsa khe hathái-o kasaui kha. Sanja wng khe Jisu aro saichung. 24Aphuru a rung twi rukung bai chalo; twi aphal bai rung didagwi tong kha, tamni hwn khe nokbar pail cha ya khe sibchajak. 25Phungni kaitham bai kaidokni kwcharo Jisu twi saka tẃi himwi bórokni thani phai kha. 26Sagrirok bono twi saka tẃi himwi tongma nugwi belai kirijak kha, “Omo ba burasa se bla!” hwnwi kirima cháui chirikhók lai kha.

27Jisu logi logi’-no bórokno “Ta kiri di! Omo ang se, khá tor di!” hwnwi sa kha.

28Aphuru khe Pitor hai hwnwi sacha kha, “Subrai omo kubui’-no nwng’-no hwn khe twi saka tẃi nini thani phai di hwnwi ano hwn di.”

29“Phai di,” hwnwi Jisu sa kha. Hakhe Pitor rungni ongkhorwi Jisuni thani thángna hwnwi twi saka tẃi him kha. 30Nokbar phaima nuk kheno bo kirijak kha, hakhe twi-o kwlwkna nai kha. “O Subrai, ano mwthang di!” hwnwi bo chirikhók kha.

31Logi logi’-no Jisu yak phologwi bono rom kha, “Nini poito bwswk se kisa! Tamo wngwi nwng bwkha udru mudru wngjak?” hwnwi bo sa kha.

32Bórok khoroknwi’-no rungo kasa lai kha, hakhe nokbarbo thak kha. 33Rungo tongnai sagrirok Jisuno khulum lai kha. “Nwng kubui’-no Kaitorni Sajla!” hwnwi bórok hwn lai kha.

Jisu Genesareto hamyarokno ham rwmani

(Mar 6.53-56)

34Bórok twibom láiwi Genesaret ha-o phai sók phai kha. 35Aroni bororok Jisuno sini sok kha, hakhe bórok “Hamya tongnairokno tubu-ui phai di,” hwnwi ha gwnangwi kók kwchár kha, hakhe bebak hamyarokno Jisuni thani tubu kha. 36Bórok Jisuno “Hamyarokno nini dulai buchuk phano tang rw jaba di,” hwnwi koiwi lai kha. Hakhe tangnairok bebak’-no ham rwjak bai kha.

--------------------------------------------------------------------------------------------------

MATHAI 15

Chuchusongni sakni kerong

(Mar 7.1-13)

1Aphuru khoroknwi khoroktham Pharisairok tei Kerong phrwngnairok Jerusalemni phaiwi Jisuno hai hwnwi sẃng phai kha. 2“Nini sagrirok tamo wngwi chini chuchusong rwui klangmani kerongno swbai sla? Bórok kaham khe yak sú yaui’-no mai chá-o.”

3Jisu hai hwnwi sa kha, “Norok tamo wngwi Kaitorni dagima rákhok yaui norokni sak banokmani kerongno tẃi tong sla? 4Kaitor hai hwnwi sa-o, ‘Nwng ma-phano sak nang ya ta wng di,’ phiya ‘Khoroksa swk buma buphano hamya sa khe bo bu se butharjakna klainai.Lam 20.12; Uái 5.16; Lam 21.17; Leb 20.9. 5Aile norok hai hwnwi sa-o, buma eba buphano chubanani khoroksani mungsa swk tongwi suda se, phiya “Abo Kaitorni thani yapharjak,” hwnwi sa khe 6bo buphano sak nang ya phano wngo. Omo tẃi kheno norok Kaitorni kókno samung nangjak yaui sak banokmani kerongno rákhogwi tongo. 7Norok bwswk phatra gwja! Norokni bagwi Jisaia diyari hai hwnwi sa langmani abo bwswk kók sói!

8“ ‘O bororok búkhúk bai

ano lobo,

phiya bwkha le bórokni ang bai chaljak se hwnwi Kaitor sa-o.

9Bórok ano surina samung

nangjak ya,

tamni hwn khe borok

banokmani kerongno se

bórok Kaitorni kerong

hwnwi phrwngo.’ ”Jis 29.13.

Tamo tamo borokno hamya khlai?

(Mar 7.14-23)

10Aphuru Jisu lukuno bini thani ringwi hai hwnwi sa kha, “O kókno khwbo khna di, sibo si di. 11Búkhúgo hapnai abo tẃi manwi borokno hamya khlai man ya, búkhúk tẃi ongkhornai se bono hamya khlai-o.”

12Hakhe bini sagrirok bini thani phaiwi hai hwnwi sa kha, “Nwng samani o kók bai Pharisairok khá nangjakmani nwng saui da man?”

13Jisu hai hwnwi sa kha, “Chuknohani Apha káimani buphang ya khe jotono phuichajak bainai. 14Pharisairokni bagwi ta uana di. Bórok wng kha mokol nuk ya bokhorok; mokol nuk ya mokol nuk yano yak tolwi tẃi khe khoroknwi-nwi’-no hakhoro pulumsa klainai.”Luk 6.39.

15“O rwngthomano swbai sa di,” hwnwi Pitor sacha kha.

16Jisu bórokno hai hwnwi sa kha, “Norok tabuk suda buini slái butua gwja kho! 17Norok romwi man ya kho diba? Mungsa swk phano borokni búkhúgo hap khe abo bohok bisingo thángo, hakhe bwsakni ongkhorwi thángo. 18Phiya búkhúk tẃi ongkhorwi phaimarok abórok bwkha bisingni phai-o; abo tẃirok se borokno hamya khlai-o.Mat 12.34. 19Tamni hwn ba borokni bwkha bisingni se uansukma hamyarok ongkhorwi phai-o, abo se borokno borok buthar rw-o, buitali-buitala wng rw-o, uaija rw-o, khok rw-o, kók tatal sa rw-o, buini mungwi kók hamya sa rw-o. 20Omo tẃirok se borokno hamya khlai-o, tamo khe yak sú yaui mai chámani abo borokno hamya khlai ya.”

Bwrwima khoroksa poito khlaimani kók

(Mar 7.24-30)

21Jisu aroni kutulwi Tur bai Sidon taun ganani amchoi-o tháng kha. 22A amchoi-o tongnai Kananjwk khoroksa bini thani phaiwi hai hwnwi sa kha, “O hodasa, Daudni Sajla! Ano khairok ja di! Angsajwk mwtai hamya kolobjagwi betlai wngwi tong kha.”

23Hai phano Jisu bono kók tháisa phano sa li ya. Bini sagrirok bini thani phaiwi hai hwnwi koiwi sa phai kha, “Bono rohor si di! Bo chwngno rwktharwi keche-keche khlai-o!”

24Aphuru Jisu hai hwnwi sa kha, “Mera kwmajak hai Israilrokni thani simi se ang rohorjago.”

25Hai kheno a bwrwi bini yakungo klaiwi “Hodasa, ano chuba ja di,” hwnwi koiwi kha.

26Jisu hai hwnwi sa kha, “Bwsarokni chámungno naui sẃirokno lukhlai rwma cha ya.”

27“Abo sói’-no, hai phano nokphangni hanta klaimano le sẃirokbo ma chá bla,” hwnwi a bwrwi sa kha.

28Hakhe Jisu bono hai hwnwi sa kha, “Bwrwima, nwng belai poito gwnang, nwng sanma hai’-no khlaijak anw.” Aphuruno bini bwsajwk ham kha.

Jisu borok kwbángmano ham rwmani

29Jisu aroni kutulwi Galili twibom gana tẃi khe tháng kha. Bo hathái-o kasaui achugwi kha. 30Borok kwbángma bini thani phai kha, bórok khora, phula, kompa boba, hai khe teibo kwbángma hamyarokno tubu-ui bini yakung yaphango rw phai bai kha, hakhe bo bebakno’-no ham rw bai kha. 31Bororok bobano kók sama, kompano malma, khorano himma, phulano nukma nugwi uanajak bai kha, hakhe bórok Israilni Kaitorno lob lai kha.

Borok khorok brwisaino Jisu chá rwmani

(Mar 8.1-10)

32Jisu bini sagrirokno bini thani ringwi hai hwnwi sa kha, “O bororokno ang khairok laha, tamni hwn khe bórok nokha saltham ang bai máng tong kha, hakhe tabuk chánani mungsabo kwrwi. Ang bórokno chá rw yaui nogo rohorna muchung ya, tamni hwn khe bórok lama-o lengna phano tongo.”

33Bini sagrirok bono hai hwnwi sẃng kha, “O hasing panthoro o bororokno chá rwna bagwi chwng buro aswk chámung mannai?”

34“Norokni thani lep bwswk ruti tong?” hwnwi Jisu sẃng kha.

“Ruti lepsni tei á kisicha tongo,” hwnwi bórok sa kha.

35Jisu lukuno ha-o achuk di hwnwi hwn kha. 36Bo ruti lepsni bai á naui Kaitorno hambai rw kha, hakhe abono swkagwi bini sagrirokni yago rw kha, hakhe sagrirok lukuno rw kha. 37Bórok bebak’-no ok pungwi chá kha; bára tong rwkmano sagrirok khochamani ura khungsni pung kha. 38Chánairok bwrwirok bai chwrairokno karwi chwlarok simi’-no brwisai wng kha.

39Hakhe Jisu bororokno rohor baiwi rungo kasaui Magadan amchoi-o tháng kha.

--------------------------------------------------------------------------------------------------------

MATHAI 16

Bui Soidomni samung naina pho

(Mar 8.11-13; Luk 12.54-56)

1Khoroknwi khoroktham Pharisairok bai Sadukairok Jisuni thani phai kha. Bo Kaitor bai chongjak da abo potaliui naina bagwi bórok bono mungsa swk soidom phunuk di hwn lai kha.Mat 12.38; Luk 11.16. 2Hakhe Jisu hai hwnwi sa kha, “Sal thángnanogo nokha mwnwima nuk khe sal ham anw hwnwi norok hwn lai-o. 3Phiya phungo sal chaksajak nuk khe uatwi ua anw hwnwi norok hwn lai-o. Nokha naiwi sal bahai wngno hwnwi norok saui mano. Phiya o molo tamo wngno wng ya abono phunuguibo norok saui man ya. 4Tabukni bororok bwswk se chengta gwja! Kaitorno bwswk se kiri ya gwja! Norok ano soidom phunuk di hwn kho. I’nhi, diyari Jonani a soidomno karwi tei mungsa soidom phano norok phunukjak glak.”

Hakhe bo bórok bai kagwi tháng kha.Mat 12.39; Luk 11.29.

Pharisai bai Sadukairokni chuanni kók

(Mar 8.14-21)

5Sagrirok twibom ayang naro lái tháng phuru ruti tlangna pokjak kha. 6Jisu aphuru bórokno hai hwnwi sa kha, “Sichaui tong di, norok Pharisairokni chuan bai tei Sadukairokni chuan bai hus khe tong di.”Luk 12.1.

7“Chwng ruti tubu yani bagwi se bo o kók sa-o,” hwnwi bórok sa lai kha.

8Bórok sa laimano Jisu saui manẃi bórokno hai hwnwi sẃng kha, “Ruti kwrwi hwnwi norok abo tamo sa lai sla? Norokni poito bwswk se kisa! 9Norok tabuk suda romwi man ya kho diba? Borok basaini bagwi ang a ruti lepba swkakmani abono norok muitu man ya diba? Norok khochamani ura khung bwswk pung kha?Mat 14.17-21. 10Borok khorok brwisaini bagwi a ruti lepsinini kók la? Norok khochamani ura khung bwswk pung kha?Mat 15.34-38. 11Ang norokno samani abo rutini kók ya hwnwi norok tamo wngwi romwi man ya wng? Norok Pharisairokni chuan bai tei Sadukairokni chuan bai hus khe tong di.”

12Aphuru khe sagrirok abo ruti-o rwjaknai chuanni kók ya, tamo khe Pharisairok tei Sadukairokni phrwngmani bai hus khe tong di hwnma se hwnwi romwi man kha.

Jisuno Masia hwnwi Pitor gosimani

(Mar 8.27-30; Luk 9.18-21)

13Jisu Kaisaria Philipi taun ganani amchoi-o tháng kha. Aro bo bini sagrirokno hai hwnwi sẃng kha, “Borokni Sajlano bororok sabo tamo hwnwi sa lai?”

14“Baksa baptisma rwnai Johon hwno, baksa ba Elia hwno, baksa ba Jirimia eba diyarirokni bere khoroksa swk wngna ta,” hwnwi bórok sa kha.Mat 14.1-2; Mar 6.14-15; Luk 9.7-8.

15“Norok le tamo hwn? Ang sabo?” hwnwi bo sẃng kha.

16“Nwng Masia, Kaitor kwthangni Sajla,” hwnwi Simon Pitor sa kha.Joh 6.68-69.

17Jisu hai hwnwi sa kha, “Johonni bwsla Simon, nwng hamchajak! Tamni hwn ba o kók nwng bahan-bwthẃi bai saui man ya, omo chuknohani ani Apha se nono saui man rw-o. 18Hakhe Pitor 16.18 Grik bai khe Petros ang nono o kókbo sa-o, ang o holongni16.18 Grik bai khe petra saka-o ani motha tisa anw, butharnairokni phan16.18 Grik bai khe Morke eba Hadesni duglam suda abono mechenwi man glak. 19Ang nono Kaitorni hani suranirok rwnai, hakhe nwng o swngcharo kwcha rwmani abo chuknoha-obo kwcha rwjaknai; o swngcharo nwng khengmani abo chuknoha-obo khengjaknai.”Mat 18.18; Joh 20.23.

20Aphuru Jisu bini sagrirokno “Ano Masia hwnwi buino ta sa di,” hwnwi ragdama khe sa kha.

Bo butharjagwi se man thwinai hwnwi Jisu samani

(Mar 8.31—9.1; Luk 9.22-27)

21Aphuruni simi Jisu bini sagrirokno srai-srai khe hai hwnwi sa kha, “Ang Jerusalemo ma thángnai, hakhe okra chakrarok, ochai okrarok tei Kerong phrwngnairok bai panjalwi sátokjakna nangnai. Ang butharjaknai, hai phano salthamni salo mwthangwi tisajaknai.”

22Pitor bono simi tlangwi hai hwnwi hwn kha, “O Subrai, Kaitor omo tẃi ta khlai thung! Nini omo tẃi ta wng thung!”

23Jisu uphilwi Pitorno hai hwnwi hwn kha, “Tháng di Soitan! Nwng ani lama kebengnai se; tamni hwn ba nwng uansukmarok abo borokni uansukma se, Kaitorni uansukma ya.”

24Hakhe Jisu bini sagrirokno hai hwnwi sa kha, “Ani logi phaina khe a borok bini sakni kók ta uansuk thung, bini krus balwi ani logi phai thung.Mat 10.38; Luk 14.27. 25Kwthang tongna muchungnai borok bo thwinai; phiya ani bagwi thwinai borok bo thangnai.Mat 10.39; Luk 17.33; Joh 12.25. 26Thwi tháng kha hwn khe bebak swngcharno manẃi ba a borok tamo manma klai? Thwiwi tháng khe borok tei tamo khe thang phinai? 27Borokni Sajla Buphani chẃngsacha bai chẃngsacha wngwi bini suarirok bai phaina nai tongo, bo phai khe bororok samung khlai tẃino bo joto borokno yagul sunai.Mat 25.31; Lob 62.12; Rum 2.6. 28O kókno muitu narwk di, oro baksa tongo Borokni Sajlano bugra wngwi phaima nuk ya sak thwi glak.”

------------------------------------------------------------------------------------------------------

MATHAI 17

Jisu mul philmani

(Mar 9.2-13; Luk 9.28-36)

1Nokha saldokni ulo Pitor tei Jakob bai bini takhuk Johonno simi tlangwi Jisu hathái kuchugo tháng kha. 2Bórok naisigwi tong twtwi’-no bo mul philwi tháng kha, bini mwkhang sal hai chẃng kha, bini rírok pohor hai kwchẃng wng kha. 3Aphuru a sagri khorokthamrok Elia bai Musino Jisu bai kók sa laiwi tongma nuk kha. 4Hakhe Pitor Jisuno hai hwnwi sacha kha, “Subrai, chwng oro tongmani abo kahamno, nwng hwn khe ang oro basai khungtham tang anw, nini khungsa, Musini khungsa, tei khungsa Eliani.”

5Bo kók saui tong phuru chumui kwchẃng dolasa bórokno kobol phai kha, hakhe chumui bisingni o kók sajak kha, “Omo ani khájani Sajla. Ang bono’-no belai khe hamjago; bini kók khna di!”Yap 22.2; Lob 2.7; Jis 42.1; Mat 3.17; 12.18; Mar 1.11; Luk 3.22; Uái 18.15. 2Pi 1.17-18.

6Sagrirok o kók khnaui belai kirijak lai kha, hakhe ha-o klai bom lai tong kha. 7Jisu phaiwi borokno tangwi “Bacha di, ta kiri di,” hwnwi hwn kha. 8Hakhe bórok naisigwi khoroksano phano nuk li ya, Jisuno simi se nuk si-o.

9Bórok hatháini ongkhorwi phai phuru Jisu bórokno hai hwnwi ragdama khe sa kha, “Borokni Sajla kwthwini mwthangwi tisajak ya sak norok o nukmano kebono ta sa di.”

10Hakhe sagrirok Jisuno hai hwnwi sẃng kha “Elia se swkang ma phai granai hwnwi tamo wngwi Kerong phrwngnairok saui tong sla?”Mal 4.5.

11Jisu hai hwnwi sa kha, “I’n, Elia swkang phai granai, hakhe bo joto thiti khlainai. 12Tamo khe ang norokno o kók sa-o, Elia phaiwi tháng kha, tamo khe bororok bono sini li ya, bórok bono khlaina muchung tẃino khlai kha. Abo hai’-no Borokni Sajlabo bórok bai sátokjaknai.”Mat 11.14.

13Aphuru khe bo bórokno baptisma rwnai Johonni kók se sa-o hwnwi sagrirok saui man kha.

Jisu chwrai khoroksano sra rwmani

(Mar 9.14-29; Luk 9.37-43)

14Bórok lukuni thani kiphil khe borok khoroksa phaiwi Jisuni yakung yaphango klai 15hai hwnwi sa kha, “Hodasa, angslano kisa khairok ja di. Bo mirka gwnang, hakhe belai lengma bai uáisa uisu hórrogobo twirogobo klai trwngo. 16Ang bono nini sagrirokni thani tubu kha, hai phano bórok bono ham rwui man li ya.”

17Jisu hai hwnwi sa kha, “Norok bwswk se poito kwrwi gwja! Norok bwswk se cha ya gwja! Norok bai ang tei sal bwswk ma tongna nangno? Tei sal bwswk norokno khá ma lokna nangno? A chwraino oro tubu di.”

18Jisu a mwtai hamyano damrok khe abo ongkhorwi tháng kha, hakhe a chwrai logi logi’-no ham kha.

19Aphuru sagrirok tepsa khe phaiwi Jisuno hai hwnwi sẃng phai kha, “Chwng tamo wngwi a mwtai hamyano rwkhlai man li ya sla?”

20Jisu hai hwnwi sa kha, “Norokni poito kwrwi sukni bagwi se abo hai wngo. O kókno muitu narwk di, horua bwchlwi swk phano norokni poito tong khe norok o hatháino ‘Oroni uro tháng di!’ hwn khe abo thabo thángnai. Norok khlai man ya abo tẃi mungsa phano tong glak.Mat 21.21; Mar 11.23; 1Ko 13.2. 21[Ubas khe suri san khe simi se omo tẃino rwkhlai mano, tei mungsabo man ya.]”

Bo butharjakna kókno Jisu hai’-no hai samani

(Mar 9.30-32; Luk 9.43-45)

22Sagrirok bebak’-no Galili-o kuthum lai khe Jisu bórokno hai hwnwi sa kha, “Borokni Sajla bororokni yago yapharjakna kasu kha. 23Bórok bono butharnai, hai phano bo salthamni salo mwthangwi tisajaknai.”

Hakhe sagrirok khá hamya wngjak bai kha.

Noktharni teks

24Jisu bini sagrirok bai Kapharnaumo phai khe noktharni teks romnairok phaiwi Pitorno hai hwnwi sẃng phai kha, “Norokni hodakra noktharni teks da rw?”Lam 30.13; 38.26.

25“I’n, rw-o,” hwnwi Pitor sa kha.

Pitor noksingo hap khe Jisu hai hwnwi sẃng sok kha, “Simon, nwng le tamo hwn sla? O swngcharni bugrarok le saboni thani teksrok masulrok rom sla? Hani borokni thani da, phatarni borokni thani da?”

26“Phatarni borokni thani,” hwnwi Pitor sa kha.

Jisu hai hwnwi sa kha, “Hakhe ba hani bororok khe teks rwna se nang ya bla! 27Hai phano chwng o bororokno kwcha rwna nai ya, aboni bagwi twibomo thángwi bosoi karwi di. Puila nangmani áno tisa di, hakhe bini bukhuk phiyok khe nwng rang man anw, abo nini bai ani noktharni teks rwna chúk anw; abono naui chini teksno rwui di.”

------------------------------------------------------------------------------------------------

MATHAI 18

Sabo tor kuk?

(Mar 9.33-37; Luk 9.46-48)

1Aphuru sagrirok phaiwi Jisuno hai hwnwi sẃng phai kha, “Kaitorni ha-o sabo tor kuk?”Luk 22.24.

2Jisu chwrai khoroksano ringwi tubu-ui bórokni kwcharo bacha rwui 3hai hwnwi sa kha, “O kókno muitu narwk di, norok mul philwi chwrai hai wng ya sak Kaitorni ha-o habwi man glak.Mar 10.15; Luk 18.17. 4Koinene wngwi o chwrai hai wngnai borok bo se Kaitorni ha-o kotor kuk. 5Phiya ani mungwi omo tẃi chwraino yachaknai borok bo ano’-no yachago.”

Sumsogo khiklaimani kók

(Mar 9.42-48; Luk 17.1-2)

6“Tumungno khoroksa swk ano poito khlai tongnai o chwrai basrarokni bere khoroksa swkno sumsogo khiklai khe18.6:Grik bai khe: thutai rw khe. a borokno totra holongdap kotorma khaui twijlango khiklai rwma se ham kugo. 7Borokno sumsogo khiklainai abo tẃi manwirok tongmani abo swngcharni bagwi bwswk se hamya. Abo hai wng máng tong anw, tamo khe abono khlainai borok bwswk se hamya sitrano!

8“Hakhe nini yakung eba yak nono sumsogo khiklai khe abono tansu-ui khibi di. Yakung kongnwi yak kongnwi gwnang khe thwi phlai ya hóro khiklaijakmani slái nwng yakung kongsa eba yak kongsa kwrwi khe mwthangjakma se ham kugo.Mat 5.30. 9Nini mokol nono sumsogo khiklai khe abono ekhregwi khibi di. Mokol kolnwi gwnang khe morkeni hóro khiklaijakmani slái nwng mokol kolsa kwrwi khe mwthangjakma se ham kugo.”Mat 5.29.

Kwmanai merani rwngthoma

(Luk 15.3-7)

10Hakhe norok o chwrai basrarokni bere khoroksano phano sak nang ya ta wng di. Ang norokno o kók sa-o, chuknoha-o bórokni suarirok chuknohani ani Aphani bwskango máng tongo. 11[Tamni hwn ba Borokni Sajla kwmanairokno se mwthangna phai-o.]Luk 19.10.

12“Norok tamo hwn? Borok khoroksa swkni mera maksarani bere masa kwma khe bo tamo khlaino? Bo a mak chukuchi-chukurokno sula-o klangwi a kwmanaino rutukna tháng glak diba? 13Ang norokno o kók sa-o, bo abono man khe a mak chukuchichuku kwmayarokni slái o maksani bagwi belai tongthokjak anw. 14Abo tẃi kheno chuknohani norokni Pha bo omo tẃi chwrai basrarokni bere khoroksano phano kwmajakna muchungjak ya.”

Sumsok khlainai takhuk

15“Tumungno nini takhuk nini thani sumsok khlai khe hakhe nwng bini thani thángwi bini cha yano phunuk di. Tamo khe omo norok simi tepsa khe khlai di. Bo nini kók na khe nwng bono man phi kha.Luk 17.3. 16Phiya tumungno bo nini kók na ya khe ‘Khoroksa swkno majra berna hwn khe sakki khoroknwi eba khoroktham kók thansa wngna nang anw,’ hwnwi elembago sama hai nini logi tei borok khoroksa khoroknwino tlang di.Uái 19.15. 17Tumungno bo bórokno kók suda na ya khe hakhe mothano khupro-ui sa di. Mothani kók suda na ya khe hakhe bono buini borok hai eba teks romnai hai hwnwi rom si di.”

Kwcha rwma bai yakarmani

18“Hakhe ang norokno o kók sa-o, norok o swngcharo kwcha rwmani abo chuknoha-obo kwcha rwjaknai; norok o swngcharo yakarmani abo chuknoha-obo yakarjaknai.Mat 16.19; Joh 20.23.

19“Ang norokno o kókbo sa-o, o swngcharo norokni bere khoroknwi kók tháisa wngwi san khe chuknohani ani Apha abono rwnai. 20Tamni hwn khe borok khoroknwi eba khoroktham ani mungwi kuthum khe ang aro bórok bai baksa tongo.”

Nakar ya selengni rwngthoma

21Hakhe Pitor Jisuni thani phaiwi hai hwnwi sẃng phai kha, “Subrai, ani takhuk ani thani uái bwswk sumsok khlai khe ang bono uái bwswk nakarnai? Uáisni da?”Luk 17.3-4.

22Jisu hai hwnwi sa kha, “I’nhi, uáisni ya, uái snichi máng uáisni nakar di. 23Tamni hwn khe Kaitorni ha wng kha omo hai se: bugra khoroksa bini selengrokni isap nainani khá chong kha. 24Bo isap naui tongma jora seleng khoroksa bini thani tubujak kha, bini lakai chisai. 25A lakai su bainani a selengni rang kwrwi, hakhe lakai su baina bagwi bugra hai hwnwi dagi kha, ‘Hik-sa bai tei bebak tong-kwrwi bai baksa nwng phaljak di.’ 26Hakhe a seleng bini bugrani yakungo klaiwi ‘Ano khá lok ja di, ang bebak’-no su-ui rw anw!’ hwnwi koi kha. 27Bugra bono khairokjak kha, hakhe bini lakaino yakarwi bono phiyógwi rohor kha.

28“A seleng tháng khe’-no bo hai tei khoroksa selengno malai kha bini thani a selengni kisa lakai tongo. Bo bono romwi totra sebwi ‘Nini lakaino su-ui pái di!’ hwnwi hwn kha. 29A seleng ha-o klaiwi ‘Ano khá lok ja di, ang su-ui rw bai anw!’ hwnwi koi kha. 30Hai phano bo gosi li ya; tamo khe lakai su bai ya sakni bagwi bono alongo chobwi ton kha. 31Abono nugwi tei selengrok khá hamya wng kha, hakhe bugrani thani thángwi joto kók khupro-ui saui lai kha. 32Hakhe bugra a selengno tubu di hwn kha. Bo hai hwnwi sa kha, ‘Nwng bwswk seleng hamya! Nwng ano koima bai se ang nini bebak lakaino yakaro. 33Ang nono khairokma hai’-no nwngbo a selengno khairokthai klaimani.’ 34Bugra panjalwi jolijak kha, hakhe a selengno bebak lakai su bai ya sak sátokna hwnwi alongo chop kha.”

35Jisu hai hwnwi saui kók mwthak kha, “Tumungno norok jotono norokni takhukno khá bai nakar ya khe chuknohani ani Aphabo norokno omo hai khlainai.”

------------------------------------------------------------------------------------------------------

MATHAI 19

Jisu kak laimani kók samani

(Mar 10.1-12)

1O Kókrokno sa bai kheno Jisu Galilini kutulwi Jordan twimani ayang naro Judia amchoi-o tháng kha. 2Borok kwbángma bini thani phai kha hakhe bo bórokno aro ham rw kha.

3Khoroknwi khoroktham Pharisairok bini thani phaiwi bono khẃi-o kwcha rwna nai kha. “Sak muchung tẃi hikno kagwi mano hwnwi chini Kerongno sa da sa?” hwnwi bórok sẃng kha.

4Jisu hai hwnwi sa kha, “Norok elembago o kókno pori ya kho diba? yaphango Snamnaisa borokno chwla bai bwrwi khe snamwiYap 1.27; 5.2. 5hai hwnwi sa kha, ‘Omoni bagwino borok buma bupha bai kagwi bihik bai thansa wngnai, hakhe a kwnwi kaisa wngnai.’Yap 2.24. 6Aboni bagwino bórok tei kwnwi li ya, kaisa se. Aboni bagwino Kaitor thepamano borok ta swkak thung.”

7Pharisairok bono hai hwnwi sẃng kha, “Hakhe kaksen swi rw khe hikno rohorwi mano hwnwi tamo wngwi Musi hwn sla?”Uái 24.1-4; Mat 5.31.

8Jisu hai hwnwi sa kha, “Norokno phrwngna belai tukma bagwi se Musi norokno hikno kagwi mano hwnwi sa-o. Swngchar snam phuru le omo tẃi kwrwi. 9Hakhe ang norokno o kók sa-o, buitali wng ya phano hikno kagwi tei khoroksa bwrwino na khe a borok lupcha wngo.19.9: Tei kubun kwcham bijabo khe o kókbo dalo phiya a kagwi rohorjaknai bwrwino khoroksa swk káijak khe a borokbo lupcha wngma klai-o. Mat 5.32; 1Ko 7.10-11.

10Bini sagrirok bono hai hwnwi sa kha. “Tumungno bwrwi bai chwla omo hai wng lai khe káijak ya tongma se ham kuk bla.”

11Jisu hai hwnwi sa kha, “O kók jotoni bagwi ya, abono khnana hwnwi Kaitor chongmani bororokni bagwi simi se. 12Baksa bororok tamni bagwi káijagwi man ya aboni juda juda kók tongo; baksa achai phuruni simi gurma wngma bagwi, baksa khe mála khajakma bagwi, baksa ba Kaitorni hani bagwi káijak ya. Omo hai khe tongwi mannairok bórok o kókno khna thung.”

Chwrairokno Jisu hamjakmani

(Mar 10.13-16; Luk 18.15-17)

13Jisu chwrairokni sago yak rwui suri san thung hwnwi baksa borok chwrairokno bini thani tubu kha. Hakhe sagrirok a bororokno ta tubu di hwnwi hwn kha. 14Jisu hai hwnwi sa kha, “Chwrairokno ani thani rohor di, ta kasu di; omo tẃi bororokni bagwino Kaitorni ha.”

15Bo Bórokni sago yak rwui aroni tháng kha.

Rang gwnang sikla khoroksa

(Mar 10.17-31; Luk 18.18-30)

16Salsa borok khoroksa Jisuni thani phai kha. Bo hai hwnwi sẃng kha, “Hodakra, kwthang tong phlaina bagwi ang bubo tẃi samung kaham ma khlaithai klai?”

17Jisu hai hwnwi sa kha, “Nwng tamo wngwi ano kahamni kók sẃng? Khoroksa simi se kaham. Nwng mwthangjakna muchung khe kerong dagimano rákhok di.”

18“Bu kerong dagimano?” hwnwi bo sẃng kha.

Jisu hai hwnwi sa kha, “Borok ta buthar di; buitali-buitala ta wng di, ta khok di; tatal ta sa di;Lam 20.13-16; Uái 5.17-20. 19ma-phano sak nang ya ta wng di; nwng sakno hamjak tẃi’-no buinobo hamjak di.”Lam 20.12; Uái 5.16; Leb 19.18.

20“O kerong dagimarok ang bebak’-no rákhok bai kha. Ang tei tamo khlaithai?” hwnwi a siklasa sẃng kha.

21Jisu bono hai hwnwi sa kha, “Nwng kaham wng sukna hwn khe tháng di, nini tong kwrwi bebak’-no phal baiwi a rangno kwrwirokno rw di, hakhe chuknoha-o nini rang khatijak anw. Omo khlai bai khe ani logi phai di.”

22A siklasa abono khnaui khá thwijagwi tháng kha, bo le snamwi gwnang bla.

23Aphuru Jisu bini sagrirokno hai hwnwi sa kha, “Ang norokno o kók sa-o, gwnangrok Kaitorni ha-o hapnani belai kutuk wngnai. 24Ang norokno o kókbo sa-o, suchi bwlam tẃi mangingang hapna se lai anw ba, Kaitorni ha-o gwnangrok hapnani aswk lai glak.”

25O kók khnaui sagrirok belai uanajagwi “Hakhe sabo mwthangjaknai sla?” hwnwi sẃng kha.

26Jisu borokno naisigwi hai hwnwi sa kha, “O samungno borok khlai man ya; Kaitor le bebak samung’-no khlaiwi mano.”

27Pitor aphuru khe hai hwnwi sacha kha, “Nai di, chwng joto khibi baiwi nini logi phai kha. Chwng tamo mannai sla?”

28Jisu borokno hai hwnwi sa kha, “Ang norokno o kók sa-o, mol kwtalo Borokni Sajla bini chẃngsacha achukthayungo achuk phuru khe norok ani logi phainai chiknwirokbo achukthayungo achugwi Israilni bosong chiknwirokni buj thumnai.Mat 25.31; Luk 22.30. 29Ani bagwi nok huk, takhuk bukhuk, buma bupha, chwrai khonai tei kheto panthor khibinai borok bo abórokno sarani slái kwbáng mannai, mwbo mwthangjak phlainai. 30Hai phano tabukni swkangrok baksa baksa uklogo tong rwk anw, phiya tabukni uklokrok baksa swkang wng anw.”

---------------------------------------------------------------------------------------------------

MATHAI 20

Angur barini tangnairokni rwngthoma

1“Kaitorni ha wng kha omo hai se: angur barini bubagra khoroksa asirisiri’-no bini bari tang rwna hwnwi muni naina tháng kha. 2Bo salo rang khoksa 20.2. rang khoksa; eba denari omo salsa samung tangnaini mula khe rwna hwnwi sa laiwi bórokno bini angur bari tangna rohor kha. 3Bo hai’-no hai phungni diboro bajaro thángwi borok khoroknwi khorokthamno mungsa phano tang yaui bachaui tong laijak nuk kha. 4Hakhe bo bórokno hai hwnwi sa kha, ‘Norokbo thángwi angur bari tangwi di. Ang norokno rang kwbángno rw anw.’ 5Hakhe bórok tháng kha. Bo diborobo teibo muni rohor kha, sarigobo rohor kha. 6Sal tháng twtwi-o bo bajaro thángwi teibo bororok aro bachaui tong laijak nuk kha. ‘Norok tamo wngwi mungsa phano tang yaui oro sal buthar lai kha sla?’ hwnwi bo sẃng kha. 7‘Chwngno khoroksa phano tlangnai kwrwi,’ hwnwi bórok sa kha. Hakhe bo bórokno ‘Norokbo thángwi angur bari tangwi di,’ hwnwi sa kha.

8“Sanja wng kheno bubagra bini borokno hai hwnwi sa kha, ‘Munirokno ring di, bórokno yagulni rang rw di, ulo phainairokno rw graui swkang phainairokno ulo rw di.’Leb 19.13; Uái 24.15. 9Sal tháng twtwi-o tangna phainairok rang nanani phaiwi khoksa khoksa khe rwjak bai kha. 10Hakhe swkang tangna phainairok rang nanani phaiwi chwng rang kwbáng man anw hwnwi khá ka kha; aile bórok suda rang khoksa khoksa khe rwjak kha. 11Bórok rang naui bubagrano jolijagwi hai hwnwi sa lai kha, 12‘Ulo tangna phainairok srapsa se samung tango, chwng le satung kwprabo sapung tangma se nwng bórokno rwma swk’-no chwngnobo rw-o!’ 13Bubagra bórokni bere khoroksano hai hwnwi sa kha, ‘Takhuk nai di, ang nono bandi ya. Nwngba rang khoksa bai’-no sapung tangna gosijak bla! 14Rang naui nogo tháng di. Nono rwma swkno o ulo tangna phainainobo ang rwna khá chongo. 15Ani rangno ang muchung tẃino khlai man ya diba? Ang yak kuar hwnwi da nwng ano músú?’ ”

16Jisu hai hwnwi saui kók mwthak kha, “Uklokrok swkang wng anw, phiya swkangrok uklogo tong rwk anw.”Mat 19.30; Mar 10.31; Luk 13.30.

Bo butharjakna kókno Jisu omo bai khe uáitham samani

(Mar 10.32-34; Luk 18.31-34)

17Jisu Jerusalemo toksaui tháng phuru sagri chiknwirokno simi tlangwi lama-o hai hwnwi sa kha, 18“Khna di, chwng Jerusalemo toksaui thángnai, arono Borokni Sajla ochai okrarok tei Kerong phrwngnairokni yago yapharwi rohorjaknai. Bo ma butharjakna nangnai hwnwi bórok hwnnai, 19hakhe bono buini bororokni yago yapharwi rohornai. Bórok bono mwnwinai, swpraknai, phiya kruso kanta bunai; hai phano salthamni salo bo mwthangwi tisajaknai.”

Bwrwima khoroksa Jisuno koimani

(Mar 10.35-45)

20Sebedaini bihik bwsarokno tẃiwi Jisuni thani phai kha, hakhe bo khulumui “Ano khairok ja di,” hwnwi sa kha.

21“Nwng tamo nai?” hwnwi Jisu bono sẃng kha.

Bo hai hwnwi sa kha, “Nwng bugra wng phuru ani o bwsa khoroknwirokno khoroksano nini yagra, tei khoroksano nini yaksi achuk rw anw hwnwi kók rw di.”

22Jisu hai hwnwi sa kha, “Norok tamo san abo norokno saui man ya. Ang nungna naimano norok nungwi da mano ba?”

“Chwng mano,” hwnwi bórok sa kha.

23Jisu hai hwnwi sa kha, “Ang nungmano’-no norok ma le ma nungnai, hai phano sabono ani yagra achuk rwnai, sabono ba yaksi achuk rwnai abo ang chongwi man ya. Apha chongwi tongmani a bororok se aro achuknai.”

24Tei sagri khorokchirok abono khnaui a takhuknwino jolijak kha. 25Hakhe Jisu bórok bebak’-no bini thani ringwi hai hwnwi sa kha, “Norok saui mano bugrarok bororokno kók khna rwui tono bokhorokrokbo abo hai’-no khlai-o. 26Norokni hwn khe hai ya. Norokni bere kotor wngna sadinai borok bo teirokni seleng ma khatinai.Luk 22.25-26. 27-28Norokni bere bokhorok wngna sadinai borok bo Borokni Sajla hai norokni seleng ma khatinai. Borokni Sajla bui bai naijakna nukjakna phai ya, buino se naina nukna phai-o, hakhe aswk bororokno phiyókna bagwi butharjakna se phai-o.”Mat 23.11; Mar 9.35; Luk 22.26.

Phula khoroknwino Jisu nuk rwmani

(Mar 10.46-52; Luk 18.35-43)

29Bórok Jerikoni tháng phuru luku kwbángma Jisuno rwkthar kha. 30Lama gana achuk laijak phula khoroknwirok Jisuno ayang tẃi lái-o hwnwi khna kheno hai hwnwi chirikhók lai kha, “O Daudni Sajla! Hodasa, chwngno khairok jaba di!”

31Lukurok bórokno “Ta kutuk di,” hwnwi damrok rwrwk bórok teibo sotonwi “O Daudni Sajla! Hodasa, chwngno khairok jaba di!” hwnwi chirikhók rwrwk.

32Jisu bathagwi bórokno phai di hwnwi ring kha. “Norok tamo nai? Ano tamo khlai di hwn? hwnwi bo sẃng kha.

33“Hodasa, chwngno nuk rw ja di,” hwnwi bórok sa kha.

34Jisu bórokno khairokjagwi bórokni mokol tang kha. Logi logi’-no bórok mokol nuk kha, hakhe bini logi tháng kha.

-------------------------------------------------------------------------------------------

MATHAI 21

Kwplai khe Jisu Jerusalemo hap phaimani

(Mar 11.1-11; Luk 19.28-40; Joh 12.12-19)

1Bórok Jerusalemo sók phai twtwi wng khe Tháistwi Hatháini Betphagi-o tháng lai kha. 2Jisu aro sagri khoroknwino hai hwnwi saui rohor gra kha, “Bwskangni u kami-o tháng di. Aro sógwi khe’-no korai chirka bwsa masa buma bai baksa khajak nuk anw. Abórokno khengwi ani thani tubu di. 3Khoroksa swk sẃng khe ‘Hoda omorokno samung nangjago,’ hwnwi sa di. Aboni logi’-no bo rohor anw.”

4A diyari hai hwnwi sa langmani abo nang phaina bagwi se omo wngo,

5“Siyon taunno sa di:

Nahar di, nini bugra nini

thani phai-o bo borok kwchang se,

bo korai chirka-o kajak,

korai chirka bwsa-o kajak.”Sak 9.9.

6A sagrirok swkang baira tháng gra kha, hakhe Jisu khlai di hwnma hai’-no khlai lai kha. 7Bórok a korai chirka bwsano buma bai baksa tubu-ui abórokni saka-o bórokni rí phinwi rw kha, hakhe Jisu kasa kha. 8Luku kwbángma bórokni rí lama-o boui rw lai kha, baksa ba buphang bedekrok tanwi lama-o beraui rw lai kha. 9Jisuni bwskangni bororok bai uklokni bororok hai hwnwi chirikhóksa lai kha, “Daudni Sajlano lob di! Subraini mungwi phainaino Kaitor hamari rw thung; Kaitor lobjak thung!”21.9: Kaitor lobjak thung: Eba Hosana. Lob 118.25-26.

10Jisu Jerusalemo hap kheno taun gwnangwi uphla káphla nang kha, “O borok sabo?” hwnwi bororok sẃng kha.

11“O borok Galilini Nasaretni Jisu diyari,” hwnwi lukurok sa kha.

Noktharo bepar thwngnairokno Jisu rwkhlaimani

(Mar 11.15-19; Luk 19.45-48; Joh 2.13-22)

12Jisu noktharo habwi aroni painairokno phalnairokno bebakno rwkhlai rw bai kha. Bo rang sláinairokni tebul bai pharuk phalnairokni tulrokno philwi rw bai kha, 13hakhe bórokno hai hwnwi sa kha, “ ‘Ani nok suri sanjaknai nok hwnjaknai,’ hwnwi Kaitor samani o kók elembago swijak tongo, yang norok le omono dagait bothop se khlai si-o!”Jis 56.7; Jir 7.11.

14Phularok bai komparok bini thani noktharo phai kha, hakhe bo bórokno ham rw kha. 15Bono uanamasingcha samung khlaima nugwi, phiya “Daudni Bwslano lob di!”21.15: Kaitor lobjak thung: Eba Hosana. hwnwi chwrairokno noktharo chirikhók laima khnaui ochai okrarok tei Kerong phrwngnairok jolijak lai kha.

16“Bórok tamo sa laiwi tong abono nwng khw da khna kha?” hwnwi bórok Jisuno sẃng kha.

Jisu hai hwnwi sa kha, “I’n, khna-o. Norok uáisa phano elembakni o kók pori ya kho diba? ‘Nwng chwrai khonairokno Kaitorno kaham khe lobna phrwng kha.’ ”Lob 8.2.

17Jisu bórok bai kagwi taunni kutulwi Bethania-o tháng kha; horo bo arono tong kha.

Jisu khwichang buphangno swraimani

(Mar 11.12-14,20-24)

18Teini phungo aisirisiri Jisu tauno kiphilwi phai phuru ok khuijak kha. 19Bo lama gana-o khwichang buphang phangsa nugwi aro tháng kha, tamo khe mungsa phano nuk li ya, bwlái simi se. Hakhe bo a khwichang buphangno hai hwnwi hwn kha, “Nwng tei bwthái thái glak!” Logi logi’-no a buphang kóróui tháng kha.

20Sagrirok abono nugwi belai uanajak lai kha. “Tamo khe o khwichang buphang aswk dakti’-no kóróui tháng sla?” hwnwi bórok sẃng kha.

21Jisu hai hwnwi sa kha, “O kókno muitu narwk di, norok udru mudru wng yaui poito khlai khe ang o khwichang buphangno khlaima tẃi’-no norokbo khlai mannai; omo simi ya, norok u hatháino ‘Tháng di, nwng twijlango klai di,’ hwn khe a hatháibo abo hai wngnai.Mat 17.20; 1Ko 13.2. 22Norok poito khlai khe norok suri sanmano’-no mannai.”

Jisuni phanni kók sẃngmani

(Mar 11.27-33; Luk 20.1-8)

23Jisu noktharo kiphilwi phai kha; bo aro phrwngwi tong phuru ochai okrarok bai okra chakrarok bini thani phaiwi hai hwnwi sẃng phai kha, “Nwng bu phan bai omo tẃirokno khlai? Nono sabo o phan rw kha?”

24Jisu bórokno hai hwnwi sa kha, “Angbo norokno kók tháisa sẃngnai. Norok abono sa khe bu phan bai omo tẃirokno khlai angbo norokno sanai. 25Johon baptisma rwmani phan le Kaitorni aroni da, borokni aroni?”

Hakhe bórok kiching bórok hai hwnwi sẃng lai kha, “Chwng tamo sanai? ‘Kaitorni aroni,’ hwnwi sa khebo ‘Norok tamo wngwi hai khe Johonno poito khlai ya sla?’ hwnwi bo chwngno sẃngnai. 26Phiya ‘Borokni aroni’ hwnwi sa khebo bororok chwngno tamo khlai langno abo kiri-o, tamni hwn khe bórok bebak’-no Johonno diyari hwnwi tong lai-o.” 27Aboni bagwino bórok Jisuno “Chwng saui man ya,” hwnwi sa kha.

Bo hai hwnwi sa kha, “Bu phan bai ang omo tẃirokno khlai angbo hai khe norokno sa ya.”

Sajla khoroknwini rwngthoma

28“Tabuk norok tamo hwn sla? Borok khoroksani bwsla khoroknwi tongmani. Bo okrani thani thángwi hai hwnwi saui kha, ‘Aphu, tháng di, tini angur bari tangwi di.’ 29‘I’nhi, ang tang ya,’ hwnwi bo sa kha, ulo khe bo uansuk phirwi angur bari-o tháng kha. 30Hakhe bupha kusuni thani thángwi a kók’-no kók saui kha. ‘Au, tháng anw Apha,’ hwnwi bo sa kha, tamo khe tháng li ya. 31Khoroknwini bere sabo buphani kók khna kha sla?”

“Bwsla okra ta,” hwnwi bórok sa kha.

Jisu bórokno hai hwnwi sa kha, “Ang norokno o kókbo sa-o, teks romnairok bai baliknairok se norokni slái swkang Kaitorni ha-o hap kha. 32Tamni hwn khe baptisma rwnai Johon phaiwi norokno lama soui phunuk kha, hai phano norok bono poito khlai li ya; teks romnairok bai baliknairok se bono poito khlai si-o. Abono nugwi suda se norok uansuk phirwi bono poito khlai li ya.”Luk 3.12; 7.29-30.

Angur barini munirokni rwngthoma

(Mar 12.1-12; Luk 20.9-19)

33Jisu hai hwnwi sa kha, “Tei tháisa rwngthoma khna di. Nokphang khoroksa angur káimani. Bo a angur bari bera dúm bai kha, angur sebna bagwi holongdabo hakhor khur kha, phiya mwrwkna bagwi garing tang kha. Hakhe bo a barino munirokni yago klangwi beraina tháng kha.Jis 5.1-2. 34Angurni jora phuru bini banta angur na rw horna hwnwi bo bini selengrokno a munirokni thani rohor kha. 35Munirok bini selengrokno rom lai kha, khoroksano bu kha, tei khoroksano buthar kha, tei khoroksano holong khitar kha. 36A borok swkangni slái teibo selengrokno rohor khua, hakhe munirok bóroknobo abo hai khlai khua. 37Ulo khe bo bini bwslano rohor kha. ‘Angslano le bórok sak nang ya wng glak,’ hwnwi bo khá ka kha. 38Yang le munirok bini bwslano nuk khe’-no hai hwnwi sa lai kha, ‘Omo nokphangni bwsla se bla. Phai di, chwng bono buthar lai anw, hakhe buphani sompoti chwng man anw!’ 39Hakhe bórok bono romwi bari phataro kariui buthar lai kha.

40“Tabuk, angur barini nokphang phai khe bo a munirokno tamo khlai no?” hwnwi Jisu sẃng kha.

41Borok hai hwnwi sa kha, “Bo a borok hamyarokno kirimasingcha khe butharnai; hakhe angurni jora bini bantano rwnai abo tẃi munirokni yago bo bini bari rw anw.”

42Jisu bórokno hai hwnwi sa kha, “Elembago samani o kókno norok uáisa phano pori ya kho diba?

“ ‘Nok tangnairok samung nang ya hwnwi khibi rwmani holongthai abo’-no wng phai kha nok busuni holongthai

Subrai khlai kha o samungno chwngbo uana kha nugwi abono!’ ”Lob 118.22-23.

43Jisu kók manju-ui hai hwnwi sa kha, “Aboni bagwino ang norokno o kók sa-o, Kaitorni ha norokni yakni tlangjak anw, hakhe bwthái kaham thái rwnai bororokni yago rwjak anw.” 44[O holongthai-o khlainai borok bo phindrik phandrak wngnai; phiya o holongthai khoroksa swkni saka-o klai khe a borok kepeknai.]

45Ochai okrarok bai Pharisairok Jisuni rwngthomarokno khnaui bo bórokni kók se sa-o hwnwi saui man kha. 46Aboni bagwino bórok bono romna nai lai kha, phiya ba lukurok Jisuno diyari hwnma bai bórok kirijak lai kha.

----------------------------------------------------------------------------------------------------

MATHAI 22

Káilai pandani rwngthoma

(Luk 14.15-24)

1Jisu bororokno hai’-no hai rwngthoma bai sa khua. 2“Kaitorni ha wng kha omo hai se: bugra khoroksa bwslano káina hwnwi panda khlai kha. 3Bo bini selengrokno kobokjaknairokno sauina bagwi rohor kha, tamo khe bórok phaina nai li ya. 4Aboni bagwi bo tei selengrokno hai hwnwi kók kwchárwi rohor kha, kobokjaknairokno hai hwnwi sa di, ‘Ani panda tabuk tiyar wng kha; musuk chwlarok bai dega kuphungrokno rathar kha, bebak wng bai kha, kái lai panda-o phai bai si di.’ 5Yang le kái lai panda-o kobokjaknairok khunju se kan li ya gwja! Bórok sak sakni samungo tháng bai kha, khoroksa khe bini kheto, tei khoroksa khe bini phalnogo, 6baksa khe a selengrokno rom kha, hakhe bu-ui buthar bai kha. 7Hakhe bugra belai jolijagwi bini sengkrakrokno rohor kha, a butharnairokno a sengkrakrok butharwi kha, bórokni taunbo sókchaui rw lai kha. 8Hakhe bugra bini selengrokno ringwi hai hwnwi sa kha, ‘Ani kái lai pandani panda tiyar wng bai kha, tamo khe ang kobokma bororok oro phaina chúk ya. 9Tabuk norok lama kotoro tháng di, hakhe borok nukmasingno kobok di.’ 10Hakhe selengrok lama-o thángwi kaham hamya joto borok nukmasing thumwi tubu kha, hakhe kái lai pandani nokni borok kupulung wng kha.

11“Bugra kái lai panda-o phainairokno naina tháng kha, hakhe kái lai pandani rí kanwi phai ya khoroksano nuk kha. 12‘Takhuk, kái lai pandani rí kan yaui bahai khe nwng oro phai lang de?’ hwnwi bugra bono sẃng kha. Hakhe a borok tháisa phano pung li ya. 13Aphuru bugra selengrokno hai hwnwi sa kha, ‘O borokno yakung yak khaui phataro mwnakma-o khiklai rw di. Aro bo ua hului ma kap anw.’ ”Mat 8.12; 25.30; Luk 13.28.

14Jisu hai hwnwi saui kók mwthak kha, “Kobokjaknai le kwbángma, tamo khe chongjaknai se kisa.”

Teksni kók sẃngmani

(Mar 12.13-17; Luk 20.20-26)

15Pharisairok tháng lai kha, hakhe Jisuno kók bai khẃi-o kwcha rwna hwnwi kók chap lai kha. 16Bórok bórokni sagrirokni bere baksano tei Herodni bororokni bere baksano Jisuni thani rohor kha. A rohorjaknairok Jisuno hai hwnwi sa kha, “Hodakra, chwng saui mano nwng kók kubui sa-o. Bororok tamo hwn hwn ya abono uansuk yaui nwng Kaitorni lamani kókno sói khe phrwngo, tamni hwn khe nwng keboni bumukhang naisik ya. 17Chwngno sa di, nwng tamo hwn? Rumni bugra kotorno teks rwmani abo chini Kerong swbaima da klai?” 18Jisu bórokni bwkha sitrano saui manẃi hai hwnwi sa kha, “Phatrarok! Norok tamo wngwi ano khẃi-o kwcha rwna nai lai? 19Teks rwjaknai rangno ano phunuk phai di.”

Hakhe bórok bini thani rang tubu kha.

20“Omo saboni bumukhang? O bumung saboni?” hwnwi bo sẃng kha.

21“Bugra kotorni,” hwnwi bórok sa kha.

Hakhe Jisu bórokno hai hwnwi sa kha, “Hakhe ba bugra kotorni manthaino bono rw di, Kaitorni manthaino Kaitorno rw di.”

22O kókno khnaui bórok uanama chaui bini aroni tháng lai kha.

“Kwthwirok thangwi da bachano?” hwnwi sẃngmani

(Mar 12.18-27; Luk 20.27-40)

23A salono khoroknwi khoroktham Sadukairok Jisuni thani phai kha. (Bórok kwthwirok thangwi bacha ya hwnwi sa lainairok.)Sam 23.8. 24Bórok hai hwnwi sa kha, “Hodakra, Musi hai hwnwi sa lang kha, ‘Khoroksa swk bwsa man ya sini thwiwi tháng khe bini bosongno narwkna bagwi a randijwkno a borokni takhuk nok phirogwi na thung.’Uái 25.5. 25Rom di, oro takhuksnirok tongmani. Okra káijagwi bwsa man ya sini’-no thwi kha, hakhe bini takhuk a randijwkno na kha. 26A takhukbo hai’-kheno thwi kha, tei khoroksabo hai’-kheno thwi kha, hai khe máng a takhuksnirok thwi bai kha. 27Ulo khe a bwrwibo thwi kha. 28Tabuk, kwthwirok thangwi bacha phuru a bwrwi saboni bihik wngna klai? Bórok bebak’-no bono na lai kha.”

29Jisu bórokno hai hwnwi sa kha, “Norok bwswk se cha ya gwja! Norok wng kha elembakni kókbo saui man ya, Kaitorni phanbo saui man ya, aboni bagwi se hai wngo. 30Thangwi bachanairok bórok chuknohani suarirok hai, chwla bwrwi kebo káijak lai ya. 31Tabuk, kwthwirok thangwi bachana kókno ang sa anw Kaitor norokno samani abono pori ya kho diba? Bo hai hwnwi sa kha, 32‘Ang Abrahamni Kaitor, Isakni Kaitor, Jakobni Kaitor,’ O kók wng kha hai, bo kwthangrokni Kaitor se, abo bai’-no borok thwiwi tháng phano kwthang tongo.”Lam 3.6.

33Abono khnaui lukurok bini phrwngmano uanajak bai kha.

Kerongni kók kotor

(Mar 12.28-34; Luk 10.25-28)

34Sadukairokno Jisu khúk muthubwi rw kha hwnwi Pharisairok khnaui kuthum lai kha. 35Hakhe bórokni bere Kerong phrwngnai khoroksa hai hwnwi sẃngwi bono khẃi-o kwcha rwna nai kha,Luk 10.25-28. 36“Hodakra, Kerongno dagimarokni bere bubo kók kotor kuk?”

37Jisu hai hwnwi sa kha, “Nwng nini Kaitor Subraino khá bai khúk bai uansukma bai hamjak súk di.’Uái 6.5. 38Omono nang kukma kók kotor tei puilani dagimung. 39Tei tháisa nangmani kók khe ahai, ‘Nwng sakno hamjak tẃi’-no buinobo hamjak di.’Leb 19.18. 40Musini Kerong tei diyarirok phrwngmarok bebak’-no o kók tháinwio’-no sungchajak.”

Masiani kók

(Mar 12.35-37; Luk 20.41-44)

41Pharisairok kuthum lai khe Jisu bórokno hai hwnwi sẃng kha. 42“Masiani kók le norok tamo hwn sla? Bo saboni bwsa?”

“Bo Daudni bwsa,” hwnwi bórok sa kha.

43Jisu hai hwnwi sa kha, “Hakhe Pholani bising tẃi Daud tamo wngwi bono ‘Subrai’ hwn sla? Tamni hwn ba Daud ahai hwnwi sa lang kha,

44“ ‘Subrai ani Subraino ahai

hwnwi sa kha:

Achuk di oro ani yagra bwkhak khiklai ya sak ang nini

kena arirokno nini yakung yaphango.’Lob 110.1.

45“Hakhe Daud bono ‘Subrai’ hwnwi hwn khe Masia bahai khe Daudni bwsa wngwi man?”

46Khoroksa phano Jisuno kók tháisa phano sa phirwi man li ya. A salni simi tei khoroksa phano Jisuno tháisa phano sẃng rak li ya.

----------------------------------------------------------------------------------------------------

MATHAI 23

Kerong phrwngnairok bai tei Pharisairok bai hus khe tong di

(Mar 12.38-39; Luk 11.43,46; 20.45-46)

1Aphuru Jisu lukurokno tei bini sagrirokno hai hwnwi sa kha, 2“Kerong phrwngnairok bai Pharisairok Musini Kerongno swbai sanani chongjak. 3Aboni bagwino bórok sama tẃi’-no norok khwbo khan di, tobo tong di, hai phano bórok tong tẃi le ta tong di, tamni hwn khe bórok kók sama tẃi tong ya. 4Bórok poja kotor khaui buini phikungo bogwi rw-o, bórok khe abo yasichuk bai suda érwi nai ya. 5Bororokno phunukna bagwi simi se bórok samung khlai-o. Naisik di, bórokni kwpal bai yaktwkrogo Elembakni kók bwswk kotor kotor khe khatrojak! Naisik di, bórokni rí bwswk se liling lala!Mat 6.1; Uái 6.8; Lek 15.38. 6Bórok panda-o achukthai kaham nai-o; thumnogobo buini slái bwskango achukna nai-o; 7bórok hati-haba-o khulumjakna nai-o, bórok ‘Hodakra’ hwnjakna nai-o. 8Hai phano norok ‘Hodakra’ ta hwnjak di, tamni hwn khe norok kiching norok bebak’-no takhuk klai lai-o, khoroksa simi se norokni Hodakra. 9Norok o swngcharo hodarokni bere kebono ‘Apha’ ta hwn di, tamni hwn khe norokni Pha khoroksa se, bo chuknoha-o tongo. 10Norok ‘Bokhorok’ ta hwnjak di, tamni hwn khe norokni bokhorok khoroksa se, bo wng kha Masia. 11Norokni bere kotor hwnjaknai bo norokni seleng ma khatinai.Mat 20.26-27; Mar 9.35; 10.43-44; Luk 22.26. 12Kotor wngna sadinai borok bo kotoi snamjaknai, phiya kotoi wngna sadinai borok bo kotor snamjaknai.”Luk 14.11; 18.14.

Kerong phrwngnairok bai Pharisairokno Jisu majra bermani

(Mar 12.40; Luk 11.39-42,44,52; 20.47)

13“Kerong phrwngnairok bai Pharisairok, phatrarok! Norok bwswk se hamya sitra no! Norok bororokni mokol bwskango chuknohani duglam soui rw-o, norokbo bisingo hap ya, hapna nainairoknobo hap rw ya.

14[“Kerong phrwngnairok bai Pharisairok, phatrarok! Norok bwswk se hamya sitra no! Norok randijwkrokni nok-huk monok baiwi saka saka simi tángma tángsa khe suri sanwi phunugo. Aboni bagwino norok teibo belai khe yagul sujaknai.]

15“Kerong phrwngnairok bai Pharisairok, phatrarok! Norok bwswk se hamya sitra no! Norok khoroksa khoroksano norokni bisingo hap rwna bagwi twi gwnangwi ha gwnangwi beraiwi nai lai-o; khoroksa swkno norokni bisingo hap rwui man khe norokni slái teibo bono morke-o23.15: morke: Grik bai khe Gehenna khiklaijaknai borok snamo

16“Mokol nuk ya lama sonairok, norok bwswk se hamya sitra no! Norok hai hwnwi sa-o, ‘Khoroksa swk noktharni mungwi swmai tang khe mungsa buya, tamo khe noktharni rangchakno romwi swmai tang khe le nango hwno,’ 17Nuk ya siyarok! Rangchak da tor kuk, rangchakno kwthar khlainai nokthar da tor kuk; bubo tor kuk? 18Norok hai hwnwibo sa-o, ‘Khoroksa swk háyáno romwi swmai tang khe mungsa buya, tamo khe a saka bokmanino romwi swmai tang khe le nango hwno.’ 19Norok bwswk nuk ya gwja! Háyá-o bokmani abo da tor kuk, bokmanino kwthar khlainai háyá da tor kuk; bubo tor kuk? 20Hakhe khoroksa háyáno romwi swmai tang khe bo a saka bokmani bebak’-no romma klai-o; 21phiya khoroksa swk noktharno romwi swmai tang khe bo abonobo romma klai-o, aro tongnai Kaitornobo romma klai-o; 22phiya khoroksa swk chuknohani mungwi swmai tang khe bo Kaitorni achukthayungnobo romma klai-o, aro achuknainobo romma klai-o.Jis 66.1; Mat 5.34.

23“Kerong phrwngnairok bai Pharisairok, phatrarok! Norok bwswk se hamya sitra no! Norok Kaitorno banta, khundrupui, jirarokno kaichi-o kaisa rwui tongo, tamo khe ‘Buino sói khe nai di, buino maya chá di, kaham khe tong di,’ hwnwi Kerongo samani omo tẃi nangmani kókrokno le samung nangjak ya. Abo tẃirokno khlaiwi’-no omo hai khe tongthai klai-o.Leb 27.30. 24Mokol nuk ya lama sonairok! Norok twini yóngno khe sakiui khibi-o, tamo khe mangingangno monogo!

25“Kerong phrwngnairok bai Pharisairok, phatrarok! Norok bwswk se hamya sitra no! Norok lota mairangno saka saka simi hu-o, bisingo khe norok segwi tei khámaiwi manmani manwirok máng se kupulung. 26Nuk ya Pharisai! Lota bisingno hu gra di, hakhe sakabo hujaknai.

27“Kerong phrwngnairok bai Pharisairok, phatrarok! Norok bwswk se hamya sitra no! Norok chwndwi phuljak holongdapni mangkhor hai, saka nai khe kaham, bisingo khe bekreng kurung karang tei selengmasingcha máng se.Sam 23.3. 28Omo hai’-no norokbo saka saka kaham, bisingo khe norok sói sumsok gwnang phatra se.”

Kerong phrwngnairok bai Pharisairok yagul sujaknai hwnwi Jisu Samani

(Luk 11.47-51)

29“Kerong phrwngnairok bai Pharisairok, phatrarok! Norok bwswk se hamya sitra no! Norok diyarirokni mangkhor naithok khlai-o, agi phuru kaham khe tongnairokni holong mukumu chithi-o; 30hakhe norok hai hwnwi sa-o, ‘Agi phuru chini chuchusong tongma jora-o chwng tongma te chwng bórok bai baksa diyarirokni thẃi kochok rw glak kha mun.’ 31Hakhe norok a diyarirokno butharnairokni bosong hwnwi gosiui tongo. 32Hakhe tháng di, norokni chuchusong khlai bai lang ya samungno khlai pái di. 33Chibukrok, chibukrokni bwsarok! Norok morke-o khiklaijak glak hwnwi bahai khe uansuk?Mat 3.7; 12.34; Luk 3.7. 34Abo bai’-no ang norokno o kók sa-o, ang norokni thani diyarirokno, elem gwnangrokno, phrwngnairokno rohor anw; bórokni bere baksano norok buthar anw, baksano norok kruso kanta bu anw, baksano norok thumnogo swpragwi o taunni u tauno rwkhlai anw. 35Aboni bagwino bebak borok kahamrokno butharmani aboni majra norokni sago klai anw, Abel borok kahamni simi mareui nokthar bai háyá kwcharo norok butharmani Barakiani bwsla Sakariani jora joto borok kahamrokni thẃi kochok rwmani aboni majra norokni sago klai anw.Yap 4.8; 2Bo 24.20-21. 36Ang norokno sói kókno sa-o, omorokni bebak majra tabukni bororokni sago klai anw.”

Jerusalemno Jisu hamjakmani

(Luk 13.34-35)

37“O Jerusalem, Jerusalem, diyarirokno nwng butharo, nini thani Kaitor bai rohorjaknairokno holong khitaro! Tokma bini bwkrang tola toksarokno koroui tonma hai ang bwswk se nini borokno yak kwbagwi tonna nai kha; nwng abo hai khlai rw li ya. 38Tabuk norokni nok khibijak súk’-anw. 39Ang norokno o kók sa-o, ‘Subraini mungwi phainaino Kaitor hamari rw thung,’ hwnwi sa ya sak norok ano tei nuk glak.”

--------------------------------------------------------------------------------------------------

MATHAI 24

Nokthar swbaijak anw hwnwi Jisu samani

(Mar 13.1-2; Luk 21.5-6)

1Jisu aroni kutulwi noktharni ongkhorwi tháng phuru sagrirok bono noktharni dolan-pakino phunukna bagwi bini thani phai kha. 2Bo hai hwnwi sa kha, “Au, norok omorokno nukma da! Ang norokno o kók sa-o, oro holong saka holong dulsa phano tong glak; joto swbai khibijak anw.”

Mol pái ya sini tamo tamo wngnai

(Mar 13.3-13; Luk 21.7-19)

3Jisu Tháistwi Hathái-o achugwi tong phuru sagrirok tepsa khe bini thani phai kha. Bórok hai hwnwi sẃng kha, “Chwngno sa di, omo hai bu phuru wngnai? Nwng phaina kasu kha, molbo páina kasu kha hwnwi saui manna bagwi bubo tẃi tamo phunukjak granai?”

4Jisu hai hwnwi sa kha, “Hus khe tong di, kebo bai lama ta koró rwjak di, 5tamni hwn khe baksa baksa ani mungwi ‘Angno Masia!’ hwnwi sa phai anw, hakhe baksa baksano lama koró rw anw. 6Norok gana-o chobani khorang khna anw, hakchalo choba nang lai kha hwnwi kók khna anw; hai phano ta uana di. Abo hairok ma wngnai’-no, aphurubo o mol pái ya kho. 7Dopha bai dopha choba wng lai anw, ha bai ha nang lai anw. Kwrẃngsa kwrẃngsa-o asaribo wng anw, banglabo phai anw. 8Omorok bebak’-no bwsa bána phuru bohok sa grama hai se.

9“Aphuru norok romjak anw, sátokjakna bagwi yapharwi rohorjak anw, norok butharjak anw. Bebak borok’-no ani bagwi norokno naisler anw.Mat 10.22. 10Aphuru baksa baksa uslu anw; bo’-bo bono rom rw anw, bo’-bo bono naisler lai anw. 11Aphuru diyari phatrarok kwbángma bachaui baksa baksano lama koró rw anw. 12Hamya báng rwrwkma bai baksa baksani hamjak laima kwma rwrwk anw. 13Tamo khe soiwi man suknai borok bo se mwthangjaknai.Mat 10.22. 14Hakhe Kaitorni hani o Kothoma Kaham swngchar gwnangwi bebak bororokni thani khna rwna bagwi pírjak anw; aphuru khe o mol pái anw.”

Gojob Khlainai Selengmasingcha

(Mar 13.14-23; Luk 21.20-24)

15“Daniel diyari sa langmani a Gojob Khlainai Selengmasingcha norok nok kwtharno bachajak nuk anw.” (Omo tamo hwnmani abo porinaisa saui man thung).Dan 9.27; 11.31; 12.11. 16“Aphuru Judia-o tongnairok hathái bwkhak khárwi tháng thung. 17Nuka24.17: nuka: Kók yaphango ‘núkhúng’. tongnai borok bo bini manwirok nauina hwnwi noksingo ta hap si thung. 18Kheto tongnai borok bo dulai nauina hwnwi kiphilwi ta phai si thung.Luk 17.31. 19A salo sakderiya bai sagwnangmarokni bwswk se birman wng ja no! 20Masing phuru eba Sabat salo khárna nang ya tẃi khe norok Kaitorno suri san di. 21Tamni hwn khe swngchar snam phuruni simi tabuk jora abo hai digi-sigi uáisa phano wng ya kho, abo hai tei w bo wng glak kha.Dan 12.1; Phu 7.14. 22Tamo khe Kaitor a salrokno bara rw kha, wng ya khe khoroksa phano kwthang tong glak kha mun. Hai phano bini chongjak bororokni bagwi Kaitor a salrokno bara rwnai.

23“Aphuru norokno khoroksa swk ‘Iko, nahar di, oro se Masia!’ eba khe ‘Uko, aro se bo! hwnwi sa khe bini kók ta na di. 24Masia phatrarok bai diyari phatrarok bacha anw. Bórok soidom bai uanamasingcha samungrok phunuk anw, wng khe ba Kaitorni chongjak bororokno suda lama koró rw anw. 25Khna di, swkang baira’-no ang norokno o kók sa-o.

26“Hakhe tumungno bororok norokno ‘Iko, nahar di, bo u hasing panthoro se!’ hwnwi sa khe aro ta tháng di; eba khe ‘Nahar di, bo oro bisingo se!’ hwnwi sa khe a kók ta na di. 27Tamni hwn khe salkabaini sal thángbai bwkhak nokha jiliksa khe nokha philikma hai khe se Borokni Sajla phai anw.Luk 17.23-24.

28“Kwthwi tong thani’-no sikruk kuthum anw.Luk 17.37.

Borokni Sajla phainani kók

(Mar 13.24-27; Luk 21.25-28)

29“Aphuruni a digi-sigi pái kheno sal mwnak anw, tal tei chẃng glak, nokhani athukirirok klai anw, nokha gwnangwi jangrijak anw.Jis 13.13; Jol 2.10,31; 3.15; Phu 6.12-13; Esk 32.7; Jis 34.5. 30Aphuru khe Borokni Sajla phaina nai tong kha hwnwi nokha-o sijak anw, aphuru swngcharni bebak bosong kap lai anw, Bórokni Sajlano nokhani chumui-o khe kwplai wngwi belai chẃngsacha khe phaima nuk anw.Dan 7.13; Phu 1.7. 31Totro kotor sotonwi pung anw, hakhe bo bini suarirokno haktorni babai brwi-o rohor anw, bórok bini chongjak bororokno haktorni yaphang buchukni thum phai anw.”

Khwichang buphang bai phrwngmani

(Mar 13.28-31; Luk 21.29-33)

32“Norok khwichang buphangno naisigwi srwng di. Bini bedek khrangsaui bwlái rotomwi phai phuru tangbla sampha kha hwnwi norok saui mano. 33Omo hai kheno norok omorok bebakno nuk phuru mol sampha kha hwnwi khá ka di, sók phai se tong kha hwnwi khá ka di. 34O kókno muitu narwk di, o molni bororok thwi bai ya sini’-no omorok bebak’-no wng anw. 35Ha bai nokha se kwma anw ba, ani kókrok kwma glak.”

A sal bu phuru phai no abo kebo saui man ya

(Mar 13.32-37; Luk 17.26-30,34-36)

36“A sal bai a jora bu phuru phai no abo kebo saui man ya; chuknohani suarirok buya, Sajla buya; Apha simi se abo saui mano. 37Borokni Sajla phai phuru khe Noani phuru wngma hai se wng anw.Yap 6.5-8. 38Twi tor ya sini wng laima hai, Noa rungtoro kasa ya sini bororok chá lai-o nung lai-o; 39hai phano twi torwi bórokno bebakno kochok rw ya sini tamo wngna naiwi tong kha abono bórok saui man ya. Borokni Sajla phai phurubo abo hai’-no wngnai.Yap 7.6-24. 40Aphuru borok khoroknwi kheto samung tang laiwi tong khe khoroksa tlangjak anw, tei khoroksa klangjak anw. 41Bwrwi khoroknwi mai súk lai tong khe khoroksa tlangjak anw, tei khoroksa klangjak anw. 42Hakhe hus khe tong di, tamni hwn khe norokni Subrai bu phuru phai no abo norok saui man ya. 43O kókno muitu narwk di, sikhok bu phuru hap phai no abo nokphang saui man khe bo sichaui tongwi nogo sikhokno hap rw glak. 44Hakhe aboni bagwino norok tiyar khe ma tongthai, tamni hwn khe phai glak hwnwi tong phuru’-no Borokni Sajla phai anw.”Luk 12.39-40.

Sabo seleng kaham

(Luk 12.41-48)

45“Hakhe sabo seleng kaham? Sabo khá sinai seleng sla? Bo wng kha omo tẃi: Nokphang khoroksa tei selengrokno sal brúm brúm chá rwna bagwi bini seleng khoroksano barja berwi rw kha. 46Nogo kiphil phuru nokphang a selengno omo hai samung khlaijak nuk phai khe a seleng hamchanai. 47Ang norokno sói kókno sa-o, ahai khe a nokphang a selengno bini bebak sompotini barja snam anw. 48Phiya bo tumungno seleng hamya wng khe bo khá bising bising ‘Ani nokphang phaina ler anw,’ hwnwi uansuknai, 49hakhe bo tei selengrokno bunai-toknai phiya phekplairok bai chánai nungnai. 50Hakhe phai glak hwnwi tongmani salono, bo saui man slap ya sini bini nokphang phainai. 51Hakhe nokphang bono kochok nwi khe tan phainai, phatrarok bai baksa’-no bonobo ton anw. Bo aro ua hului ma kap anw.”

--------------------------------------------------------------------------------------------------

MATHAI 25

Bwrwi sikla-kwthar khorokchirokni rwngthoma

1“A salo Kaitorni ha omo hai se wngnai. Bwrwi sikla-kwthar khorokchirok tongmani. Bórok chati tẃi lai káijaknaisano lamjakna tháng lai kha.Luk 12.35. 2Bórokni bere khorokba khe khá si ya, tei khorokba khe khá sinai. 3Khá siyarok khe chati le tẃi kha, thok bára khe, tẃi li ya. 4Phiya a khá sinairok khe chatini logi thok bára tẃi kha. 5Káijaknaisa phaina lerwi tongma bai a bwrwirok murumu te murumu te lipsa khe muktrwi tháng lai kha.

6“Hor diboro khe ‘Iko, káijaknai sa phai sók phai kha! Lamjak phai bai di!’ hwnwi chirikhók lai kha. 7Bwrwi sikla-kwthar khorokchirok sichaui bórokni chati dosi socha lai kha. 8Aphuru khá siyarok khá sinairokni thani ‘Chini chati thwina naiwi tong kha, chwngno kisa norokni thok rw gra di,’ hwnwi sa kha. 9Khá sinairok hai hwnwi sa kha, ‘I’nhi, wng glak; norokno rw khe chini wng glak. Tháng di, phalnogo thángwi paiwi nai di.’ 10Hakhe a khá si ya bwrwirok thok pai laina hwnwi tháng lai kha. Bórok tháng lai kheno káijaknaisa phaiwi sók phai kha aphuru a tiyar tongnai bwrwi khorokba káijaknaisa bai baksa kái lai panda-o habwi tháng lai kha, hakhe duglam soui rwjak kha.

11“Ulo khe tei bwrwi sikla-kwtharrok phai sók phaiwi hai hwnwi sa kha, ‘Takhuk, takhuk! Duglam phiyok di!’ 12‘Ang norokno si se sini ya,’ hwnwi a káijaknaisa sa kha.”Luk 13.25.

13Jisu hai hwnwi saui kók mwthak kha, “Aboni bagwino hus khe tong di, Borokni Sajla bu salo phaino, bu jora phaino, abono norok saui man ya.”

Seleng khorokthamni rwngthoma

(Luk 19.11-27)

14“Aphuru omo hai se wngnai, borok khoroksa beraina thángnanogo bini selengrokno ringwi bini sompotini barja berwi klang kha. 15Bo jotono’-no yak chúk tẃi rwui klang kha, bo khoroksano rang khok basai,25.15: khok basai: eba talen kaiba,abo nokha bisi chibani samung tangmani mulani slái kwbang tei khoroksano nwisai, tei khoroksano sasai rwui klang kha. Hakhe bo ongkhorwi tháng kha. 16A rang khók basai mannai seleng logi logi’-no thángwi bepar thwngwi tei rang basai aji kha. 17Abo hai kheno a rang nwisai mannai seleng bo’-bo tei rang nwisai aji kha. 18A sasai mannai seleng khe thángwi hakhor khurwi bini nokphangni rangno phobwi tonwi kha.

19“Akhini’-no balogwi tongwi a selengrokni nokphang kiphilwi phaiwi bórok bai rang isap khlai lai kha. 20A rang basai mannai seleng phaiwi tei rang khók basai yapharwi hai hwnwi sa phai kha, ‘Nokphangsa, nwng ano rang khók basai klangmani. Iko, na di, ang ajimani tei rang basai.’ 21Nokphang hai hwnwi sa kha, ‘Kahamno khlai kha, nwng kók khnanai seleng kaham. Nwng kisa bai se kaham, aboni bagwino ang nono kwbángmani barja ber anw. Phai di, ang bai baksa tongthok phai di.’

22“Hakhe a rang nwisai mannai seleng phaiwi hai hwnwi sa phai kha, ‘Nokphangsa, nwng ano rang khóknwisai klangmani. Iko, na di, ang ajimani tei rang khók nwisai.’ 23Nokphang hai hwnwi sa kha, ‘Kaham’-no khlai kha, nwng kók khnanai seleng kaham. Nwng kisa bai se kaham, aboni bagwino ang nono kwbángmani barja ber anw. Phai di, ang bai baksa tongthok phai di.’ 24Hakhe a rang sasai mannai seleng phaiwi hai hwnwi sa phai kha, ‘Nokphangsa, ang saui mano nwng maya kwrwi borok, nwng káima kwrwi-o suda raui-o, nwng sarma kwrwi-obo thumo. 25Ang kirima bai thángwi nini rangno phobwi tonwi kha. Iko, na di, nini rang.’ 26Nokphang hai hwnwi sa kha, ‘Nwng seleng hamya, seler! Ang káima kwrwi-o suda raui-o, sarma kwrwi-obo thumo hwnwi nwng saui mano, hai da? 27Hakhe ba nwng buino phano ani rangno lakai rwthai klaimani, hakhe ang kiphilwi bwsa bai buma bai man phai kha mun. 28Tabuk, bini yakni a rangno naui a rang chisai gwnangno rw di. 29Tamni hwn khe gwnangno teibo rwjak anw, hakhe bo teibo kwbángma man anw; phiya ba, kwrwini khe kisa tongma suda bini yakni najak anw.Mat 13.12; Mar 4.25; Luk 8.18. 30A seleng bakuano khe phataro mwnakma-o khiklai rw di; aro bo ua hului ma kap anw.’ ”Mat 8.12; 22.13; Luk 13.28.

Buj kotor

31“Borokni Sajla bugra wngwi bebak suarirok bai phai phuru bo bini achukthayung kwchẃngo achuknai,Mat 16.27; 19.28. 32hakhe swngcharni bebak borok bini bwskango thumjaknai. Bo bororokno mera mwrwknai merano pun bai swkagwi tubuma hai khaknwi khe swkaknai. 33Bo merarokno khe bini yagra bwkhak tei punrok khe bini yaksi bwkhak tonnai. 34Aphuru bugra bini yagra bwkhakni bororokno hai hwnwi sanai, ‘Apha bai hamcha rwjaknairok, norok phai di! Swngchar snamjak phuruni simi norokni bagwi tiyar khlai tonmani a ha bantano na phai bai si di. 35Ang ok khui phuru norok ano chá rw kha; ang twi kang phuru norok ano khan kha; ano sini ya phano norok ano nogo kasa rw kha; 36ang rí kwrwi phuru norok rí kan rw kha; ang hamya klai phuru norok nai kha, alongo klai phurubo norok nai phai kha.’ 37A kahamrok bono aphuru hai hwnwi sa phir anw, ‘Subrai, nwng ok khuima nugwi bu phuru chwng nono ma chá rw lang? Twi kangma nugwi bu phuru ma khan lang? 38Nono sini ya nugwi bu phuru chwng nono nogo ma kasa rw lang? Rí kwrwi nugwi bu phuru rí ma kan rw lang? 39Nono hamya klaima nugwi eba alongo klaima nugwi bu phuru ma nai lang?’ 40Bugra hai hwnwi sa phir anw, ‘Ang norokno sói kókno sa-o, ani o takhukrokni bere kusu khoroksano phano norok abo tẃi khlai kha hwn khe abo ano’-no khlaima klai-o.’

41“Hakhe bo yaksi bwkhakni bororokno hai hwnwi sa anw, ‘Ani bwskangni tháng di, Kaitor bai swraijaknairok! Soitan bai bini suarirokni bagwi snammani a thwi phlai ya hórni kundulo tháng di. 42Ang ok khuiwi tong phuru norok ano chá rw li ya, twi kangwi tong phuru norok ano khan li ya; 43ano sini ya hwnwi norok nogo kasa rw li ya; rí kwrwi phuru rí kan rw li ya; ang hamya klai tong phuru alongo klai tong phuru norok ano nai li ya.’ 44Aphuru khe bórok bono hai hwnwi sa phir anw, ‘Subrai, bu phuru nono ok khuijak nugwi, twi kangjak nugwi, sini ya nugwi, rí kwrwi nugwi, hamya klaijak nugwi, alongo klaijak nugwi chwng nono chuba ya wng lang?’ 45Hakhe bugra bórokno hai hwnwi sa phir anw, ‘Ang norokno sói kókno sa-o, norok omorokni bere kusu khoroksano phano chuba ya hwn khe abo ano’-no chuba ya wngma klai-o.’ 46Hakhe mol brúm brúm sátokjakna bagwi omorok rohorjak anw, kahamrok khe thangwi kwthang tong phlai anw.”

------------------------------------------------------------------------------------------------

MATHAI 26

Jisuno butharna kók chap laimani

(Mar 14.1-2; Luk 22.1-2; Joh 11.45-53)

1Omo tẃi kókrokno phrwngwi pái khe Jisu bini sagrirokno hai hwnwi sa kha, 2“Norok saui mano tei salnwi tong kheno Yókma Ter wngnai, hakhe Borokni Sajla kruso kanta bujakna bagwi yapharwi rohorjaknai.”Lam 12.1-27.

3Aphuru ochai okrarok Judai okra chakrarok bai ochai bokhorok Kaiaphani nogo kuthum lai kha, 4hakhe Jisuno tepsa khe romwi butharna hwnwi kók chap lai kha. 5“Chwng bono o terni bisingo romna kók kwrwi, wng ya khe bororok udru mudru phnangnai se,” hwnwi bórok sa lai kha.

Jisu Bethania-o thok motom phuljakmani

(Mar 14.3-9; Joh 12.1-8)

6Jisu Bethaniani biyadi chájak Simonni nogo tong phuru 7bwrwi khoroksa holong kuphurni sisi-o khe morokma thok motom tubu-ui bini thani phai kha. Hakhe Jisu cháui tong phuru bo a thokno bini bokhorogo luproui rw kha.Luk 7.37-38. 8Sagrirok abono nugwi jolijagwi hai hwnwi sa kha, “Omono tamo wngwi ahai’-no khibi lang? 9O thok motomno phalwi rang kwbángma man kha mun bla, hakhe a rangno kwrwirokno rwui man kha mun!”

10Bórok sa laimano Jisu saui manẃi bórokno hai hwnwi sa kha, “Norok tamo wngwi o bwrwimano tekto rw? Ani bagwi bo samung kaham’-no khlai kha. 11Kwrwirok ba norok bai máng tong bla, ang le norok bai máng tong glak.Uái 15.11. 12Bo ano khlaimani abo ano phobna tiyar khlaina bagwi se ani bwsago thok motom luproui rw-o. 13Hakhe o kókno muitu narwk di, swngchar gwnangwi o Kothoma Kaham pírjak thani’-no bono muitu khlaiwi bo o samung khlaimano sajaknai.”

Juda Jisuno rom rwna gosimani

(Mar 14.10-11; Luk 22.3-6)

14Hakhe sagri chiknwirokni bere khoroksa ochai okrarokni aro tháng kha, a sagri wng kha Judas Iskariot. 15Bo hai hwnwi sa kha, “Ang Jisuno norokni yago yapharwi rohor khe norok ano tamo rwnai?” Bórok rukphaini rang khok kwthamchi lekhaui bono yapharwi rw kha. 16Aphuruni simi khe Judas Jisuno rom rwui rohornani lama máng rutugwi tong kha.

Jisu bini sagrirok bai Yókma Terni panda chá laimani

(Mar 14.12-21; Luk 22.7-14,21-23; Joh 13.21-30)

17Auang bángla terni puilani salo bini sagrirok Jisuni thani phaiwi hai hwnwi sẃng phai kha, “Chwngno buro nini bagwi Yókma terni panda khlai di hwn sla?” 18Bo bórokno hai hwnwi sa kha, “Tauno borok khoroksani aro thángwi bono hai hwnwi sa di, ‘Ani jora sók phai kha; ang bai ani sagrirok nini nogo Yókma terni panda khlai phai anw, hwnwi Hodakra saui rohoro.’ ”

19Jisu saui rohorma hai’-no sagrirok Yókma terni panda khlai kha.

20Sanja wng kheno Jisu sagri chiknwirok bai chána achuk lai kha. 21Cháui tong lai phuru Jisu hai hwnwi sa kha, “Ang norokno o kók sa-o, norokni bere khoroksa ano rom rwnai.”

22Sagrirok belai khá hamya wngwi khoroksa khoroksa khe “Subrai, abo ang ya na bla?” hwnwi bono sẃng lai kha.

23Jisu hai hwnwi sa kha, “Ano rom rwnai borok bo mairango ang bai baksa ruti chomsanai.Lob 41.9. 24Elembago sama hai’-no Borokni Sajla ma thwinai, Tamo khe Borokni Sajlano rom rwnai a borok bwswk se hamya sitrano! Achai ya khe se bo ham kuk kha mun!”

25Hakhe a rom rwnai Judas hai hwnwi sẃngcha kha, “Hodakra,26.25: Hodakra: eba Rabbi abo ang ya na bla?”

“Nwng’-no sa kha bla,” hwnwi Jisu sa kha.

Subraini panda

(Mar 14.22-26; Luk 22.15-20; 1Ko 11.23-25)

26Bórok chá lai tong phuru Jisu ruti naui Kaitorno hambai rw kha, hakhe abono swkagwi sagrirokno rw kha. “Hi’n, na di, omono chá di. Omo ani bahan,” hwnwi bo sa kha.

27Hakhe bo khuri naui Kaitorno hambai rw kha, hakhe bórokno abo yapharwi hai hwnwi sa kha, 28“Norok bebak’-no omono nung di. Omo wng kha aswk bororokni sumsok nakarna bagwi kochok rwmani ani thẃi, Kaitor ani o thẃi bai swmai tang kha.Lam 24.8; Jir 31.31-34. 29Ang norokno o kók sa-o, ang norok bai baksa Aphani ha-o angur bwtwi kwtal nung ya sak ang tei o bwtwi nung glak.”

30Hakhe bórok rwchapmung tángsa rwchap laiwi Tháistwi hathái-o tháng lai kha.

Pitor gosi glak hwnwi Jisu samani

(Mar 14.27-31; Luk 22.31-34; Joh 13.36-38)

31Hakhe Jisu bórokno hai hwnwi sa kha, “Tini horo’-no norok bebak’-no ano khibiui khár bainai, tamni hwn khe elembago ahai hwnwi sa-o, ‘Kaitor mera mwrwknaino butharnai, hakhe gutni merarok piring-poroi wng bainai.’Sak 13.7. 32Tamo khe ang mwthangwi tisajak baiwi norokni slái swkang Galili-o tháng anw.”Mat 28.16.

33Pitor Jisuno hai hwnwi sacha kha, “Bui bebak khibiui tháng phano ang le nono khibiui tháng glak!”

34Jisu Pitorno hai hwnwi sa kha, “O kókno muitu narwk di, tini horo’-no tokla kokchik ya sini nwng ano sini ya hwnwi uáitham sa anw.”

35“Nwng bai baksa butharjakna se gosi anw ba, nono sini ya hwnwi le ang sa se sa glak ta!” hwnwi Pitor sa kha.

Bebak sagrirokbo a kók’-no kók sa kha.

Getsimani-o Jisu suri sanmani

(Mar 14.32-42; Luk 22.39-46)

36Hakhe Jisu bini sagrirok bai Getsimani hwnwi kwrẃngsa-o thángwi bórokno hai hwnwi sa kha, “Ang uro thángwi suri san bai ya sak norok oro achugwi tong lai di.” 37Bo bini logi Pitor bai Sebedaini bwsla khoroknwino tlang kha. Bo khábo khákhamjak kha, ámang-chímangbo wng kha, 38hakhe bo bórokno hai hwnwi sa kha, “Ang belai khe khákham kha, abo thwi phano pok glak. Oro tong di, ang bai baksa sichaui tong di.”

39Bo tei kisa bwskango thángwi ha-o bomkhlai hai hwnwi suri san kha, “Apha, man khe ba o khurino ani oroni nor di, omobo ani muchung tẃi ya, nini muchung tẃi’-no wng thung.”

40Hakhe bo sagri khorokthamni aro kiphilwi phaiwi bórokno muktrwi thángjak nuk phai kha. Bo Pitorno hai hwnwi sa kha, “Bahai khe norok ang bai baksa damsa phano sichaui tongwi man ya wng? 41Sichaui tong di, belokjak ya tẃi khe suri sanwi tong di. Bwkha le kwrakno, bwsak se kebel.”

42Jisu omo bai khe uáinwi thángwi hai hwnwi suri san kha, “Apha, ang nung ya wngwi o khurino norwi man ya khe nini muchung tẃi’-no wng thung.” 43Bo hai’-no hai kiphilwi phaiwi bini sagrirokno muktrwi thángjak nuk phai khua; bórok mokol phiyogwi tongwi man li ya.

44Jisu tei uáisa bórokno klangwi omo bai khe uáitham a kók’-no kók saui suri san kha. 45Hakhe bo sagrirokni thani kiphilwi phaiwi hai hwnwi sa kha, “Norok tabuk phano muktrwi thángwi lenglaui tong kho, hai da? Nai di, Borokni Sajla sumsok gwnangrokni yago yapharwi rohorjakna jora sók phai kha. 46Bacha di, him di tho. Iko, nahar di, ano rom rwnaino!”

Jisuno rommani

(Mar 14.43-50; Luk 22.47-53; Joh 18.3-12)

47Jisu kók saui tong phuru Judas aro sók phai kha, sagri chiknwirokni bere bo’-bo khoroksa. Bini logi borok kwbángma seng bai tokphung tẃi laijak, bórok ochai okrarok tei Judai okra chakrarok bai rohorjakmani. 48A rom rwnaisa a bororokno hai hwnwi phrwngwi tubu kha, “Ang motom sumani abono a borok. Bono rom di!”

49Juda aro sók phai kheno Jisuni thani tháng kha, hakhe “Hodakra, khulum kha,” hwnwi saui bono motom su-ui kha.

50“Takhuk, khlaina khe dakti khlai di,” hwnwi Jisu sa kha.

Hakhe bórok phaiwi Jisuno romwi kha lai kha. 51Jisuni logini khoroksa bini seng sotroui ochai bokhorokni seleng khoroksani khunju tankhlai rw kha. 52Hakhe Jisu bono hai hwnwi sa kha, “Nini sengno daui ton phi di, tamni hwn khe seng tẃinai seng bai’-no thwinai. 53Norok saui man ya da, ang Aphani thani san khe bo logi logi’-no suari sengkrakrok chiknwino rohor glak kha mun diba? 54Omo tẃi hwn khe Elembago omo hai ma se ma wngnai hwnwi samani abo bahai khe nang phainai sla?”

55Aphuru Jisu bororokno hai hwnwi sa kha, “Ang ba dagait da, sengrok tokphungrok bai khe norok ano romna phai ba? Ang sal brúm brúm noktharo achugwi phrwngo, aphuru norok ano rom ya.Luk 19.47; 21.37. 56Tamo khe diyarirok elembago swi langmani abo nang phaina bagwi se omorok wngo.”

Aphuru bebak sagrirok bono khibiui khár bai kha.

Kaunsil bwskango Jisu

(Mar 14.53-65; Luk 22.54-55,63-71; Joh 18.13-14,19-24)

57Jisuno romnairok bono ochai bokhorok Kaiaphani nogo tlang kha, aro Kerong phrwngnairok tei okra chakrarok kuthum lai kha. 58Pitor hakchalo tongwi ochai bokhorokni nokhla jora bono rwkthar kha. Omo ulo tamo wngno abo naina bagwi bo nokhla-o thángwi sebukrok bai baksa achugwi kha. 59Ochai bokhorok bai bebak kaunsil Jisuno butharna bagwi sakki tatal rutuk lai kha. 60Borok kwbángma bachaui bini mungwi tatal sa phano bórok bini majra mungsa phano phunugui man li ya. Ulo khe borok khoroknwi bwskango thángwi 61hai hwnwi sa kha, “Ang Kaitorni noktharno swbaiwi salthamni salo abono tisaui man phiro, hwnwi o borok sa kha.”Joh 2.19.

62Ochai bokhorok bachaui Jisuno hai hwnwi sa kha, “Nini tháisa phano kók sana kwrwi da? O bororok nini mungwi majra bermani abo tamo?” 63Hai phano Jisu siring siring khe tong kha. Ochai bokhorok hai’-no hai bono hai hwnwi sẃng kha, “Kaitor kwthangni mungwi nwng chwngno swmai tangwi sa di: Nwng Kaitorni Sajla a Masia da?”

64Jisu hai hwnwi sa kha, “Abo nwng’-no saui tong kha bla. Tamo khe ang norokno o kók sa-o, tabukni simi norok Borokni Sajlano Kwplaisa Kaitorni yagra bwkhak achukjak nuk anw, phiya nokhani chumui-o khe phaima nuk anw.”Dan 7.13.

65Hai kheno ochai bokhorok bini rí sichigwi hai hwnwi sa kha, “Bo Kaitorno hamya sa kha! Chini tei tamo sakkini samung nang si? Tabuk’-no bo Kaitorno hamya samano norok khna bai kha. 66Tamo hwn bai?”

“Bo majra gwnang, hakhe butharjakna nangnai,” hwnwi bórok sa bai kha.Leb 24.16.

67-68Hakhe bórok bini mwkhango khuktwi musu lai kha, bubo bu lai kha; baksa bono thapra rwui “O Masia, nono sabo bu sa di,” hwnwi hwn lai kha.Jis 50.6.

Pitor Jisuno gosi ya wngmani

(Mar 14.66-72; Luk 22.56-62; Joh 18.15-18,25-27)

69Pitor nokhla-o achugwi tongmani. Aphuru ochai bokhorokni selengjwk khoroksa bini thani phaiwi “Nwng’-bo Galilini Jisuni logini borokno,” hwnwi hwn kha.

70Hakhe bo bórok bebakni bwskango o kókno gosi li ya. “Nwng tamni kók sa abo ang saui man ya,” hwnwi bo sa kha, 71hakhe nokhlani duglam phaising tháng kha. Tei khoroksa selengjwk bono nugwi aro tongnairokno “O borok Nasaretni Jisuni logi tongo,” hwnwi sa kha.

72Pitor hai’-no hai o kókno gosi yaui “Ang swmai tangwi sa-o, ang a borokno sini ya!” hwnwi sa kha.

73Srapsa tong kha hwn kheno aro bachaui tong lainairok Pitorni thani phaiwi hai hwnwi sa phai kha, “Sói’-no nwngbo bórokni bere khoroksa, nini kók sama bai’-no nono romwi mano!”

74Hakhe Pitor swmai tangwi hai hwnwi sa kha, “Ang kubui sa ya khe Kaitor ano swrai thung! Ang a borokno sini ya!”

Aphuru kheno tokla kokchik kha, 75hakhe “Tokla kokchik ya sini nwng ano sini ya hwnwi uáitham sa anw,” hwnwi Jisu bono samani kókno Pitor muitu manjak kha. Hakhe bo phataro thángwi swlwgwi kap kha.

-----------------------------------------------------------------------------------------------

MATHAI 27

Jisuno Pilatni thani tlangmani

(Mar 15.1; Luk 23.1-2; Joh 18.28-32)

1Phung aisirisiri bebak ochai okrarok tei Judai okra chakrarok Jisuno butharna hwnwi kók chap lai kha. 2Bórok bono khaui tlangwi Rumni gobornor Pilatni yago yapharwi rw kha.

Judas thwimani

(Sam 1.18-19)

3Jisu butharjakna nangnai hwnwi saui man khe’-no Jisuno rom rwnai a Judas khá yokjak kha, hakhe ochai okrarok bai okra chakrarokni yago a rang khókthamchino kiphilwi rwui 4hai hwnwi sa kha, “Borok kahamno butharna hwnwi rom rwui rohorwi ang sumsok khlai kha.”

“Abo chini ba tamo? Nini samung se abo!” hwnwi bórok sa kha.

5Judas a rangno noktharo sarwi klang kha, hakhe thángwi kotok sorwi thwi kha.

6Ochai okrarok a rangno khochaui naui hai hwnwi sa kha, “O rang borok butharnai rang se, o rangno noktharni swndwgo ton khe abo chini Kerong swbaima klai-o.” 7Bórok sa lai pái khe buini bororokno phobna bagwi a rang bai twk taknaini chara pai kha. 8Aboni bagwino a chara tabuk suda “Thẃini chara” hwnjago.Sam 1.18-19.

9Omo tẃi khe Jirimia diyari hai hwnwi sa langmani abo nang phai kha, “Israilrok bini bagwi rwna hwnwi gosimani a rang khok kwthamchino naui 10Subrai ano sama bai’-no bórok twk taknaini chara pai kha.”Sak 11.12-13.

Pilat Jisuno sẃng phenekmani

(Mar 15.2-5; Luk 23.3-5; Joh 18.33-38)

11Jisu gobornorni bwskango bachaui kha. Gobornor bono hai hwnwi sẃng kha, “Nwng Judairokni bugra da?”

“Nwng’-no o kók saui tong kha bla,” hwnwi Jisu sa kha. 12Ochai okrarok bai okra chakrarok bini mungwi majra bermani abono bo tháisa phano sa li ya.

13Hakhe Pilat bono hai hwnwi sẃng kha, “Bórok nini mungwi aswk majra bermarokno nwng khna ya diba?”

14Hai phano Jisu kók tháisa phano sana nai li ya; aboni bagwi gobornor belai khe uanajak kha.

Jisuno butharna dagimani

(Mar 15.6-15; Luk 23.13-25; Joh 18.39—19.16)

15Yókma Ter brúm brúm gobornor luku sanmani borokno alongni phiyók phiyógwi rohoro. 16Aphuru joto bai borok hamya hwnwi sinijak borok khoroksa alongo chopjak tongo, bini bumung Jisu Baraba. 17Hakhe bororok kuthum lai khe Pilat bórokno hai hwnwi sẃng kha, “Sabono norok phiyók di hwn? Jisu Barabano da, eba Khristo hwnjaknai Jisuno da?” 18Músúmani bai se bórok Jisuno yapharwi rohoro Pilat abono kaham khe saui mano.

19Pilat buj thumjaknai nogo achugwi tong phuru bihik bono hai hwnwi kók kwchárwi rohor kha, “A borok kahamno mungsa phano ta khlai di, tini horo imango ang a borokno tẃiwi belai tekto man kha.”

20Ochai okrarok bai okra chakrarok lukuno hai hwnwi toksaui rw kha, “Pilatno sa di, Barabano phiyógwi rw di, Jisuno buthar di.” 21Phiya gobornor bórokno hai hwnwi sẃng kha, “O khoroknwini bere sabono norok phiyók di hwn?”

“Barabano phiyók di!” hwnwi bórok sa kha.

22“Khristo hwnjaknai Jisuno le ang tamo khlainai sla?” hwnwi Pilat bórokno sẃng kha.

“Bono krus kanta bu di!” hwnwi bórok bebak’-no sa bai kha.

23“Bo tamo samung hamya tang kha ba?” hwnwi Pilat sẃng kha.

Hakhe bórok teibo chirik laiwi “Bono kruso kanta bu di!” hwnwi hwn lai kha.

24Pilat nai ba abo mungsa se dalo klai ya, phiya ba teibo se uru-muru nang thotok. Abono nugwi bo twi na kha, hakhe luku bwskango yak súwi hai hwnwi sa kha, “O borok butharjak thani ang gwda gormo kwrwi! Abo norokni samung se.”Uái 21.6-9.

25Bebak lukurok hai hwnwi sa kha, “Bono butharmani bati chini sago nang thung, chini bwsa-bẃtẃirokni sagobo nang thung!”

26Aphuru Pilat bórokni thani Barabano phiyógwi rw kha; bo Jisuno swprak rwui kruso kanta buna bagwi yapharwi rohor kha.

Sengkrakrok Jisuno yasek khusek khe thwng laimani

(Mar 15.16-20; Joh 19.2-3)

27Aphuru Pilatni sengkrakrok Jisuno gobornorni noyungo tlang kha, hakhe bebak sengkrakrok bono chorsa khe kuthum lai kha. 28Bórok bini ríno khengwi rí kochual kangsa kan rwui rw lai kha. 29Bórok busuni motok rabwi bini bokhorogo thubui rw kha, bini yagra yago raidang kongsa rw kha, hakhe bórok bini bwskango yáskú sungwi “Judairokni bugra, jinabad!” hwnwi mwnwi lai kha. 30Bórok bono khuktwi musu lai kha, hakhe a raidangno naui bini bokhorogo bu lai kha. 31Bórok bono yasek khusek khe thwng lai pái khe a rí kochualno khengwi bini ríno kan rwui rw phi kha, hakhe kruso kanta buna hwnwi bórok bono tlang kha.

Jisuno kruso kanta bumani

(Mar 15.21-32; Luk 23.26-43; Joh 19.17-27)

32Bórok ongkhor laiwi tháng phuru Kurinini Simon hwnwi borok khoroksano nuk kha, bórok bono Jisuni krusno juraboli khe bal rw kha. 33Bórok Golgotha hwnwi kwrẃngsa-o sók phai kha, abo “Bokhorok chárá ” hwnma se. 34Bórok bono aro kwkha dalokjak angur bwtwi hadi lai kha, hai phano bo kisa chánaiwi abono nungna nai li ya.

35Bórok bono kruso kanta bu kha, hakhe bini ríno pat karwi banta khe na lai kha.Lob 22.18. 36Aboni ulo bórok aro achugwi bono naiwi tong lai kha. 37Bórok bini bokhorok saka ahai hwnwi bini majra swiwi rw lai kha: “O borok Judairokni bugra Jisu se.” 38Bórok dagait khoroknwinobo Jisu bai baksa kruso kanta bu kha, khoroksano bini yagra bwkhak, tei khoroksano yaksi.

39Abo tẃi himnairok bokhorok jangriui Jisuno hai hwnwi kul kha,Lob 22.7; 109.25. 40“O nokthar swbainaisa! O salthamni bisingo abono tisa phinaisa! Nwng Kaitorni Sajla khe sakno mwthang gra di. Krusni ongkhorwi phai di.”Mat 26.61; Joh 2.19.

41Ochai okrarok bai Kerong phrwngnairok tei okra chakrarokbo bono omo tẃi kheno mwnwi lai kha, 42“Bo buino le mwthango, sakno khe mwthangwi man ya! Bo Israilni bugra diba? Tabuk krusni ongkhorwi phai khe chwng bono poito khlainai! 43Bo Kaitorni thani khá beranai pho, bo Kaitorni Sajla hwnwi sa tiro, hakhe Kaitor bono tabuk mw da mwthangno chwngno phunuk thung!”Lob 22.8.

44Bo bai baksa kruso bujaknai dagaitrok suda se abo tẃi khe bono kul kha.

Jisu thwimani

(Mar 15.33-41; Luk 23.44-49; Joh 19.28-30)

45Diboro ha gwnangwi mwnagwi tong kha, ahai máng dam kwtham tong kha. 46Sarikni kwtham wng twtwi-o Jisu sotonwi hai hwnwi chirikhók kha, “Eli, Eli, lema sabakthani?” Abo khe “Ani Kaitor, ani Kaitor, tamo wngwi nwng ano khibi lang?” hwnma se.Lob 22.1.

47Aro bacha laiwi tongnai baksa bororok bo samano khnaui hai hwnwi sa lai kha, “Bo Eliano ringwi tong kha!” 48Logi logi’-no bórokni bere khoroksa do langwi wsponj naui angur bwtwi siringjago chomsa kha, hakhe raidang buchugo thepaui bono khanna nai kha.Lob 69.21.

49Baksa khe “Toro khu di, Elia phaiwi bono mw da mwthang phai nai grana!” hwnwi sa kha.

50Jisu tei uáisa chirikhógwi hama lái kha.

51Aphuru noktharni rí swngjak yaphang buchuk khaknwi khe kichigwi tháng kha; ha kwlwi kha, holongdaprok pekhak bai kha,Lam 26.31-33. 52mangkhorrok phiyokjak kha, hakhe aswk thwiwi thángnai Kaitorni bororok mwthangwi tisajak bai kha 53Bórok mangkhorni ongkhorwi tháng bai kha; Jisu thangwi bachama ulo bórok taun kwtharo habwi tháng kha, hakhe borok kwbángma bórokno nuk bai kha.

54Jisuno mwrwgwi tongnai sengkrak okra bai bini sengkrakrok bangla phaimano tei aswk wngmarokno nugwi kirima cháui “Bo sói’-no Kaitorni Sajla!” hwnwi sa lai kha.

55Aro hakchalo tong twtwi bwrwirok kwbángma nahar laijak, bórok Jisuno nainai nuknairok, Galilini simi bini logi logi phaimani. 56Bórokni bere Magdalani Mariam, Jakob bai Josepni buma Mariam tei Sebedaini bihik.Luk 8.2-3.

Jisuno Phobmani

(Mar 15.42-47; Luk 23.50-56; Joh 19.38-42)

57Sanja wng kheno Arimathiani rang gwnang khoroksa aro sók phai kha; bini bumung Josep, bo’-bo Jisuni sagri’-no. 58Bo Pilatni bwskango thángwi Jisuni mangno sanwi kha. Pilat a mangno Josepno rohor di hwnwi dagi kha. 59Hakhe Josep abono naui rítrak kwtal bai dului 60bini sakni bagwi khurmani mangkhoro tonwi kha, bo abo holongdabo khurmani balok ya kho. Hakhe bo holongdap kotorma girok rwui mangkhor duglam muthubwi klangwi tháng kha. 61Magdalani Mariam bai tei khoroksa Mariam aro mangkhor bwskango achuk laijak.

Mangkhor mwrwk rwmani

62Teini salo, abo Judai Tiyar salni teini sal, ochai okrarok bai Pharisairok Pilat bai malaiwi 63hai hwnwi sa kha, “Hodasa, a tatalsa kwthang tong phuru ‘Ang salthamni salo mwthangwi tisajak anw,’ hwnwi samani a kókno chwng muitu man kho.Mat 16.21; 17.23; 20.19; Mar 8.31; 9.31; 10.33-34; Luk 9.22; 18.31-33. 64Aboni bagwi bini sagrirok thángwi bini mangno khogwi ‘Bo kwthwini mwthangwi tisajak kha,’ hwnwi lukuno saui man ya tẃi khe saltham ká ya sak a mangkhorno kaham khe mwrwkna bagwi dagi di. Wng ya khe swkangni bandimani slái tabuk bandimani obo teibo hamya wng kuk anw.”

65“Mwrwknairokno tlang di. Tháng di, mangkhorno kaham khe mwrwgwi di,” hwnwi Pilat bórokno sa kha. 66Aboni bagwino bórok tháng kha, hakhe mwrwknairokno mwrwk di hwnwi kabu-ui a holongdabo sil bu-ui mangkhorno kaham khe kabu kha.

----------------------------------------------------------------------------------------------

MATHAI 28

Jisu thangwi bachamani

(Mar 16.1-10; Luk 24.1-12; Joh 20.1-10)

1Sabat sal páiwi Kaitho Salni aiprom-poromo Magdalani Mariam bai tei khoroksa Mariam mangkhor naina hwnwi tháng lai kha. 2Aro achomsa bangla koromsaui phai kha; Subraini suari khoroksa chuknohani ongkhorwi phai kha, hakhe a holongdap girok rwui norwi a saka achuk kha. 3Bini bwsak chẃngmabo nokha philikma hai, rí-chumrok phurmabo kothor kwsap hai. 4A mwrwknairok bono nugwi belai kirijak laima bagwi kwlwibraui kwthwi hai wngwi tháng kha.

5A suari bwrwirokno hai hwnwi sa kha, “Norok ta kiri di. Ang saui mano norok kruso kanta bujaknai Jisuno naitugo. 6Bo oro kwrwi kha; bo sama hai’-no bo mwthangwi tisajak kha. Phai di, nai phai di, orono bono mokholmani. 7Do lang di tabuk, dakti thángwi bini sagrirokno hai hwnwi saui di, ‘Bo kwthwini mwthangwi tisajak kha, tabuk bo norokni slái swkang Galili-o thángnai, norok aro bono nugwi anw.’ Ani o kókno muitu narwk di.”

8Hakhe bórok a mangkhorni do lang kha, bórok kirijak lai kha, hai phano jai kheno tongthok laijak, hakhe bini sagrirokno sauina hwnwi khachik lai kha.

9Achomsa Jisu bórokno nukjagwi “Norok ham di,” hwnwi sa kha. Bórok bini thani phai lai kha, hakhe bini yakung kwbagwi khulum lai kha. 10Jisu bórokno hai hwnwi sa kha, “Ta kiri di. Tháng di, ani takhukrokno Galili-o tháng di hwnwi saui di, hakhe bórok aro ano nugwi anw.”

Ochai okrarokni thani mwrwknairok sa phaimani

11Bwrwirok tháng bai khe mangkhor mwrwknai sengkrakrok baksa tauno tháng phirwi ochai okrarokno bebak wngmano khupro-ui saui kha. 12Ochai okrarok okra chakrarok bai malaiwi kók chap lai kha; bórok a sengkrakrokno rang kwbángma rwui 13hai hwnwi sa kha, “Norok ahai hwnwi sa di, horo chwng muktrwi thángwi tong phuru bini sagrirok phaiwi bini mangno khogwi tlang phai kha 14Tumungno gobornor o kók khna khe chwng bono soi rw anw, hakhe norok uanana nang glak.”

15Mwrwknairok rang naui a sajakma hai’-no khlai kha. Tabuk suda Judairokni bisingo o kókno pírjagwi tong kho.

Jisu bini sagrirok bai nukjakmani

(Mar 16.14-18; Luk 24.36-49; Joh 20.19-23; Sam 1.6-8)

16Sagri chisarok Jisu tháng di hwnwi samani Galilini a hathái-o tháng kha.Mat 26.32; Mar 14.28. 17Bórok bono nuk kheno khulum lai kha, tamo khe baksa baksa bwkha udru mudru wngjak kha. 18Jisu bórokni thani phaiwi bórokno hai hwnwi sa kha, “Chuknoha bai swngcharni bebak phan ani yago yapharjak kha. 19Aboni bagwino tháng di, swngchar gwnangwi bebak borokni thani thángwi bórokno ani sagri snamwi di: Pha, Sajla tei Phola Kwtharni mungwi bórokno baptisma rw di.Sam 1.8. 20Ang norokno joto dagima hai khe tongna bagwi bórokno phrwng di. Phiya muitu narwk di, o mol pái ya sak ang norok bai máng tongo.”

MARK 1

Baptisma rwnai Johon pírmani

(Mat 3.1-12; Luk 3.1-18; Joh 1.9-28)

1Omono Kaitorni Sajla Jisu Khristoni Kothoma Kaham. 2Omo Jisaia diyari hai hwnwi swiwi klangma hai khe chengsajak kha:

“Kaitor hai hwnwi sa-o,

‘Iko, omono ang rohormani a borok,

ang bono nini lama hokna

bagwi nini slái swkang rohor anw.’Mal 3.1.

3Hasing panthoro khoroksa hai hwnwi chirikhókjak,

‘Subraini bagwi lahar snam di,

bo himnani lamano

kepleng khe ton di!’ ”Jis 40.3.

4A kók hai’-no Johon hasing panthoro nukjak phai kha. Bororokno baptisma rw twtwi bo hai hwnwi sa kha, “Sumsok yakar di, yakarwi baptisma wng di, hakhe Kaitor norokni sumsok nakar anw.” 5Judia amchoi bai Jerusalem taunni joto borok Johonni thani tháng bai kha. Bórok sak sakni sumsokno gosi kha, hakhe bo bórokno Jordan twima-o baptisma rw kha.

6Johon mangingang buikhumuni rí kano, bukur bai bwchang kha-o, bo kúkthora bai bolongni piya modu chá-o.2Ha 1.8. 7Bo hai hwnwi sa kha, “Ani slái ulo phainai bo ani slái kwplai kuk; ang bomsonwi bini yaklap sokokna suda chúk ya. 8Ang norokno twi bai se baptisma rw-o, bo le norokno Phola Kwthar bai se baptisma rwnai.”

Jisu baptisma wng baiwi belokjakmani

(Mat 3.13—4.11; Luk 3.21-22; 4.1-13)

9Aphuru Jisu Galili amchoini Nasaretni phai kha, hakhe Johon bono Jordano baptisma rw kha. 10Jisu twini kasama logi’-no bo nokha phiyokjakma nuk kha, phiya Pholano pharuk hai khe bini sago birkhlai phaima nuk kha. 11Hakhe chuknohani kók hai hwnwi sakhlaijak kha, “Nwng ani khájani Sajla. Ang nono’-no belai khe hamjago.”Yap 22.2; Lob 2.7; Jis 42.1; Mat 3.17; 12.18; Mar 9.7; Luk 3.22.

12Aboni logi logi’-no Phola bono hasing panthoro rohor kha. 13Bo aro nokha sal brwichi ma tong kha, aphuru bo Soitan bai belokjak kha. Aro bolongni uak-tokrok tongo, hai phano suarirok bono chuba phai kha.

Jisu gabor khorokbrwino ringmani

(Mat 4.12-22; Luk 4.14-15; 5.1-11)

14Johon alongo klai bai khe Jisu Galili-o thángwi Kaitorni aroni Kothoma Kaham hai hwnwi pír kha, 15“Mol sók phai kha, Kaitorni ha sampha kha. Sumsok yakar di, hakhe Kothoma kahamno poito khlai di!”Mat 3.2.

16Jisu Galili twibom rukungo himwi tong phuru Simon bai bini takhuk Andria-o gabor khoroknwino twibomo chei bu-ui tongma nuhur kha. 17Jisu bórokno hai hwnwi sa kha, “Ani logi phai di, ang norokno borok romna phrwng anw.” 18Logi logi’-no bórok chei yakarwi bini logi tháng lai kha.

19Bo bwskango tei kisa him khe tei takhuknwirokno nuhur kha, bórok wng kha Sebedaini bwsarok Jakob bai Johon. Bórok rungo chei snamwi tong lai-o. 20Nuhurma logi’-no Jisu bórokno ring kha, hakhe bórok munirok bai bupha Sebedaino rungo klangwi Jisuni logi tháng lai kha.

Mwtai hamya kolobjakno Jisu sra rwmani

(Luk 4.31-37)

21Bórok Kapharnaumo phai lai kha, hakhe bwskangni Sabat salo Jisu thumnogo habwi phrwngwi kha. 22Bo phrwngmano khnanairok uanajak bai kha. Bo Kerong phrwngnairok hai phrwng ya, suar gwnang khe se phrwngo.Mat 7.28-29.

23Aphuruno mwtai hamya kolobjak khoroksa a thumnogo habwi hai hwnwi chirikhók kha, 24“O Nasaretni Jisu, nwng chwng bai tamo nangjak? Nwng chwngno sokomorna da phai? Nwng sabo ang saui mano. Nwng Kaitorni aroni borok kwthar!”

25Jisu a mwtaino hai hwnwi damrok kha, “Siringcha wng di! O borok bisingni ongkhorwi phai di!”

26Hakhe a mwtai a borokno leng rwui sotonwi chirikhók kha, hakhe bini bisingni ongkhorwi phai kha. 27Bebak bororok aswk khe uanajak bai kha, hakhe hai hwnwi sa lai kha, “Omo tamo? Bo phrwngmani omo tail juda ya da? Bo kwplai khe mwtai hamyarokno suda dagi-o, bo dagimano bórokbo ma khna-o!”

28Aboni bagwino Jisuni kók Galili amchoi gwnangwi dakti pírjak kha.

Borok kwbángmano Jisu ham rwmani

(Mat 8.14-17; Luk 4.38-41)

29Bórok thumnokni khe uáisa bai’-no Simon bai Andriani nogo tháng lai kha, Jakob bai Johonbo logi tháng kha. 30Simonni bwkrajwk aphuru lumui klaijak, hakhe Jisu aro sógwi kheno bini kók saui khna rwjak kha. 31Jisu bini thani thángwi yak romwi socha kha. Kulum swraui tháng kha, hakhe bo bórokno chá rw kha khan rw kha.

32Sal habwi sanja wngwi phai kheno bororok Jisuni aro bebak hamyarok bai mwtai kolobjakrokno tubu kha. 33Taunni bebak bororok nok bwskango kuthum phai bai kha. 34Jisu podrepot bemuk gwnang aswk hamyarokno ham rw kha, phiya aswk mwtai hamyaroknobo rwkhlai kha. Bo mwtai hamyarokno kók tháisa phano sa rw li ya, tamni hwn khe bo sabo hwnwi bórok saui mano.

Jisu Galili-o pírmani

(Luk 4.42-44)

35Teini phungo belai aisirisiri sal pa ya sini Jisu bachaui nokni ongkhorwi tháng kha; bo taunni ongkhorwi siring siring kwrẃngsa-o thángwi suri sanwi kha. 36Simon bini logisongrok bai baksa bono naitukna bagwi ongkhorwi tháng lai kha. 37Bórok bono nuk khe’-no hai hwnwi sa kha, “Jotono nono naitugwi tong kha.”

38Hakhe Jisu hai hwnwi sa kha, “Phai di, chwng gana-gini kamirogo tháng anw. Arobo ang pír thai klai-o; omoni bagwino ang phai-o.”

39Aboni bagwino bo Galili gwnangwi thumnokrogobo pír kha, mwtai hamyaroknobo rwkhlai kha.Mat 4.23; 9.35.

Biyadi chájakno Jisu ham rwmani

(Mat 8.1-4; Luk 5.12-16)

40Biyadi chájak khoroksa Jisuni thani phai kha, bo yáskú sungwi hai hwnwi koi phai kha, “Nwng ano ham rwna khe ham rwui mano.”

41Jisu khairokjagwi yak phologwi bono tang kha. “Ham di, ang nai-o,” hwnwi bo sa kha. 42Logi logi’-no a borokni biyadi kwmaui tháng kha, hakhe bo ham kha. 43-44Hakhe Jisu bono ragdama khe hai hwnwi saui logi logi’-no rohor kha, “Khna di, o kókno kebono ta sa di. Tháng di, ochaino thángwi phunugui di. Nwng tabuk ham kha hwnwi lukuno phunukna bagwi Musi rathar di hwnwi dagima hai’-no ratharwi di.”Leb 14.1-32.

45Aile a borok le thángwi se o kókno yang yang pírsaui rwui kha. Bo aswk sama bai Jisu tei pháng-pháng khe tauno thángwi man li ya. Aphuru bo phataro siring siring kwrẃngsa-o se tongwi si-o, hakhe yang yangni bororok bini thani phai kha.

MARK 2

Yakung yak man yano Jisu ham rwmani

(Mat 9.1-8; Luk 5.17-26)

1Salnwi salthamni ulo Jisu Kapharnaumo kiphilwi phai kha. Hakhe bo nogo tongo hwnwi kók pírjak kha. 2Hakhe aswk borok kwbángma kuthum phai khe tei thopsa phano tongthai kwrwi kha, duglam bwskango suda kwrwi kha. Jisu Kaitorni kók pírwi tong phuru 3yakung yak man ya borok khoroksa bini thani tubujak kha, chwlakbrwi bono bal laijak. 4Hai phano borok kwbángmani bai bórok bono Jisuni thani tlangwi se man li ya. Hakhe bórok Jisu tongma dikholo núkhúng swpla kha. Swplaui bwlam khlai kheno bórok a borokno uaingo mokholjak khe tikhlaiwi rohor kha. 5Bórok aswk poito khlaimano nugwi Jisu a yakung yak man yano “Chwlasa, nini sumsok nakarjak kha,” hwnwi sa kha.

6Aro achugwi tong lainai Kerong phrwngnai khoroknwi khorokthamrok hai hwnwi uansuk lai kha, 7“Bo bahai khe o kókno sa rak? Omo ba Kaitorno hamya sama se bla. Khoroksa phano sumsokno nakarwi mannai kwrwi; Kaitor simi se mano!” 8Bórok uansukma kókno Jisu aphuru’-no saui man kha. Aboni bagwino bo bórokno hai hwnwi sa kha, “Tamo wngwi norok omo hai uansuk lai? 9O yakung yak man yano ‘Nini sumsok nakarjak kha,’ hwnwi sana da lai kuk, eba khe ‘Bacha di, nini uaing khochaui him gra di,’ hwnwi sana da lai kuk; bubo lai kuk? 10Hakhe o swngcharo Borokni Sajla sumsok nakarwi mano abono ang norokno phunuk anw.” Hakhe a yakung yak man yano bo hai hwnwi sa kha, 11“Ang nono sa-o, bacha di, nini ríyan khochaui nogo tháng di.”

12Bebakni bwskango a borok bacha kha, logi logi’-no bini ríyan khochaui tháng kha. Bebakno belai uanajak bai kha, hakhe “Omo tẃi le chwng nuk trwng ya kho!” hwnwi bórok Kaitorno lobwi tong lai kha.

Lebino Jisu ringmani

(Mat 9.9-13; Luk 5.27-32)

13Jisu haino hai Galili twibom rukungo kiphilwi tháng kha. Bororok kwbángma bini thani phai kha, hakhe bo bórokno phrwng kha. 14Himwi tong phuru bo Alphaini bwsla Lebi hwnwi teks romnai khoroksano bini tangnogo achugwi tongjak nuhur kha. “Ani logi phai di,” hwnwi Jisu bono sa kha. Hakhe Lebi bachaui bini logi tháng kha.

15Ulo Jisu Lebini nogo mai khopsa cháui kha. Teks romnairok tei basijakrok kwbángma Jisuni logi logi tháng kha, aphuru bórokni bere kwbángma bo bai tei bini sagrirok bai baksa chá thani achugwi kha. 16Kerong phrwngnairokni bere Pharisairok khoroknwi khoroktham Jisuno basijakrok bai tei teks romnairok bai chá laima nuk kha, aboni bagwino bórok bini sagrirokno hai hwnwi sẃng kha, “Tamo wngwi bo omo tẃi bororok bai thansa khe chá?”

17Bórok samano khnaui Jisu hai hwnwi sa kha, “Kahamni daktor nang ya, hamyani se nango, Bórom gwnangrokno ang ringna phai ya, basijakrokno se ringna phai-o.”

Ubasni kók sẃngmani

(Mat 9.14-17; Luk 5.33-39)

18Baptisma rwnai Johonni sagrirok bai Pharisairok salsa ubas tong lai kha. Baksa borok Jisuni thani phaiwi hai hwnwi sẃng lai kha, “Tamo wngwi baptisma rwnai Johonni sagrirok bai Pharisairokni sagrirok ubas tong lai? Nini khe tamo tong lai ya sla?”

19Jisu hai hwnwi sa kha, “Káijaknaisa tong twtwi kái lai panda-o phainairok ma chá ya wng anw hwnwi da norok khá ka? I’nhi, káijaknaisa tong sak bórok ma chá ya wng glak. 20Tamo khe omo tẃi sal phai anw, káijaknaisa bórok bai swkagwi tlangjak anw, a salo bórok chá yaui ma tong anw.

21“Rí kwchamo khoroksa phano rí kwtal thap ya. Thab khe a rí kwtal kwchamno kichik rwnai, hakhe a bwlam uar rwnai. 22Eba khe khoroksa phano angur bwtwi kwtalno twk mosonjago ton ya. Ton khe angur bwtwi a twkno rechek rachak khlainai, hakhe angur bwtwi bai twkbo hamya wngnai. I’nhi, angur bwtwi kwtalni bagwino twk kwtal.”

Sabat salni kók sẃngmani

(Mat 12.1-8; Luk 6.1-5)

23Salsa Sabat salo Jisu gom bwlwng bising bising himwi thángmani. Bini sagrirok bo bai him lai twtwi gom bwtang cherna cheng lai kha.Uái 23.25. 24Hakhe Pharisairok Jisuno hai hwnwi sa kha, “Nai di, nini sagrirok Sabat salo abo hai khlaimani abo chini Kerong swbaima klai-o.”

25Jisu hai hwnwi sa kha, “Chámung kwrwi wngwi tong phuru Daud tamo khlai kha norok abo poriui nai ya kho diba? Bo bai bini logisongrok ok khuijakmani; 26aboni bagwino bo Kaitorni nogo habwi Kaitorno barokmani a ruti chá kha. Ochai bokhorok Abiatharni molo omo wngo. Chini Kerongo rwksa khe ochairok simi se a ruti cháui mano; aile Daudbo abono chá kha, bini logisongroknobo chá rw kha.”Leb 24.9. 1Sa 21.1-6.

27Jisu hai hwnwi saui kók mwthak kha “Borokni bagwi se Sabat sal khlaijago, Sabat salni bagwi borok khlaijak ya. 28Aboni bagwino Borokni Sajla wng kha Sabat salnibo bokhorok.”

MARK 3

Yak hoichajakno Jisu ham rwmani

(Mat 12.9-14; Luk 6.6-11)

1Ulo Jisu thumnogo kiphilwi tháng kha. Aro yak hoichajak borok khoroksa tongo. 2Aro baksa borok Jisu samung cha ya khlai khe bono majra berna naiwi tongo. Abo bai Sabat salo bo khoroksa swkno ha da ham rw no hwnwi bórok bono oiran khe naichom lai tong lai kha. 3Jisu a yak hoichajakno “Bwskango phai di,” hwnwi sa kha. 4Hakhe bo lukuno hai hwnwi sẃng kha, “Sabat salo tamo tamo khlaiwi man hwnwi chini Kerongo sa? Kaham da khlai di hwn hamya? Mwthang di da hwn buthar di?”

Hakhe bórok tháisa phano pungwi man li ya. 5Jisu jolijagwi yang yang bórokno naisik kha, bórok belai khá si ya wngma bai bo bwkha hamya wngjak kha. Hakhe bo a borokno hai hwnwi sa kha, “Yak pholok di.” Bo yak pholok kheno bini yak ham phi kha. 6Aboni bagwino Pharisairok thumnokni tháng kheno Herodni baksa bororok bai Jisuno butharna bagwi kók chap lai kha.

Lek rukungo luku kuthummani

7Jisu bini sagrirok bai Galili twibomo tháng lai kha, hakhe luku kwbángma bono rwkthar kha. Bórok wng kha Galilini, Judiani, 8Jerusalemni, Idumia amchoini, Jordan ayang narni amchoini, phiya Tur tei Sidon taun gana-ginini phaimani Jisu aswk samung tangwi tongmarokno khnama bagwi se a luku kwbángma bini aro phai-o. 9Luku kwbángma wngma bai bororok bini sago klai phai ya tẃi Jisu bini sagrirokno rung khungsa tiyar khlai di hwn kha. 10Bo borok kwbángmano ham rw kha, hakhe aswk hamyarok bono tangna hwnwi kese-rebe khe bini sago kwlái twtwi wngwi tong lai kha.Mar 4.1; Luk 5.1-3. 11Mwtai hamya kolobjak bororok bono nuk kheno bini bwskango klaiwi “Nwng Kaitorni Sajla se!” hwnwi chirikhók lai kha.

12Jisu a mwtai hamyarokno bo sabo ta sa di hwnwi ragdama khe dagi kha.

Jisu chonghor chiknwirokno chongmani

(Mat 10.1-4; Luk 6.12-16)

13Ulo Jisu hathái-o kasaui tháng kha, hakhe bo naima bororokno bini thani ring kha. Bórok bini thani phai kha, 14hakhe bo borok chiknwirokno chonghor hwnwi chong kha. Bo bórokno hai hwnwi sa kha, “Ang bai tongna hwnwi ang norokno chong kha; ang norokno pírna bagwi rohor anw, 15phiya norok mwtai hamyarokno rwkhlainani phan man anw.”

16Omorok’-no wng kha bo chongmani a khorok chiknwirok: Simon (Jisu bono Pitor hwnwi mung phar kha); 17Sebedaini bwslasong Jakob bai bini takhuk Johon (Jisu bórokno Boanergi hwnwi mung phar kha, abo “Borok Phirang” hwnma se); 18Andria, Philip, Bartholomai, Mathai, Thoma, Alphaini bwsla Jakob, Thadai, Kanansa Simon, 19hwn khe Jisuno rom rwnai Judas Iskariot.

Jisu ba Belsebul bai mwtai hamya rwkhlai pho

(Mat 12.22-32; Luk 11.14-23; 12.10)

20Aphuru Jisu nogo tháng kha. Haino hai luku kwbángma kuthum phaima bai Jisu bai bini sagrirok chána suda jora man li ya. 21Abono khnaui bini nokni bororok bono tubuna hwnwi tháng lai kha, tamni hwn khe bororok “Bo kobor kha kha,” hwnwi sa lai tong lai kha.

22Jerusalemni phainai khoroknwi khoroktham Kerong phrwngnairok hai hwnwi sa lai tong lai kha, “Bo Belsebul bai kolobjak kha. Mwtai hamyarokni bokhorokni phan bai se bo mwtai hamya rwkhlai-o!”Mat 9.34; 10.25. 23Hakhe Jisu bororokno bini thani ringwi omo twi rwngthoma sa kha, “Soitan ba bahai khe Soitanno rwkhlainai? 24Hani bororok uálai kak lai khe a ha bai thángo. 25Núkhung khungsani borok uálai-kak lai khe a núkhung baiwi thángo. 26Aboni bagwino Soitanni ha kak laijak hwn khe abo kwbáng dwgwi man ya, hakhe abo kwmaui thángnai.

27“Phan gwnang borokno swkang baira kha ya khe bini nogo habwi manwirok segwi tubu-ui man ya; kha khe se bini nok sodro-podro khlaiwi mano. 28O kókno muitu narwk di, bororok aswk sumsok khlaimarok bai Kaitorno aswk hamya samarok bebak’-no nakarjakna tongo. 29Phiya Phola Kwtharno hamya sanai borok bo nakarjak glak, tamni hwn khe bini sumsokno bo ruju phlai máng ma tong sinai.”Luk 12.10. 30(“Bo mwtai hamya kolobjak kha,” hwnwi baksa sama bai se Jisu-o kókno sa-o.)

Jisuni sakni borok

(Mat 12.46-50; Luk 8.19-21)

31Aphuru Jisuni buma bai bini takhuksong phaiwi sók phai kha. Bórok phataro bachaui tong laiwi bono ring rw hor kha. 32Luku kwbángma Jisuno rekerwi achuk laijak, hakhe bórok bono hai hwnwi sa kha, “Nahar di, nwma bai nini takhuksong phataro, bórok nono naituk lai-o.”

33Jisu hai hwnwi sa kha, “Sabo ani ama? Sabo ani takhuksong?” 34Hakhe bono rekerwi achugwi tongnai bororokno naisigwi bo hai hwnwi sa kha, “Iko, bo se ani ama, bórok se ani takhuksong! 35Kaitorni muchung tẃi tongnai borok bo’ se ani takhuk, ani bukhuk, ani ama.”

MARK 4

Maichlwi sarmani rwngthoma

(Mat 13.1-9; Luk 8.4-8)

1Jisu haino hai Galili twibom rukungo phrwng khua. Bini thani aswk borok kwbángma kuthum phaima bai bo rung khungsa-o kasaui achugwi kha, hakhe rung twi kwcharo sógwi kha, yang khe aswk borok twi rukungo bacha laijak.Luk 5.13. 2Bo bórokno kwbángma phrwngna bagwi rwngthomarok sa kha, hakhe phrwng twtwi bo hai hwnwi sa kha.

3“Khna di! Borok khoroksa maichlwi sarna hwnwi tháng kha. 4Sar phuru baksa maichlwi lama-o klai kha, hakhe toksa-toktẃirok phaiwi cháui khibi kha. 5Baksa ba ha kwrwi thani holongsiki-o klai kha. Ha báng thayani bagwi maichlwi dakti’-no bumuk per kha. 6Ulo sal kasaui phai phuru khe a bumuk kwlwi khampraui tháng kha, hakhe yarwng kwbáng sukhlai man yani bai dakti’-no hoichaui tháng kha. 7Baksa ba busulwngo klai kha; busurok torsaui a bumukno kobolwi khibi kha, hakhe abo bwthái thái li ya. 8Baksa ba ha kahamo klai kha, bumuk per kha, tor kha lok kha, hakhe bwthái thái kha, baksa kwthamchi, baksa dokchi, baksa ba sara thái kha.”

9Jisu hai hwnwi saui kók mwthak kha, “Khunju tong khe ba o kókno khna di.”

Tamni bagwi rwngthoma sajak kha

(Mat 13.10-17; Luk 8.9-10)

10Jisu saichung tongma jora khnanairokni bere khoroknwi khoroktham borok bai sagri chiknwirok bono a rwngthomarokno swbai sa di hwn lai kha. 11“Kaitorni hani bisingni kókno norokno saui man rw kha,” hwnwi Jisu sa kha. “Phiya buino khe rwngthoma tẃi bebak kókno khna rwjak kha, 12hakhe

“ ‘Bórok mokol kaichomwi

naisik anw,

hai phano nuk glak;

bórok khunju kaichomwi khna anw hai phano romwi man glak.

Wng ya khe bórok

Kaitorni phaising kiphil kha mun,

hakhe bo bórokno nakar kha mun.’ ”Jis 6.9-10.

Maichlwi sarmani rwngthomano Jisu swbai samani

(Mat 13.18-23; Luk 8.11-15)

13Aphuru Jisu bórokno hai hwnwi sẃng kha, “Norok o rwngthomano romwi man li ya diba? Hakhe norok bahai khe tei rwngthomarokno romwi mannai sla? 14A sarnai bo Kaitorni kókno se saro. 15Baksa a kókno khna-o, khnama logi’-no Soitan bórokni bisingni a kók sarjakno tlang phai-o. Omo twi bororokno lama-o klainai a maichlwi. 16Baksa ba a kókno khna kheno khápang srangjagwi abono khá-o chobo. 17Tamo khe abo bórokni bwkha-o hap súk yani bagwi bórok kwbáng dwgwi tongwi man ya. Aboni bagwino a kókni bagwi tekto man phuru khe, eba sátokjak phuru khe bórok phatsa uslu-o. Omo tẃi bororokno holongsiki-o klainai a maichlwi. 18-19Baksa ba a kókno khna-o, tamo khe bórok swngcharni kók uansugo, rang-ríno mokol chẃngo, phiya podrepot muchungjago, abo bai’-no a kók koboljagwi thángo, hakhe bwthái thái ya wngo. Omo tẃi bororok’-no busulwngo sarjaknai a maichlwi. 20Baksa ba a kókno khnaui khá-o chobo, hakhe bwthái tháijago, baksa kwthamchi, baksa dokchi, baksa ba sara. Omo tẃi bororokno ha kahamo sarjaknai a maichlwi.”

Chati kholopjak ya

(Luk 8.16-18)

21Jisu hai hwnwibo sa kha, “Kebo chatino twk bisingo eba khe chuki tola tonna bagwi tu da tubu? Bo thopnao’-no ton ya da?Mat 5.15; Luk 11.33. 22Huijak tonmarok tikhlai phunukjak anw, kholopjakrok phiyokjak anw.Mat 10.26; Luk 12.2. 23Khunju tong khe ba o kókno khna di.”

24Bo bórokno hai hwnwibo sa kha, “Norok khnamano khunju kai di. Norok buino rwma swkno norokbo rwjaknai, teibo se kwbáng rwjaknai.Mat 7.2; Luk 6.38. 25Gwnang teibo rwjaknai, phiya kwrwi hwn khe kisa tongma phano bini yakni najaknai.”Mat 13.12; 25.29; Luk 19.29.

Maichlwi bumuk permani rwngthoma

26Jisu hai hwnwi teibo sa kha, “Kaitorni ha wng kha borok khoroksa bini kheto maichlwi sarma hai se. 27A borok horo thu-o, salo sicha-o, hakhe asani a maichlwi bumuk perwi torwi phai-o abo bahai khe wng bo saui man ya. 28A ha buphangrokno ahai’-no tor rw-o, bwtháibo thái rw-o; swkang bumuk, ulo bosok, aboni ulo sói maitang. 29Mai munui phai kheno ranani jora phai kha hwnwi a borok chekhra bai mai ra-o.”Jol 3.13.

Horua bwchlwini rwngthoma

(Mat 13.31-32,34; Luk 13.18-19)

30“Kaitorni hano chwng bahai hwnwi sanai?” hwnwi Jisu sẃng kha. “Abono si rwna bagwi bu rwngthoma chwng sanai? 31Omo swngcharni jotoni slái kotoi horua bwchlwi hai se. A bwchlwino kái khe 32ulo abo achai-o, hakhe aswk samphangrokni slái bo se tor kugo. Abo bedek bupra aswk kotor khe jaksaro toksa-toktẃirok bini bedek saklomo bothop thum phai bai-o.”

33Jisu omo hai khe aswk rwngthomarokno lukuno sa saui bini kókno pír kha; a samano romwi manna tẃi khe bo sa-o. 34Rwngthoma baiyasa bo bórokno tháisa phano sa ya; phiya bini sagrirok simi phuru bórokno joto kókno swbai sa-o.

Jisu nokbar kotor thak rwmani

(Mat 8.23-27; Luk 8.22-25)

35A salni sarigo Jisu bini sagrirokno hai hwnwi sa kha, “Hwm tho, chwng twibom ayang naro tháng anw.” 36Hakhe bórok lukuno khibi tháng lai kha. Jisu achukmani rungo’-no sagrirokbo kasaui kha, hakhe bono bórok bai tlang kha. Tei rungrokbo aro tongo. 37Nokbar kotor belai khe sipchaui phai kha, hakhe twi aphal rungo bu phaijagwi tongma bai rungo twi pungna naiwi tong kha. 38Jisu kobongo bokhorok beraui rung uklogo thu-ui tongo. Sagrirok bono sochaui hai hwnwi sa kha, “Hodakra, chwng thwina naiwi tongmani nwng uana ya diba?”

39Jisu bachaui nokbarno hai hwnwi damrok kha, “Siringcha wng di!” Hakhe bo twi aphalrokno hai hwnwi sa kha, “Thak si di!” Nokbar thak kha, hakhe kwchang kwchang wng kha. 40Jisu aphuru sagrirokno hai hwnwi sa kha, “Norok tamo swk aswk kirijak? Tamo swk norok poito kwrwi wng bai?”

41Hakhe bórok kirima habwi hai hwnwi sa lai kha, “Hakhe o borok sabo? Nokbar bai twirok suda bini kók khnaui ma tongo!”

MARK 5

Mwtai hamyarok kolobjakno Jisu sra rwmani

(Mat 8.28-34; Luk 8.26-39)

1Bórok Galili twibom ayang naro Gerasenrokni amchoi-o phai lai kha. 2Jisu rungni ongkhorma logi’-no simalwngni ongkhorwi phainai borok khoroksa bini thani sók phai kha. 3O borok wng kha mwtai hamya kolobjak, hakhe bo simalwngo tongo. Khoroksa phano bono sorni dwkhwi khaui tei narwgwi man ya; 4bono yakung yak khaui máng se ma tono, phiya kha brúm brúm’-no bo sorni dwkhwi sachu-ui khibi-o, yakungni sorni hatrainobo swbai khibi-o, khoroksa phano bono kók khna rwui man ya. 5Hopung sapung bo chirikhók twtwi bini bwsakno holongsiki bai rokpra twtwi simalwngo tei hatháirogo himgurungo.

6Hakchalo tong twtwi’-no bo Jisuno nuhurwi khachigwi bini bwskango yakung yaphango burungsa khe klai rw phai kha. 7Hakhe bo sotonwi hai hwnwi chirikhók kha, “O Kaitor Kotorni Sajla Jisu! Nwng ang bai tamo nangjak? Kaitorni mungwi ang nono duai rw ja-o, ano ta sátok jaba di!” 8(“O mwtai hamya, nwng o borokni bisingni ongkhorwi phai di,” hwnwi Jisu sama bai se a borok o kókno sa-o.)

9Hakhe Jisu bono “Nini mung tamo?” hwnwi sẃng kha.

A borok hai hwnwi sa kha, “Ani mung Kwbángma; chwng oro kwbángma se!” 10Hakhe bo a mwtai hamyarokno a amchoini ta rohor ja di hwnwi Jisuno belai khe koi kha.

11Aro hadugo uak kwbángma ada chá laiwi tongmani. 12A mwtairok Jisuno hai hwnwi koi kha, “U uakrokni bisingo habwi manna tẃi khe chwngno bórokni thani rohor ja di.” 13Bo bórokno rohor kha, hakhe mwtai hamyarok a borokni sakni ongkhorwi a uakrokni bisingo habwi kha. Hakhe aswk uak bebak’-no harwbra tẃi ongkhor klaiwi twibomo kwlwgwi thwi bai kha. Aro bebagwi uak mak nwisai swk wng anw.

14Abono nugwi uak mwrwknairok khárwi tháng bai kha, hakhe a wngmano tauno tei kamirogo saui rw bai kha. Hakhe bororok tamo wng kha hwnwi naina tháng lai kha. 15Bórok Jisuni thani phaiwi a mwtai hamyarok bai kolobjakno nuk phai kha; bo rí-chum kanjak khe kwchang kwchang kheno aro achukjak, hakhe bórok bebak’-no kirijak bai kha. 16A mwtai hamyarok kolobjaknai borok bo tamo wng kha abono nuknairok bororokno saui bai kha, uakrokni kókbo saui bai kha. 17Aboni bagwi bórok Jisuno a amchoini tháng di hwn lai kha.

18Jisu rungo kasaui phuru a mwtai hamya kolobjaknai borok bono hai hwnwi koi kha, “Ano nini logi tẃi ja di.”

19Jisu bono tẃina nai li ya, tamo khe hai hwnwi sa kha, “Nogo tháng di, Subrai bwswk khairokjagwi nini bagwi aswk samung khlaimarokno nini nokni bororokno saui di.”

20Aboni bagwi a borok taun khungchi-o thángwi Jisu bini bagwi tamo khlai kha abono saui bai kha; hakhe abono khnanairok jotono uanajak bai kha.

Jairni bwsajwk bai Jisuni dulai tangnaijwk

(Mat 9.18-26; Luk 8.40-56)

21Jisu twibom ayang naro kiphilwi phai kha. Aro twibom rukungo luku kwbángma bini thani kuthum phai kha. 22Aphuru Jair hwnwi thumnokni hoda khoroksa phai kha, bo Jisuno nugwi bini yakungo klaiwi 23hai hwnwi belai khe koiwi sa kha, “Ani chwrai bwrwima hamya klaiwi thwi tẃi thwi tẃi wngwi tong kha. Phai jaba di, bo hamna tẃi khe bini sago nwng yak bera phai ja di.”

24Jisu hakhe bo bai tháng kha. Aswk borok kwbángma bo bai baksa tháng lai kha, hakhe kese-rebe khe bini sago klai twtwi wngwi tong lai kha.

25Aro nokha bisi chiknwi rí súma thak ya wngwi sak tekto manẃi tongnai bwrwi khoroksa tongo. 26Bo ochai-khama kwbángma bai naijagwi rang-rí tong-kwrwi báijak bai kha, hamna le thu-ui se tong di, teibo se dera si-o. 27Bo Jisuni kókno khnaui bororokni bising tẃi bini uklogo phai kha, hakhe bo bini sakni ríno tang kha. 28Bo hai hwnwi uansuk kha, “Bini sakni rí simi phano ma tang khe ang hamwi thángo.”

29Aboni logi’-no thẃi thak kha, bini hamya hammani bo saui man kha. 30Aboni logi’-no Jisu bini aroni phan ongkhorwi thángmani saui manẃi luku bwkhak uphilwi hai hwnwi sẃng kha, “Ani sakni rí sabo tang?”

31Bini sagrirok bono hai hwnwi sa kha, “Aswk bororok nono kese-rebe khe tongma nugwi suda se ‘Ano sabo tang?’ hwnwi nwng hwnwi tong kho.”

32Abo sabo hai khe tang kha naina bagwi Jisu yang yang naisik kha 33Tamo khe a bwrwima bini tamo wng kha abo saui manẃi kirima bai kwlwi twtwi bini bwskango phaiwi burung khe klaiwi rw phai kha, hakhe bebak kókno bono sa kha. 34Jisu bono hai hwnwi sa kha, “Bwrwima, nini poito nono ham rw kha. Kwchang kwchang khe tháng di, kaham kwrwng khe tongwi di.”

35Jisu kók saui tong phuru thumnokni hoda Jairni nokni borok khoroknwi khoroktham phaiwi hai hwnwi sa phai kha, “Nwsajwk thwi kha, hodakrano tei tamni leng rwna nai tong si?”

36Bórok samano khunju rw yaui Jisu bono hai hwnwi sa kha, “Ta kiri di, poito simi khlai di.” 37Hakhe bo Pitor bai Jakobno tei Jakobni takhuk Johonno karwi tei khoroksano phano bini logi tháng rw li ya. 38Bórok thumnokni hodani nogo sók phai phuru khe Jisu aro bororokno kutuk laijak, sotonwi kap lai-kok lai wng laijak nugwi kha. 39Bo noksingo habwi hai hwnwi sa kha, “Norok tamo wngwi kutuk lai? Tamo wngwi kap lai? O chwrai thwi ya; thu-ui se tongo!”

40Hakhe bórok bono mwnwi lai tong kha. Tamo khe bo bórok bebak’-no phataro rohorwi chwraini buma bupha bai bini sagri khorokthamno tlangwi a chwrai tong thani-o habwi tháng kha. 41Bo chwraini yak romwi bono hai hwnwi sa kha, “Talitha kum.” (Abo “O bwrwima, ang sa-o bacha di,” hwnwi hwnma se.)

42Hakhe a bwrwima doropsa bachaui him kha. (Bo nokha bisi chiknwini borok). Aboni bagwino bórok belai uanajak bai kha. 43“Kebono ta sa di,” hwnwi bórokno ragdama khlaiwi Jisu hai hwnwi sa kha, “Bono mungsa swk chána rw gra di.”

MARK 6

Nasaretsong Jisuno gwnda khlai ya wngmani

(Mat 13.53-58; Luk 4.16-30)

1Ulo Jisu aroni thángwi bini ha-o phai kha, bini sagrirok bo bai baksa tháng lai kha. 2Sabat salo bo thumnogo phrwngwi kha. Aswk bororok bini a phrwngmano khnaui uanajak bai kha, hakhe hai hwnwi sa lai kha, “O borok omorokno biyangni man? Bo aswk elem kwrwng wngma ba abo tamo? Bini yak tẃi ha-o nuk ya samungrok omorok ba tamo? 3O borok a mistri ya diba? Bo Mariamni a bwsla, Jakob, Josi, Juda tei Simonni takhuk ya diba? Bini bahanokjwksong chwng bai baksa oro tong ya diba?” Hakhe bórok bono gwnda khlai li ya.

4Jisu bórokno hai hwnwi sa kha, “Diyari joto jaga-o bórijago, bini ha bai, sandai-masak bai tei nokni bororok bai simi se bórijak ya.”Joh 4.44.

5Hakhe bo khoroknwi khoroktham hamyarokni saka yak beraui ham rwma karwi aro tei mungsa phano ha-o nuk ya samung khlaiwi man li ya. 6Bórok poito khlai ya wngmano nugwi bo uanajak kha.

Sagri chiknwirokno pírna rohormani

(Mat 10.5-15; Luk 9.1-6)

Hakhe Jisu kami brúm brúm thángwi bororokno phrwng kha. 7Aphuru bo a sagri chiknwirokno ringwi khoroknwi khoroknwi khe rohor bai kha. Bo bórokno mwtai hamyarokno rwkhlainani phan rwui 8hai hwnwi sa kha, “Lama him thani raidang kongsa karwi tei mungsa phano ta twi di, ruti buya, bogol buya, sola-o rang buya. 9Yakungo yaklap ká di, tamo khe kamchlwi kangsani bára ta chum di.” 10Bo bórokno hai hwnwibo sa kha, “Kwrẃngsa-o sógwi aroni kutul ya sak norok kasa rwjakmani a nogo’-no tong di. 11Kwrẃngsa swkni bororok norokno yachak sok ya khe, eba norokni kókno khna ya khe aroni kutulwi yakung hadlwi bupraui kabu di. Omo bórokno hus khe kabuma se. Ang norokno sóino sa-o, buj thummani salo Sodom bai Gomora se a kamiyungrokni slái teisa hama lok rwi naijak anw.Sam 13.51.

12“Hakhe bórok tháng kha, thángwi bororok sumsok yakar thung hwnwi pírwi kha. 13Bórok mwtai hamya kwbángma rwkhlai kha, phiya hamya kwbángmano thok phulwi ham rw kha.Jak 5.14.

Baptisma rwnai Johonno butharmani

(Mat 14.1-12; Luk 9.7-9)

14Habugra Herod abono khna kha, tamni hwn khe Jisuni mung pírjak rwrwgo. Baksa hai hwnwi sa lai-o, “Baptisma rwnai Johon thangcha phiro. Aboni bagwino bini bisingo omo tẃi samung khlainani phan tongo.”

15Baksa ba “Bo Elia se.” hwnwi sa lai-o.

Baksa ba “Agini diyarirok hai bo’-bo haino diyari,” hwnwi sa lai-o.Mat 16.14; Mar 8.28; Luk 9.19.

16Herod abono khna kheno hai hwnwi sa kha, “Omo baptisma rwnai Johon. Ang ba bini bokhorok tan rw kha bla. Bo thangcha phi kha!” 17Herod sak baithang Johonno rom rwui alongo chop kha. Bini takhuk Philipni bihik Herodiani bagwi se Herod omo khlai-o, bini takhukni bihik phano Herod bono hik snam kha. 18Tamo wngwi hwn khe baptisma rwnai Johon Herodno hai hwnwi sama tongo, “Nini takhukni hikno namani abo nini cha ya.”Luk 3.19-20.

19Hakhe Herodia Johonno naislerjagwi bono butharna naiwi tongo, tamo khe bo abono man ya wngwi tongo, 20tamni hwn khe Herod Johonno borok kaham tei borok kwthar hwnwi saui manẃi bono kirijago, hakhe bono mungsabo hamya khlai ya wngwi tongo. Bo kók samano khna brúm brúm bo belai uanama klai jago, hai phano bini kókno bo khápang srangjagwi khna-o.

21Salsa Herodni achaima sal pálai phuru naikolphangni tangphang kotorrokno, sengkrak okrarokno tei Galilini kolok-kotorrokno tẃiwi Herod panda chá lai phuru Herodia bwlam manjak kha. 22Herodiani bwsajwk phaiwi mwsa kha, hakhe Herod bai bini panda phainairok bono hamjak kha. Aboni bagwino bugra a bwrwimano hai hwnwi sa kha, “Nwng tamo nai ano san di, ang abono rw anw.” 23Bo bono hai hwnwi swmai tangwi sa kha, “Nwng jesa manwi san phano ang nono rw anw, abo ani ha khaksa phano wng thung.”

24Aphuru a bwrwima phataro thángwi bumano “Ang tamo sannai?” hwnwi sẃngwi kha.

Hakhe buma “Baptisma rwnai Johonni bokhorok san di,” hwnwi sa kha.

25A bwrwima a logi’-no bugrani thani dodro dodro kiphilwi phai kha, hakhe hai hwnwi san kha, “Ang nai-o, tabuk’-no nwng ano baptisma rwnai Johonni bokhorok mairango khe rw phai di!”

26Hakhe bugra belai khe bwkha hamya wngjak kha; tamo khe panda phainairokni bwskango swmai tangjak tongma bai Herod a bwrwimano in’-hi hwnwi rohorna nai li ya. 27Hakhe logi logi’-no bugra sebuk khoroksano Johonni bokhorok tubu di hwnwi dagi rohor kha. A sebuk alongo thángwi bini bokhorok tanwi kha, 28hakhe abono mairango khe a bwrwimano rw phai kha, a bwrwima khe abono bumano rwui kha. 29Ulo Johonni sagrirok o kókno khna kha, hakhe bórok phaiwi bini mangno tlangwi phobwi rwi lai kha.

Borok khorok basaino Jisu chá rwmani

(Mat 14.13-21; Luk 9.10-17; Joh 6.1-14)

30Chonghorrok Jisuni thani kiphilwi bórok khlaimarok bai phrwngmarokno bebak sa phai kha. 31Aphuru aro borok kwbángma tháng lai-o phai lai-o wngwi tongma bai Jisu bai bini sagrirok chána suda jora manjak li ya. Aboni bagwino Jisu bórokno hai hwnwi sa kha, “Hwm tho, chwng simi siring siring kwrẃngsa-o tháng anw, hakhe norokbo kisa lenglaui man anw.” 32Hakhe bórok simi siring siring kwrẃngsa-o rung bai khe lam rw kha.

33Hai phano luku kwbángma bórok thángmano nuk rwgwi bórokno sini rwk kha, hakhe taun brúm brúmni bororok ha tẃi khachik lai thángwi Jisu bai bini sagrirokni slái swkang aro sógwi tong lai kha. 34Rungni ongkhor kheno Jisu aswk borok kwbángmano nugwi jai kheno kháirokjak kha, tamni hwn khe bórok mwrwknai kwrwi merarok hai. Hakhe bo bórokno kwbángma phrwng kha.Lek 27.17; 1Ha 22.17; 2Bo 18.16; Esk 34.5; Sak 10.2; Mat 9.36. 35Ulo sal tháng twtwi wng kheno sagrirok bini thani phaiwi hai hwnwi sa kha, “Belai lerwi tháng kha, oro mungsa phano manthok ya. 36Gana-gini kamirogo thángwi chámung paiwi manna tẃi khe o bororokno rohor si di.”

37Tamo khe Jisu bórokno hai hwnwi sa kha, “Norok’-no chá rw di.”

Hakhe bórok bono hai hwnwi sa kha, “Chwng thángwi rang nwirani ruti paiwi bórokno chá rwnai, hai da hwn?”

38Hakhe Jisu bórokno hai hwnwi sa kha, “Norokni thani lep bwswk ruti tong? Thángwi naiwi di.”

Bórok naiwi hai hwnwi sa phai kha, “Ruti lepba tei á maknwi tongo.”

39Hakhe Jisu bebakno jabra saka buthup buthup khe achuk rw di hwnwi sagrirokno dagi kha. 40Aboni bagwino bororok sara khe tei bachi khe bwtang bwtang khe achuk lai kha. 41Jisu a ruti lepba bai á maknwino naui nokhasa naisaui. Kaitorno hambai rw kha, hakhe a rutino swkagwi bororokno rwui di hwnwi sagrirokno rw kha. Hakhe bo bórok bebakno a á maknwinobo banta khe rw kha. 42Jotono ok pungwi chá kha. 43A ruti bai á bára tong rwkmano sagrirok khochamani ura khung chiknwi pung kha. 44A ruti chánairok chwlarok khorokbasai wng anw.

Jisu twi saka tẃi himmani

(Mat 14.22-23; Joh 6.15-21)

45Hakhe Jisu logi logi’-no bini sagrirokno rungo kasa rwui twibom ayang naro bini slái swkang Betsaida-o rohor kha, yang khe bo a lukurokno rohor kha. 46Bo sagrirok bai kak laiwi suri sanna bagwi hathái-o tháng kha. 47Sanja jora a rung wng kha twibom kwcharo, Jisu aphuru khe hakungo saichung. 48Bo nuhur kha nokbar pail cha ya khe sipchaui tongma bagwi sagrirok rung chokthokjak ya wngwi tong kha; hakhe phungni kaitham bai kaidok kwcharo bo twi saka tẃi himwi bórokni thani phaimani. Bo bórokno láiwi thángna naimani. 49Phiya bórok bono twi saka tẃi himwi tongma nuhurwi, “Omo ba burasa se bla!” hwnwi khá kaui chirikhók lai kha. 50Tamni hwn khe bórok bebak’-no bono nugwi belai khe kirijak bai kha.

Hakhe Jisu logi logi’-no bórok bai kók sa laiwi hai hwnwi sa kha, “Ta kiri di! Omo ang se, khá tor di!” 51Bo bórokni rungo kasaui kha, hakhe nokbar thak kha. Sagrirok belai uanajak bai kha. 52Bórok a rutini kók romwi man li ya. Bórokni bwkha kha si ya.

Genesareto Jisu hamyarokno ham rwmani

(Mat 14.34-36)

53Bórok twibom láiwi Genesaret ha-o phai sók phai kha, aro bórok rung kha lai kha. 54Bórok rungni ongkhor kheno bororok Jisuno sini kha. 55Hakhe bórok a amchoi gwnangwi khachigwi hamyarokno uaing bai khe Jisu tongo hwnwi khna thani-o tubu kha. 56Hakhe Jisu thángmani kami brúm brúm’-no, taun brúm brúm’-no, khampar brúm brúm’-no bororok hamyarokno bajar kwcharo tubu lai kha, hakhe bini dulai buchuk phano hamyarokno tang rw jaba di hwnwi bono koi lai kha; phiya a tangnairok bebak’-no ham rwjak bai kha.

MARK 7

Chuchusongni sakni kerong

(Mat 15.1-9)

1Aphuru Pharisairok tei Jerusalemni phainai Kerong phrwngnairok khoroknwi khoroktham Jisuni thani kuthum lai kha. 2Bórok nai ba bini sagrirok baksa yak sú yaui mai cháui tong lai kha; abo wng kha Pharisairok bororokno phrwngmani abo hai klai ya.

3Tamni hwn khe chuchusongni sakni manẃi phaimani kerongno Pharisairok hai’-no rákhogo tei Judairokbo hai’-no rákhogo, bórok kaham khe yak súyasa mai chá ya. 4Bajarni phai khebo bórok swkang súyasa mungsa pha’-no chá ya. Bórok manẃi phaimani tei kwbángma kerongroknobo rákhogo, abo khe ahai: mairang lota, tama-kangsani manwirok tei majangrok bórok kaham khe ma sú-o.

5Aboni bagwino Pharisairok bai Kerong phrwngnairok Jisuno hai hwnwi sẃng kha, “Nini sagrirok tamo wngwi chini chuchusong rwui klangmani kerongno rákhok ya sla? Tamo wngwi yak sú yaui ba mai chá?”

6Jisu bórokno hai hwnwi sa kha, “Jisaia bwswk sói khe norokni kók sa lang kha. Bo hai hwnwi swiwi klangma hai’-no norok phatra gwja:

“ ‘O bororok búkhúk bai ano lobo phiya bwkha le bórokni ang bai chaljak se,

hwnwi Kaitor sa-o.

7Bórok ano surina samung

nangjak ya,

tamni hwn khe borok banokmani kerongno se

bórok Kaitorni kerong hwnwi phrwngo.’Jis 29.13.

8“Norok Kaitorni dagimano khibi rwui borok banokmani kerongno se rákhogo, mairang-lotarokno súmarok hai khe norok teibo kwbángma abo hairok khlai lai-o.”

9Hakhe Jisu hai hwnwibo sa kha, “Norok banokmani kerongno rákhogwi tongna bagwi Kaitorni dagimano nornani norok kaham khe lama pharjak. 10Musi norokno hai hwnwi dagi kha, ‘Nwng ma-phano sak nang ya ta wng di,’ phiya ‘Khoroksa swk buma buphano hamya sa khe bo bu se butharjakna klainai.’Lam 20.12; Uái 5.16; Lam 21.17; Leb 20.9. 11Aile norok hai hwnwi sa-o, bumano eba buphano chubanani khoroksani mungsa swk tongwi suda se, phiya ‘Abo Korban se.’ hwnwi saui 12a borok buphano eba bumano chubanani yógwi thángo. (Korban hwnmani abo Kaitorni thani yapharjak hwnma se.) 13Omo hai kheno phrwng phrwng laiwi norok Kaitorni kókno samung nang ya khlai tongo. Norok omo hai khlaimani teibo kwbángma tongo.”

Tamo tamo borokno hamya khlai?

(Mat 15.10-20)

14Aphuru Jisu lukuno tei uáisa bini thani ringwi hai hwnwi sa kha. “Norok bebak’-no ani o kókno khwbo khna di, sibo si di. 15Phatarni bisingo habwinai abo tẃi manwi borokno hamya khlai man ya, bisingni phataro ongkhornai se bono hamya khlai-o. 16[Khunju tong khe ba o kókno khna di.]”

17Bo luku bai kak laiwi nogo tháng khe sagrirok bono o rwngthomani kók sẃng kha. 18Jisu bórokno hai hwnwi sa kha, “Norokbo bui hai’-no si ya gwja! Norok romwi man ya diba! Phatarni mungsa manwi borokni bisingo hap phano abo a borokno hamya khlai man ya. 19Tamni hwn khe abo borokni bwkha bisingo habwi ya, bohogo se habwi-o, ulo bwsakni ongkhorwi thángo.” (Omo sa thani Jisu bebak chámungno cháui mano hwnwi sa kha.)

20Hakhe bo hai hwnwibo sa kha, “Borokni bisingni ongkhormani abo se borokno hamya khlai-o. 21Tamni hwn ba borokni bisingni, borokni bwkha bisingni se uansukma hamyarok ongkhorwi phai-o, abo se borokno tongmung sitra tong rw-o, khok rw-o, borok buthar rw-o, 22buitali-buitala wng rw-o, khámai rw-o, samung hamya khlai rw-o, bandi rw-o, sak tongthok tẃi tong rw-o, músú rw-o, kók hamya sa rw-o, kung chuk rw-o, khá si ya khlai rw-o, 23omo tẃi manwi hamyarok bebak’-no borokni bisingni ongkhorwi phai-o, hakhe borokno hamya khlai-o.”

Bwrwi khoroksa poito khlaimani kók

(Mat 15.21-28)

24Jisu aroni kutulwi Tur taun ganani amchoi-o tháng kha. Bo nok khungsa-o kasaui kha; bono aro tongo hwnwi khoroksano phano saui man ya tẃi khe bo tongna naimani, hai phano bo nukjak yaui tongwi man li ya. 25Bwrwima khoroksa tongmani, bini bwsajwk mwtai hamya kolobjak; Jisuni kók khna kheno bo phaiwi bini yakungo klai phai kha. 26A bwrwima buini borok se, Siriyani Phoinikia ha-o achai-o. Bwsajwkni bisingni mwtai hamyano rwkhlai ja di hwnwi bo Jisuno koi kha. 27Tamo khe Jisu hai hwnwi sa kha, “Bwsarokno swkang chá rw grana; bwsarokni chámung naui sẃirokno lukhlai rwma cha ya.”

28A bwrwima hai hwnwi sa kha, “Hodasa, sẃirokbo bwsarok cháma bára ha-o klaimano chá-o!”

29Hakhe Jisu bono hai hwnwi sa kha, “Omo tẃi kók sama bai nwng nogo tháng di, nini nwsajwkno mwtai hamya yakarwi klang kha.”

30Hakhe bo nogo kiphilwi tháng kha, bini bwsajwkno ríyano rokojak nugwi kha; bini bisingni mwtai hamya sói’-no bono yakarwi klang kha.

Nathongno Jisu khna rwmani

31Jisu hakhe Tur amchoini ongkhorwi Sidon tẃi khe Taun Kaichi amchoi bising tẃi Galili twibom rukungo tháng kha. 32Borok khoroknwi khoroktham borok khoroksano bini thani tubu kha, a tubujaknai nabo nathong, tobo tota. Bórok a borokni saka yak bera di hwnwi Jisuno koi kha. 33Jisu bono simi luku bai swkagwi tlang kha, hakhe a borokni khunju-o bini yasi sora kha, khuktwi musu-ui a borokni bwslaino tang kha. 34Hakhe Jisu nokhasa naisaui hama kolok rohorwi a borokno hai hwnwi sa kha, “Ephata”, omo “Phiyokjak di,” hwnma se.

35Logi logi’-no a borokni khunju phiyokjak kha, bwslai bor man kha, hakhe bo kaham kheno kók saui tong kha. 36Aphuru Jisu bórok bebakno “O kókno khoroksano phano ta sa di,” hwnwi ragdama khlai kha; aile bo ta sa di hwnwi ragdama khlai rwrwk bórok o kókno pír rwrwk. 37Omono khnanairok belai uanajagwi hai hwnwi sa lai kha, “Bo bwswk khe jotonono kaham khlai! Bo nathongnobo khna rw-o, bobanobo kók sa rw-o!”

MARK 8

Borok brwisaino Jisu chá rwmani

(Mat 15.32-39)

1Aphuru haino hai borok kwbángma kuthum phai kha. Bórokni mungsa phano chánani kwrwi, hakhe Jisu sagrirokno bini thani ringwi hai hwnwi sa kha, 2“O bororokno ang kháirok laha, tamni hwn khe bórok nokha saltham ang bai máng, hakhe tabuk chánani mungsabo kwrwi. 3Ang bórokno chá rw yaui nogo rohor khe lama-o bórok lengjak anw, tamni hwn khe baksa hakchalni phainairokbo tongo.”

4Bini sagrirok bono hai hwnwi sẃng kha, “O hasing panthoro aswk bororokno sabo biyangni aswk chámung rutugwi chá rwui mannai?”

5Jisu bórokno hai hwnwi sẃng kha, “Norokni thani lep bwswk ruti tong?”

“Ruti lepsni tongo,” hwnwi bórok sa kha.

6Bo lukuno ha-o achuk di hwnwi hwn kha. Hakhe bo a ruti lepsnino naui Kaitorno hambai rw kha, abono swkagwi lukuno banta khe rw di hwnwi bini sagrirokni yago rw kha; hakhe sagrirok abono lukuno rw kha. 7Bórokni thani á bwsa bwsabo kisa tongo. Jisu aboni bagwi hambai rwui bororokno abonobo banta khe rw di hwnwi sagrirokno sa kha. 8Jotono ok pungwi chá kha; aro khorok brwisai swk borok wng anw. 9Hakhe bára tong rwkmano sagrirok khochamani ura khungsni pung kha. Ulo Jisu a bororokno rohor kha. 10Hai kheno bo sagrirok bai rungo kasaui Dalmanutha amchoi-o tháng kha.

Soidomni samung naina hwnwi Pharisairok rommani

(Mat 16.1-4)

11Baksa Pharisairok phaiwi Jisu bai tokra rw lai kha. Bo Kaitor bai chongjak da abo potaliui naina bagwi bórok bono mungsa swk soidom phunuk di hwn lai kha.Mat 12.38; Luk 11.16. 12Jisu hama kolok rohorwi hai hwnwi sa kha, “Tabukni bororok tamo wngwi soidomni samung naina hwn? I’nhi, ang norokno sa-o, o bororokno amo hai soidom mungsa phano phunukjak glak.”Mat 12.39; Luk 11.29.

13Aswk hwnwi bo bórokno yakarwi klang kha, hakhe rungo kasaui twibom ayang naro lam rw kha.

Jisu chuanni kók samani

(Mat 16.5-12)

14Sagrirok ruti bára tubuna pokjak kha, hakhe rungo bórokni thani lepsa susuk se tongo. 15Jisu bórokno hai hwnwi hus khe rw kha, “Sichaui tong di, norok Pharisairokni chuan bai tei Herodni chuan bai hus khe tong di.”Luk 12.1.

16Bórok kiching bórok hai hwnwi sa lai kha, “Chini thani ruti kwrwini bagwi se bo o kókno sa-o.”

17Bórok sa laimano saui manẃi Jisu bórokno hai hwnwi sẃng kha, “Ruti kwrwi hwnwi norok abo tamo sa lai sla? Tabuk suda norok saui man ya kho diba? Norok romwi man ya kho diba? Aswk da norokni bwkha khá si ya wng? 18Mokol tong twtwi norok nuk ya diba? Khunju tong twtwi norok khna ya diba? Norok muitu kwrwi diba?Jir 5.21; Esk 12.2; Mar 4.12. 19Borok khorokbasaini bagwi ang a ruti lepba swkakmani abono norok muitu man ya diba? Bára tong rwkmano norok khochamani ura khung bwswk pung kha?”

“Ura chiknwi,” hwnwi bórok sa kha.

20Jisu hai hwnwi sẃng kha, “Hakhe ang borok khorok brwisaini bagwi a ruti lepsni swkakmani kók la? Aphuru bára tong rwkmano norok khochamani ura khung bwswk pung kha?”

“Ura sini,” hwnwi bórok sa kha.

21Bo bórokno hai hwnwi sẃng kha, “Hakhe norok tabuk phano si ya kho diba?”

Betsaida-o Jisu phula khoroksano nuk rwmani

22Bórok Betsaida-o phai kha. Aro khoroknwi khoroktham borok phula khoroksano Jisuni thani tubu kha, hakhe a phulano tang di hwnwi bórok bono koi kha. 23Jisu a phulano yak romwi kamini phataro tlang kha. Bo a borokni mokolo khuktwi musu-ui bono tang kha, hakhe “Nwng mungsa swk da nuk sla?” hwnwi sẃng kha.

24A borok naisigwi hai hwnwi sa kha, “Ang bororokno nugo, tamo khe buphangrok himwi tongma hai nugo.”

25Jisu a borokni mokolno tei uáisa tang kha. Aphuru a borok mokol chok chok khe naisigwi tong kha, hakhe bo haino hai nuk phi kha, bo mungsa kwrwi tẃi glang glang khe nuk kha. 26Hakhe bo bono a kami-o ta tháng phi si di tei a wngmarokno a taunni khoroksa swkno phano ta sa di hwnwi nogo kiphilwi rohor kha.

Jisuno Masia hwnwi Pitor gosimani

(Mat 16.13-20; Luk 9.18-21)

27Aphuru Jisu bini sagrirok bai Kaisaria Philipi amchoini kamirogo tháng lai kha. Lama-o bo bórokno hai hwnwi sẃng kha, “Ano sa di, bororok ano sabo hwn?” 28Bórok hai hwnwi sa kha, “Baksa hwno baptisma rwnai Johon, baksa ba hwno Elia, baksa ba diyarirokni bere khoroksa hwno.”Mar 6.14-15; Luk 9.7-8.

29Bo bórokno hai hwnwi sẃng kha, “Norok le tamo hwn? Ang sabo?”

“Nwng Masia,” hwnwi Pitor sa kha.Joh 6.68-69.

30Hakhe Jisu bórokno hai hwnwi ragdama khlai kha, “Ani kók khoroksano phano ta sa di.”

Bo butharjagwi se ma thwinai hwnwi Jisu samani

(Mat 16.21-28; Luk 9.22-27)

31Aphuru Jisu bini sagrirokno hai hwnwi phrwng kha, “Borokni Sajla panjalwi’-no sátokjakna nangnai, okra chakrarok, ochai okrarok tei Kerong phrwngnairok bai norjakna nangnai. Bo butharjaknai, hai phano salthamni ulo thangwi bachanai.” 32Bo o kókno bórokno pháng-pháng kheno sa kha, aboni bagwino Pitor bono simi tlangwi hwn kha. 33Jisu uphilwi bini sagrirokni phaising naisik kha, hakhe Pitorno ahai hwnwi hwn kha, “Tháng di Soitan, ani oro ta tong di. Nwng uansukmarok abo borokni uansukma se, Kaitorni uansukma ya.”

34Aphuru Jisu lukurokno tei bini sagrirokno bini thani ring kha. Bo bórokno hai hwnwi sa kha, “Ani logi phaina khe a borok bini sakni kók ta uansuk thung, bini krus balwi ani logi phai thung.Mat 10.38; Luk 14.27. 35Kwthang tongna muchungnai borok bo thwinai, ani bagwibo Kothoma Kahamni bagwibo thwinai borok bo thangnai.Mat 10.39; Luk 17.33; Joh 12.25. 36Thwiwi tháng kha hwn khe bebak swngcharno manẃiba a borok tamo manma klai? 37Thwiwi tháng khe borok tei tamo khe thang phinai? 38Hakhe Kaitorno kiri ya wngwi tongmani o mol hamyani molo tumungno khoroksa swk ano tẃiwi, phiya ang samani kókno tẃiwi lachijak khe Borokni Sajlabo bini Buphani chẃngsacha bai chẃngsacha wngwi suari kwtharrok bai phai phuru a borokno tẃiwi lachijak anw.”MARK 8

Borok brwisaino Jisu chá rwmani

(Mat 15.32-39)

4Bini sagrirok bono hai hwnwi sẃng kha, “O hasing panthoro aswk bororokno sabo biyangni aswk chámung rutugwi chá rwui mannai?”

5Jisu bórokno hai hwnwi sẃng kha, “Norokni thani lep bwswk ruti tong?”

“Ruti lepsni tongo,” hwnwi bórok sa kha.

Soidomni samung naina hwnwi Pharisairok rommani

(Mat 16.1-4)

13Aswk hwnwi bo bórokno yakarwi klang kha, hakhe rungo kasaui twibom ayang naro lam rw kha.

Jisu chuanni kók samani

(Mat 16.5-12)

16Bórok kiching bórok hai hwnwi sa lai kha, “Chini thani ruti kwrwini bagwi se bo o kókno sa-o.”

“Ura chiknwi,” hwnwi bórok sa kha.

20Jisu hai hwnwi sẃng kha, “Hakhe ang borok khorok brwisaini bagwi a ruti lepsni swkakmani kók la? Aphuru bára tong rwkmano norok khochamani ura khung bwswk pung kha?”

“Ura sini,” hwnwi bórok sa kha.

21Bo bórokno hai hwnwi sẃng kha, “Hakhe norok tabuk phano si ya kho diba?”

Betsaida-o Jisu phula khoroksano nuk rwmani

24A borok naisigwi hai hwnwi sa kha, “Ang bororokno nugo, tamo khe buphangrok himwi tongma hai nugo.”

Jisuno Masia hwnwi Pitor gosimani

(Mat 16.13-20; Luk 9.18-21)

29Bo bórokno hai hwnwi sẃng kha, “Norok le tamo hwn? Ang sabo?”

“Nwng Masia,” hwnwi Pitor sa kha.Joh 6.68-69.

30Hakhe Jisu bórokno hai hwnwi ragdama khlai kha, “Ani kók khoroksano phano ta sa di.”

Bo butharjagwi se ma thwinai hwnwi Jisu samani

(Mat 16.21-28; Luk 9.22-27)

MARK 9

1Hakhe bo teibo hai hwnwi sa kha, “O kókno muitu narwk di, oro baksa tongo Kaitorni ha kwplai khe phaimano nuk ya sak thwi glak.”

Jisu mul philmani

(Mat 17.1-13; Luk 9.28-36)

2Nokha saldokni ulo Pitor, Jakob tei Johonno simi tlangwi Jisu hathái kuchugo tháng kha. Bórok naisigwi tong twtwi’-no bo mul philwi tháng kha; 3hakhe bini rírok chẃngsaui phurchaui phai kha, aswk khe phur kha o swngcharo abo ahai khe kebo rí sú-ui mannai kwrwi. 4Aphuru a sagri khorokthamrok Elia bai Musino Jisu bai kók sa lai tongma nuk kha. 5Pitor Jisuno hai hwnwi sacha kha, “Hoda chwng oro tongmani abo kaham’-no. Chwng oro basai khungtham tang anw, nini khungsa Musini khungsa, tei khungsa Eliani.” 6Pitor bai teirok aswk kirima hapjak kha tamo sana nangno bo abo saui man li ya.

7Aphuru chumui dolasa bórokno kobol phai kha, hakhe a chumui bisingni o kók sajak kha, “Bo ani khájani Sajla; bini kók khna di!”Mat 3.17; Mar 1.11; Luk 3.22. 8Sagrirok yang yang naharwi achomsa kebono nuk li ya, Jisu simi se bórok bai bachajak.

9Bórok hatháini ongkhorwi phai phuru Jisu bórokno hai hwnwi ragdama khlai kha, “Borokni Sajla kwthwini thangwi bacha ya sak norok o nukmano kebono ta sa di.”

10Bórok bini ragdama khlaimano khna kha, tamo khe “O kwthwini thangwi bachana hwnmani abo tamni kók?” hwnwi bórok kiching bórok sa lai tong lai kha. 11Hakhe bórok Jisuno hai hwnwi sẃng lai kha, “Elia se swkang ma phai granai hwnwi tamo wngwi Kerong phrwngnairok saui tong sla?”Mal 4.5; Mat 11.14. 12Bo hai hwnwi sa kha, “I’n, joto thiti khlaina bagwi Elia swkang phai granai. Hakhe Borokni Sajla panjalwino sátokjagwi norjaknai hwnwi Elembago tamo wngwi sajak sla? 13Hai phano ang norokno o kók sa-o, Elia phaiwi tháng kha, hakhe bini bagwi Elembago sama hai’-no bororok bórokni muchung tẃi bono khlai kha.”

Jisu chwrai khoroksano sra rwmani

(Mat 17.14-21; Luk 9.37-43)

14Bórok tei sagrirokni aro kiphilwi phaiwi luku kwbángma nuk phai kha. Kerong phrwngnai khoroknwi khoroktham sagrirok bai tokra rw lai tong lai kha. 15Bororok Jisuno nukma logi’-no belai uanajak bai kha, hakhe bini thani khachik laiwi bono khulum lai kha. 16Jisu bini sagrirokno hai hwnwi sẃng kha, “Norok bórok bai tamni tokra rw lai?”

17Luku bisingni borok khoroksa hai hwnwi sa kha, “Hodakra, angslano ang nini thani tubu kha; mwtai hamya bono kolobwi tongo, hakhe bo kók saui man ya. 18A mwtai hamya bono kolob brúm brúm ha-o songraui rw-o, hakhe bo khuktwi phena tikhlai-o, bua hulo, phiya bini bwsak raksaui phai-o. Ang nini sagrirokno a mwtai hamyano rwkhlai di hwnmani bórok man li ya.”

19Jisu bórokno hai hwnwi sa kha, “Norok bwswk se poito kwrwi gwja! Norok bai ang tei sal bwswk ma tongna nangno? Tei sal bwswk norokno khá ma lokna nangno? Tubu di a chwraino.” 20Hakhe bórok Jisuni thani bono tubu kha.

A mwtai hamya Jisuno nukma logi’-no a chwraino leng rw kha, hakhe bo ha-o klaiwi khuktwi phena tikhlai twtwi pra-pra wngwi tong kha. 21“Bo ahai wngmani bwswk balok kha?” hwnwi Jisu buphano sẃng kha.

“Chwrai phangsni simi’-no.” hwnwi bo sa kha. 22“A mwtai hamya hór bai twi-o khiklaiwi bono kwbángma’-no butharna nai kha. Nwng man khe ba chwngno khairogwi chuba ja di!”

23“I’n, nwng man khe ba!” hwnwi Jisu bono sa kha. “Poito gwnangni thani jotono wngwi mano.”

24Bupha logi logi’-no chirikhógwi muktwi khiklai kabwi hai hwnwi sa kha, “Subrai, ang poito khlai ma le khlai-o, tamo khe rak tha ya ba; abono rak rw di!”

25Jisu nai ba bororok jabirwi phai rwrwgo, hakhe bo a mwtai hamyano hai hwnwi damrok kha, “O nathong bai bobani mwtai hamya, ang nono dagi-o, o chwraini bisingni ongkhorwi phai di. Bini bisingo nwng tei ta hap si di!”

26A mwtai hamya chirikhógwi a chwraino belai khe leng rwui ongkhorwi phai kha. A chwrai kwthwi hai wng súk kha, hakhe bororok “Bo thwi se thwi kha!” hwnwi sa lai kha. 27Tamo khe Jisu a chwraini yak romwi bacha rw kha, hakhe bo bacha kha.

28Jisu nok bisingo habwi tháng kheno bini sagrirok tepsa khe bono hai hwnwi sẃng kha, “Chwng tamo wngwi abono rwkhlai man li ya sla?”

29“Suri san khe simi se omo hai’-no rwkhlai mano, tei mungsabo man ya,” hwnwi Jisu sa kha.

Bo butharjakna kókno Jisu hai’-no hai samani

(Mat 17.22-23; Luk 9.43-45)

30Bórok aroni kutulwi Galili bising tẃi tháng kha. Bo buro tong abo Jisu kebono saui man rw ya khe tonna nai-o, 31tamni hwn khe bo aphuru sagrirokno hai hwnwi phrwngwi tongo, “Borokni Sajla bororokni yago yapharwi rohorjaknai, hakhe bórok bono butharnai, ahai phano salthamni ulo bo thangwi bachanai.”

32Bórok o kókno romwi man li ya, bono swbo sẃng rak li ya.

Sabo tor kuk?

(Mat 18.1-5; Luk 9.46-48)

33Bórok Kapharnaumo phai kha, hakhe noksingo hap kheno Jisu sagrirokno hai hwnwi sẃng kha, “Lama-o norok tamni tokra rw lai?”

34Lama-o bórok sabo tor kuk hwnwi tokra rw lai phaima bai tháisa phano pungwi man li ya.Luk 22.24. 35Hakhe Jisu achugwi sagri chiknwirokno ringwi hai hwnwi sa kha, “Swkang wngna muchungnai borok bo jotoni ulobo ma tong rwknai, jotoni selengbo ma wngnai.”Mat 20.26-27; 23.11; Mar 10.43-44; Luk 22.26. 36Bo chwrai khoroksano naharwi bórokni kwcharo bacha rw kha. Hakhe a chwraino kwbagwi bo bórokno hai hwnwi sa kha, 37“Omo hai chwraino yachaknai borok bo ano’-no yachago; phiya ano yachaknai borok bo ano simi ya, ano rohornainobo yachago.”Mat 10.40; Luk 10.16; Joh 13.20.

Chwngno kebeng ya borok bo chini bwkhak se

(Luk 9.49-50)

38Johon bono hai hwnwi sa kha, “Hodakra, nini mungwi khoroksano mwtai hamyarok rwkhlaimani chwng nuk kha. Chini borok ya hwnwi chwng bono ahai ta khlai di hwn kha.”

39Jisu hai hwnwi sa kha, “Hai ta hwn di, tamni hwn khe ani mungwi ha-o nuk ya samung tangnai bo doro-khoro ano hamya saui man glak. 40Chwngno kebeng ya borok bo chini bwkhak se.Mat 12.30; Luk 11.23. 41O kókno muitu narwk di, Khristoni borok hwnwi norokno twi khopsa phano khan rwnai borok bo bini sokat ma se mannai.”Mat 10.42.

Sumsogo khiklaimani kók

(Mat 18.6-9; Luk 17.1-2)

42“Tumungno khoroksa swk ano poito khlai tongnai o chwrai basrarokni bere khorok swkno sumsogo khiklai khe a borokno totra-o holongdap kotorma khaui twijlango khiklai rwma se ham kugo. 43Hakhe nini yak nono sumsogo khiklai khe abono tansu-ui khibi di. Yak kongnwi gwnang khe morke-o thwi phlai ya hóro hapmani slái nwng yak kongsa kwrwi khe mwthangjakma se ham kugo.Mat 5.30. 44[Aro ‘bórokni bwsago yóng klai phlai máng tongnai, phiya hórbo thwi phlai ya máng tongnai.’] 45Phiya nini yakung nono sumsogo khiklai khe abono tansu-ui khibi di. Yakung kongnwi gwnang khe morke-o khiklaijakmani slái nwng yakung kongsa kwrwi khe mwthangjakma se ham kugo. 46[Aro ‘bórokni bwsago yóng klai phlai máng tongnai, Phiya hórbo thwi phlai ya máng tongnai.’] 47Phiya nini mokol nono sumsogo khiklai khe abono ekhregwi khibi di. Mokol kolnwi gwnang khe morke-o khiklaijakmani slái nwng mokol kolsa kwrwi khe Kaitorni ha-o hapmani se ham kugo.Mat 5.29. 48Aro ‘bórokni bwsago yóng klai phlaiwi máng tongnai, phiya hórbo thwi phlai ya máng tongnai.’Jis 66.24.

49“Hór bai jotono mui-o sóm rwjak hai khlaijaknai

50“Sóm manwi kaham’-no, tamo khe pab ya wngwi tháng khe norok abono bahai khe hai’-no hai pab rw phinai?

“Norok sóm nangjak wng di, norok kwchang kwchang khe tong lai di.

MARK 10

Jisu kak laimani kók samani

(Mat 19.1-2; Luk 16.18)

1Jisu aroni kutulwi Judia amchoi-o tháng kha, Jordan twimani ayang narobo tháng kha. Lukurok haino hai bini thani kuthum phai kha, hakhe swkangrogo phrwngma hai’-no bo bórokno phrwng kha.

2Pharisai khoroknwi khoroktham bini thani phaiwi bono khẃi-o kwcha rwna nai kha. “Chwngno sa di, hikno kagwi mano hwnwi chini Kerongo sa da sa?” hwnwi bórok sẃng kha.

3Jisu hai hwnwi sẃng kha, “Musi norokno tamo hwn?”

4Bórok hai hwnwi sa kha, “Kaksen swiwi rw khe hikno kagwi rohorwi mano hwnwi Musi chwngno hwno.”Uái 24.1-4; Mat 5.31.

5Jisu bórokno hai hwnwi sa kha, “Norok tẃi khá siyarokno phrwngna bagwi Musi a dagimano swi klang kha. 6Phiya ba agi takchengjak phuru hai hwnwi sajak kha, ‘Kaitor borokno chwla bai bwrwi khe snam kha.Yap 1.27; 5.2. 7Omoni bagwino borok buma bupha bai kagwi bihik bai thansa wngnai, 8hakhe a kwnwi kaisa wngnai.’ Aboni bagwino bórok tei kwnwi li ya, kaisa se.Yap 2.24. 9Aboni bagwino Kaitor thepamano borok ta swkak thung.”

10Bórok noksingo kiphilwi tháng khe sagrirok Jisuno aboni kók sẃng kha. 11Bo bórokno hai hwnwi sa kha, “Hikno kagwi tei khoroksa bwrwi nanai bo lupcha se; 12abo hai’-no bwsaino kagwi tei khoroksa chwla nanai bo’-bo buitali se.”Mat 5.32; 1Ko 7.10-11.

Chwrairokno Jisu hamjakmani

(Mat 19.13-15; Luk 18.15-17)

13Chwrairokno tang thung hwnwi baksa borok chwrairokno Jisuni thani tubu kha. Hakhe sagrirok a bororokno ta tubu di hwnwi hwn kha. 14Jisu abono nugwi jolijak kha, hakhe bini sagrirokno hai hwnwi sa kha, “Chwrairokno ani thani rohor di, ta kasu di, omo tẃi bororokni bagwino Kaitorni ha. 15O kókno muitu narwk di, chwrai hai khe Kaitorni hano yachak ya khe khoroksa phano aro habwi se man ya.”Mat 18.3. 16Bo a chwrairokno bamwi khoroksa khoroksa khe bórokni sago yak rwui ham di hwn kha.

Gwnangrok Kaitorni ha-o habwi manna tugo

(Mat 19.16-30; Luk 18.18-30)

17Jisu lam rwna nai phuru borok khoroksa khachigwi bini bwskango yáskú sungwi klai phaiwi hai hwnwi sẃng kha, “O hoda kaham, kwthang tong phlaina bagwi ang tamo ma khlaithai klai?”

18Jisu bono hai hwnwi sẃng kha, “Nwng tamo wngwi ano kaham hwn? Kaitor simi se kaham, tei khoroksa phano kaham kwrwi. 19Nwng kerong dagimano saui mano; ‘Borok ta buthar di, buitali-buitala ta wng di, ta khok di, tatal ta sa di, ta phemlok di, buma buphano sak nang ya ta wng di.’ ”Lam 20.13-16; Uái 5.17-20; Lam 20.12; Uái 5.16.

20A borok hai hwnwi sa kha, “Hodakra, chwrai phangsni simi’-no ang omorok bebak’-no rákhogwi phai kha.”

21Jisu bono hamjagwi naisik kha, hakhe hai hwnwi sa kha, “Nini khlaijaknai tei mungsa se tong si-o. Tháng di, nini tong kwrwi bebakno phal baiwi a rangno kwrwirokno rw di, hakhe chuknoha-o nini rang khatijak anw. Omo khlai bai khe ani logi phai di.” 22O kók khnaui a borokni bumukhang sopsa som kha, bo khá thwijagwi tháng kha, bo le snamwi gwnang bla.

23Jisu yang yang naisigwi sagrirokno hai hwnwi sa kha, “Gwnangrok Kaitorni ha-o hapnani bwswk se kutuk!” 24Sagrirok a kók khnaui uanajak kha, tamo khe Jisu hai hwnwibo sa kha, “Chwraisarok, Kaitorni ha-o hapnani10.24: Kubun bijap kwchamo khe o kóknobo swi-o rang puisa-o bwkha beranairok. bwswk se kutuk! 25Suchi bwlam tẃi mangingang hapna se lai anw ba, Kaitorni ha-o gwnangrok hapnani aswk lai glak!”

26Aboni bai sagrirok belai uanajagwi “Hakhe sabo mwthangjaknai sla?” hwnwi sẃng lai kha.

27Jisu bórokno naisigwi hai hwnwi sa kha, “Borok omono khlai man ya phano Kaitor khlai mano; Kaitor jotono khlai mano.”

28Pitor aphuru khe hai hwnwi sacha kha, “Nai di, chwng joto khibi baiwi nini logi phai kha.”

29Jisu hai hwnwi sa kha, “Au, ang norokno o kók sa-o, ani bagwibo Kothoma Kahamni bagwibo nok huk, takhuk bukhuk, buma bupha, chwrai khonai tei kheto panthor khibinai borok 30bo o molo aboni slái phano kwbángma mannai. Bo sa-rani bára nok huk, takhuk bukhuk, buma, chwrai khonai tei kheto-panthor mannai; aboni logi sabo sátokjaknai; phiya phainai molo bo mwthangjak phlainai. 31Hai phano tabukni swkangrok baksa baksa uklogo tong rwk anw, phiya tabukni uklokrok baksa swkang wng anw.”Mat 20.16; Luk 13.30.

Bo butharjakna kókno Jisu omo bai khe uáitham samani

(Mat 20.15-19; Luk 18.31-34)

32Bórok aphuru Jerusalem bwkhak him laijak. Jisu sagrirokni swkang swkang himjak, sagrirok uanama hapjak; uklogo himnai bororok kirima hapjak lai kha. Jisu tei uáisa sagri chiknwirokno simi tlangwi bini sago nang phainanirokno sa kha. 33Bo hai hwnwi sa kha, “Khna di, chwng Jerusalemo toksaui thángnai, arono Borokni Sajla ochai okrarok tei Kerong phrwngnairokni yago yapharwi rohorjaknai. Bo ma butharjakna nangnai hwnwi bórok hwnnai, hakhe bono buini bororokni yago yapharwi rohornai. 34Bórok bono mwnwi lainai, khuktwi musunai, swpraknai, hakhe butharnai. Hai phano salthamni ulo bo thangwi bachanai.”

Jakob bai Johon koimani

(Mat 20.20-28)

35Aphuru Sebedaini bwslasong Jakob bai Johon Jisuni thani hai hwnwi sa phai kha, “Hodakra, chwng sanma hai nwng khlai thung hwnwi chwng nai-o.”

36“Norok tamo nai? Ano tamo khlai di hwn?” hwnwi Jisu bórokno sẃng kha.

37Bórok hai hwnwi sa kha, “Nwng chẃngsacha khe bugra wng phuru chwngno nwng bai achuk rw di, khoroksano yagra, tei khoroksano yaksi.”

38Jisu bórokno hai hwnwi sa kha, “Norok tamo san abo norok saui man ya. Ang nungnanino norok nungwi da mano ba? Ang baptisma nananino norok naui da mano ba?”Luk 12.50.

39“Chwng mano,” hwnwi bórok sa kha.

Jisu bórokno hai hwnwi sa kha, “Ang nungnanino norok ma le ma nungnai, phiya ang baptisma nanano norok ma le ma nanai, 40tamo khe sabono ba yaksi achuk rwnai, abo ang chongwi man ya, Kaitor se abo achuk rwnai. Bo chongwi tongmani a bororokno se aro achuk rwnai.”

41Tei sagri khorokchirok aboni khnaui Jakob bai Johonno jolijak kha. 42Hakhe Jisu bórok bebak’-no bini thani ringwi hai hwnwi sa kha, “Norok saui mano habugra hwnjaknairok bororokno kók khna rwui tongo, bokhorokrokbo ahai’-no khlai-o. 43Norokni hwn khe ahai ya. Norokni bere kotor wngna sadinai borok bo teirokni seleng ma khatinai,Luk 22.25-26. 44phiya norokni bere bokhorok wngna sadinai borok bo jotoni seleng ma khatinai.Mat 23.11; Mar 9.35; Luk 22.26. 45Hwm ba Borokni Sajla suda bui bai naijakna nukjakna phai ya; buino se naina nukma phai-o hakhe aswk bororokno phiyókna bagwi butharjakna se phai-o.”

Bartimai phulano Jisu nuk rwmani

(Mat 20.29-34; Luk 18.35-43)

46Bórok Jeriko sók phai kha, Bini sagrirok bai tei aswk bororok bai Jisu aroni kutul phuru Timaini bwsla Bartimai hwnwi phula khoroksa lama gana achugwi bírwi tongo. 47Bo abo Nasaretni Jisu hwnwi khna khe’-no hai hwnwi chirikhókna chengsa kha, “O Jisu, Daudni sajla! Nwng ano kháirok jaba di!”

48Aswk bororok bono “Ta kutuk di!” hwnwi damrok rwrwk bo teibo sotonwi “O Jisu, Daudni Sajla! Nwng ano kháirok jaba di!” hwnwi chirikhók rwrwk.

49Jisu bathagwi hai hwnwi sa kha, “Ring di bono.”

Hakhe bórok a phulano ringwi hai hwnwi sa kha, “Ta uana di. Bacha di, bo nono ringo.”

50Bo bini dulai khugwi bathrong bárwi Jisuni thani phai kha.

51Jisu bono hai hwnwi sẃng kha, “Nwng tamo nai? Ano tamo khlai di hwn?”

“Hoda, ang mokol nuk phina muchungo,” hwnwi bo sa kha.

52“Tháng si di, nini poito nono ham rw kha,” hwnwi Jisu bono sa kha.

Bo logi logi’-no mokol nuk kha, hakhe lama-o Jisuni logi tháng kha.

MARK 11

Kwplai khe Jisu Jerusalemo hap phaimani

(Mat 21.1-11; Luk 19.28-40; Joh 12.12-19)

1Bórok Betphagi tei Bethania tauno Jerusalem gana sók phaiwi Tháistwi hathái-o phai lai kha. Jisu aphuru bini sagri khoroknwino 2hai hwnwi saui rohor gra kha, “Bwskangni u kami-o tháng di. Norok aro sógwima logi’-no khoroksa bai phano kasajak ya kho abo tẃi korai masa nugwi anw. Abo khengwi oro tubu-ui phai di. 3‘Norok tamo wngwi omo hai khlai?’ hwnwi khoroksa swk sẃng khe hai hwnwi sa di, ‘Hoda omono samung nangjago, bo dakti’-no oro kiphilwi rohoro anw.’ ”

4Hakhe bórok thángwi lama-o nok duglamo khajak korai masa nugwi kha. Bórok abono khengwi tong phuru 5aro bachaui tongnairok baksa hai hwnwi sẃng kha, “Norok tamo wngwi o koraino kheng?”

6Bórok Jisu saui rohorma hai kheno sa kha, hakhe a bororok bórokno rohor kha. 7Bórok a koraino Jisuni thani tubu-ui aboni saka bórokni rí phinwi rw kha, hakhe Jisu kasa kha. 8Luku kwbángma bórokni rí lama-o boui rw lai kha, baksa ba chara-o buphang bedekrok tanwi lama-o beraui rw lai kha. 9Bwskango himnairok bai uklogo himnairok hai hwnwi chirikhók lai kha, “Kaitorno lob di!11.9 Eba Hosana. Subraini mungwi phainaino Kaitor hamari rw thung!Lob 118.26. 10Subraini mungwi phaina hwnmani chini Apha Daudni a hano Kaitor hamari rw thung! Kaitor lobjak thung!”11.10: Kaitor lobjak thung: Eba Hosana.

11Jisu Jerusalemo habwi noktharo tháng kha, hakhe yang yang joto naisik kha. Tamo khe sal thángma bai bo aroni kutulwi sagri chiknwirok bai Bethania-o tháng kha.

Jisu khwichang buphangno swraimani

(Mat 21.18-19)

12Teini salo bórok Bethaniani kiphilwi phai phuru Jisu ok khuijak kha. 13Bo hakchalo tong twtwi bwlái jaksarjak khwichang buphang phangsa nuhur kha, hakhe bo khwichang da manno hwnwi buphango thángwi nai kha; aile aro phaiwi bo bwlái simi se nuk phai si-o, aphuru khwichangni jora wng ya kho. 14Hakhe Jisu a khwichang buphangno hai hwnwi sa kha, “Khoroksa phano nini oroni khwichang ta ma chá thung!”

Bini sagrirok bini o kókno khna kha.

Noktharo bepar thwngnairokno Jisu rwkhlaimani

(Mat 21.12-17; Luk 19.45-48; Joh 2.13-22)

15Bórok Jerusalemo sók phai kheno Jisu noktharo habwi aroni painairokno phalnairokno rwkhlai kha. Bo rang sláinairokni tebul bai pharuk phalnairokni tulrokno philwi rw bai kha, 16hakhe noktharni nokhla tẃi kebono mungsa phano tlang rw li ya. 17Bo aphuru bororokno hai hwnwi phrwng kha, “ ‘Ani nok bebak dophani bagwi suri sanjaknai nok hwnjaknai,’ hwnwi Kaitor samani o kók elembago swijak tongo. Yang norok le omono dagait bothop se snamwi tong kha!”Jis 56.7; Jir 7.11. 18Ochai okrarok bai Kerong phrwngnairok abono khna kha, hakhe Jisuno butharna lama naituk lai kha. Aswk lukurok bini phrwngmano uanajakma bai bórok bono kirijak kha

19Sanja wng khe Jisu bini sagrirok bai taunni kutul kha.

Khwichang buphang bai phrwngmani

(Mat 21.20-22)

20Teini salo phung aisirisiri a lama tẃi himwi tháng phuru bórok a khwichang buphangno nuk kha; abo yarwng gwnangwi bebak kórósajak. 21Pitor aphuruni kókno muitu manjagwi Jisuno hai hwnwi sa kha, “Hodakra nai di, nwng swraimani o khwichang buphang kóróui tháng kha!”

22-23Jisu bórokno hai hwnwi sa kha, “O kókno muitu narwk di, norok Kaitorno poito khlai khe norok u hatháinobo ‘Tháng di, nwng twijlango klai di,’ hwnwi saui mano. Norok samani abo wngnai hwnwi bwkha dudru mudru wng yaui poito khlai khe norokni bagwi abo wngnai.Mat 17.20; 1Ko 13.2. 24Aboni bagwino ang norokno o kók sa-o, norok suri sanwi mungsa swk san khe abono man kha hwnwi poito khlai di, hakhe norok sanmano mannai. 25Phiya bachaui suri san phuru khoroksa swkno jolima tong khe a borokno nakar di, hakhe chuknohani norokni Phabo norokni sumsok nakarnai. 26[Norok buino nakar ya khe chuknohani norokni Phabo norokni sumsok nakar glak.]”Mat 6.14-15.

Jisuni phanni kók sẃngmani

(Mat 21.23-27; Luk 20.1-8)

27Bórok Jerusalemo kiphilwi phai kha. Jisu noktharo himwi tong phuru ochai okrarok, Kerong phrwngnairok tei okra chakrarok bini thani phai kha, 28hakhe bono hai hwnwi sẃng kha, “Nwng bu phan bai omo tẃirokno khlai? Omo tẃirokno khlainani phan nono sabo rw kha?”

29Jisu bórokno hai hwnwi sa kha, “Angbo norokno kók tháisa sẃngnai. Norok abono sa khe bu phan bai omo tẃirokno khlai angbo norokno sanai. 30Norokbo sa di, Johon baptisma rwmani phan le Kaitorni aroni da, borokni aroni?”

31Hakhe bórok kiching bórok hai hwnwi sẃng lai kha, “Chwng tamo sanai? ‘Kaitorni aroni,’ hwnwi sa khebo ‘Norok tamo wngwi hai khe Johonno poito khlai ya sal?’ hwnwi bo chwngbo sẃngnai. 32Phiya ‘Borokni aroni,’ hwnwi sa khebo” (jotono Johonno diyari hwnwi tong laima bai bórok lukuno kirijago.) 33Aboni bagwino bórok Jisuno hai hwnwi sa kha, “Chwng saui man ya.”

Jisu bórokno hai hwnwi sa kha, “Bu phan bai ang omo tẃirokno khlai angbo ahai khe norokno sa ya.

MARK 12

Angur barini munirokni rwngthoma

(Mat 21.33-46; Luk 20.9-19)

1Aphuru Jisu bórokno rwngthoma bai hai hwnwi sa kha, “Borok khoroksa angur káimani. Bo a angur bari bera dúm bai kha, angur sepna bagwi holongdabo hakhor khur kha, phiya mwrwkna bagwi garing tang kha. Hakhe bo a barino munirokni yago klangwi beraina tháng kha.Jis 5.1-2. 2Angurni jora phuru bo bini banta na rw horna hwnwi seleng khoroksano a munirokni thani rohor kha. 3Yang le munirok a selengno romwi bu laiwi yak bukcha khe kiphilwi rohor kha. 4Nokphang hakhe tei khoroksa selengno rohor khua. A munirok bono bokhorogo bu laiwi lachimasingcha khlai kha. 5Nokphang hakhe tei khoroksa selengno rohor khua, bórok bono buthar kha; bórok teibo kwbángmanobo abo hai khlai kha, baksano bu kha, baksano ba buthar kha. 6Ulo rohorjaknai khoroksa se tong si-o, abo wng kha a borokni khájani bwsla. Hakhe bo bwslano a munirokni thani rohor kha. ‘Angslano le bórok sak nang ya wng glak,’ hwnwi bo sa kha. 7Yang le a munirok hai hwnwi sa lai kha, ‘Omo nokphangni bwsla se bla. Phai di, chwng bono buthar lai anw, hakhe buphani sompoti chini yago klai anw!’ 8Aboni bagwino bórok bono romwi buthar lai kha, hakhe angur barini bono kariui rohor lai kha.

9“Hakhe nokphang tamo khlaino?” hwnwi Jisu sẃng kha. “Bo phaiwi a munirokno buthar baiwi buini yago angur bari rw anw. 10Norok Elembakni o kókno suda pori ya kho diba?

“ ‘Nok tangnairok samung nang ya hwnwi khibiui rwmani holongthai abono wng phai kha nok busuni holongthai.

11Subrai khlai kha o samungno;

chwngbo uana kha nugwi abono.’ ”Lob 118.22-23.

12Judai hodarok Jisuno romna nai lai kha, tamni hwnwi khe o rwngthoma bai bo bórokno kók khitarwi sa-o hwnwi bórok saui man kha. Hai phano bórok lukurokno kirijakma bai bono yakarwi tháng kha.

Teksni kók sẃngmani

(Mat 22.15-22; Luk 20.20-26)

13Jisuno kók sẃngwi khẃi-o kwcha rwna bagwi baksa Pharisairok bai Herodni baksa bororok rohorjak kha. 14Bórok bini thani phaiwi hai hwnwi sa kha, “Hodakra, chwng saui mano nwng kók kubui sa-o. Bororok tamo hwn hwn ya abono nwng uansuk yaui tongo, tamni hwn khe keboni bumukhang naisik yaui nwng Kaitorni lamani kókno sói khe phrwngo. Hakhe chwngno sa di, Rumni habugra kotorno teks rwmani abo chini Kerong swbaima da klai? Chwng ba rwma da cha no?”

15Jisu bórokni phemlokmano saui manẃi hai hwnwi sa kha, “Norok tamo wngwi ano khẃi-o kwcha rwna nai lai? Rukphaini rang kaisa tubu-ui ano phunuk phai di.”

16Bórok abono tubu khe bo hai hwnwi sẃng kha, “Omo saboni bumukhang? O bumung saboni?”

“Habugra kotorni,” hwnwi bórok sa kha.

17Hakhe Jisu hai hwnwi sa kha, “Hakhe ba habugra kotorni manthaino bono rw di, Kaitorni manthaino Kaitorno rw di.”

Hakhe bórok bono uanama chajak kha.

“Kwthwirok thangwi da bachano? hwnwi sẃngmani

(Mat 22.23-33; Luk 20.27-40)

18Sadukai khoroknwi khoroktham Jisuni thani phai kha. (Bórok kwthwirok thangwi bacha ya hwnwi sa lainairok.) Bórok bono hai hwnwi sẃng kha,Sam 23.8. 19“Hodakra, Musi chini bagwi Kerongo hai hwnwi swiwi klang kha: ‘Khoroksa swk bwsa man ya sini bihikno klangwi thwiwi tháng khe bini bosongno narwkna bagwi a randijwkno a borokni buphayung nok phirogwi na thung.’Uái 25.2. 20Rom di, takhuksnirok tongmani. Okra káijagwi bwsa man yaui’-no thwi kha. 21Hakhe tei takhuksa a bwrwino naui bwsa man yaui’-no thwi kha. Tei takhuksani jorabo ahai’-no wng kha. 22Abo hai khe máng bórok takhuksni a bwrwino naui bwsa man yaui’-no thwiwi tháng bai kha. Ulo khe a bwrwibo thwi kha. 23Tabuk, kwthwirok thangwi bacha phuru a salo a bwrwi saboni bihik wngna klai? Bórok takhuksni’-no bono na lai kha.”

24Jisu bórokno hai hwnwi sa kha, “Norok bwswk se cha ya gwja! Tamni saui da man? Norok wng kha elembakni kókbo saui man ya, Kaitorni phanbo saui man ya. 25Kwthwini thangwi bachanairok bórok chuknohani suarirok hai, chwla bwrwi kebo káijak lai ya. 26Tabuk, kwthwirok thangwi bachanani kókno ang sa anw; norok Musini bijabo satasuta khamwi tongmani kókno pori ya kho diba? Aro Kaitor Musino hai hwnwi sa kha, ‘Ang Abrahamni Kaitor, Isakni Kaitor, Jakobni Kaitor.’Lam 3.6. 27O kók wng kha ahai, bo kwthangrokni Kaitor se, aboni bagwino borok thwiwi tháng phano kwthang tongo. Norok belai cha ya gwja!”

Kerongni kók kotor

(Mat 22.34-40; Luk 10.25-28)

28Kerong phrwngnai khoroksa aro tongmani, bo a sa laimano khna kha, Jisu a Sadukairokno kaham khe samano bo nuk kha, hakhe bo bono hai hwnwi sẃng phai kha, “Kerongni bu kók jotoni slái kotor kuk?”

29Jisu hai hwnwi sa kha, “Omo se jotoni slái kotor kuk, ‘O Israilrok, khna di! Subraino chini Kaitor, bo simi se Subrai. 30Hakhe nini Kaitor Subraino khá bai khúk bai yak bai uansukma bai hamjak súk di.’Uái 6.4-5. 31Tei tháisa kók kotor khe ahai, ‘Nwng sakno hamjak tẃi’-no buinobo hamjak di.’ O kók tháinwino karwi tei kók kotor kwrwi.”Leb 19.18.

32A Kerong phrwngnai Jisuno hai hwnwi sa kha, “Hodakra, abo kók kaham’-no! Subrai simi se Kaitor, phiya bono karwi tei Kaitor kwrwi hwnwi nwng samani abo sóino.Uái 4.35. 33Hakhe borok Kaitorno khá bai khúk bai yak bai hamjak sukna nangnai, phiya sakno hamjak tẃi’-no buinobo hamjakna nangnai. Pun tok ratharwi Kaitorni thani barokmani slái o kók tháinwino se khnathai klai-o.”Hos 6.6.

34A borokno kaham khe uansugui kók sama nugwi Jisu hai hwnwi sa kha, “Nwng Kaitorni ha bai chal tha li ya.”

Aboni ulo Jisuno tei khoroksa phano kók sẃng rak li ya.Luk 10.25-28.

Masiani kók

(Mat 22.41-46; Luk 20.41-44)

35Jisu noktharo phrwngwi tong phuru o kókno hai hwnwi sẃng kha. “Masia Daudni bwsa hwnwi Kerong phrwngnairok bahai kha se lai bai? 36Phola Kwtharni bising tẃi Daud sakphang’-no hai hwnwi sa lang kha,

“ ‘Subrai ani Subraino ahai hwnwi sa kha:

Achuk di oro ani yagra bwkhak,

khiklai ya sak ang nini kena arirokno nini yakung yaphango.’Lob 110.1.

37“Daud sakphang se bono ‘Subrai;’ hwnwi hwn khe Masia bahai khe Daudni bwsa wngwi mannai?”

Kerong phrwngnairok bai hus khe tong di

(Mat 23.1-36; Luk 20.45-47)

Luku kwbángma Jisuni kókno khápang srangwi khna kha. 38Bórokno phrwng phuru bo hai hwnwi sa kha, “Kerong phrwngnairok bai hus khe tong di. Bórok liling lala kanna nai-o; hati-haba-o khulumjakna nai-o; 39thumnokrogo buini slái bwskango achukna nai-o, panda-o achukthai kahamo achukna nai-o. 40Bórok randijwkrokni nok huk monok baiwi saka saka simi tángma-tángsa khe suri sanwi phunugo. Bórok teibo belai khe yagul sujaknai.”

Kaitorni mungwi randijwk khoroksa rang rwmani

(Luk 21.1-4)

41Jisu noktharni rang tonjaknai japani bwskango achuk tw tẃi bororok rang rwui tongmano naharwi tongmani. Aswk gwnangrok rang kwbángma rwui tongo. 42Aphuru bigra randijwk khoroksa phaiwi lepnwi rw phai kha, abo puisa lepnwi bai baksa. 43Hakhe Jisu sagrirokno kwrẃngsa khe ringwi hai hwnwi sa kha, “Ang norokno o kók sa-o, o bigra randijwk se bebakni slái rang tonjaknai japa-o rang rw kuk kha. 44Bui le kwbángmani se mukhi swk khái rw-o, o randijwk le kwrwi tw tẃi chána ajimano se bebak rw bai kha.”

MARK 13

Nokthar swbaijak anw hwnwi Jisu samani

(Mat 24.1-2; Luk 21.5-6)

1Jisu noktharni kutulna phuru bini sagri khoroksa hai hwnwi sa kha, “Hodakra, nahar di! Bwswk holong kotor kotor! Bwswk dolan naithok naithok!”

2Jisu hai hwnwi sa kha, “Nwng aswk dolan kotor kotor nugwi tongna bla? Oro holong saka holong dulsa phano tong glak, joto swbai khibijak anw.”

Mol pái ya sini tamo tamo wngnai

(Mat 24.3-14; Luk 21.7-19)

3Jisu nokthar bai dadak-didik Tháistwi hathái-o achugwi tongwi kha. Aphuru Pitor, Jakob, Johon tei Andria tepsa khe bini thani phaiwi hai hwnwi sa phai kha, 4“Chwngno sa di, omorok bu phuru wngnai? Hakhe omorok wngna phuru bubo tẃi tamo phunukjak granai?”

5Jisu bórokno hai hwnwi sa kha, “Hus khe tong di, kebo bai lama ta koró rwjak di. 6Baksa baksa ani mungwi ‘Ang’-no bo!’ hwnwi sa phai anw, hakhe baksa baksano lama koró rw anw. 7Gana-o chobani khorang khna phuru, phiya hakchalo choba nang lai kha hwnwi kók khna phuru ta uana di; abo hairok ma wngnai’-no, aphurubo mol pái ya kho. 8Dopha bai dopha choba wng lai anw, ha bai ha nang lai anw; kwrẃngsa kwrẃngsa-o bangla phai anw, asari nang anw. Omorok bwsa bána phuru bohok sa grama hai se.

9“Norok hus khe tong di. Norok khajagwi kuto tlangjak anw; norok thumnokrogo bujak anw; Kothoma kaham sana bagwi norok gobornorrok bai bugrarokni bwskango ani bagwi ma bacha anw. 10Bebak dophani thani Kothoma Kaham ma pírjak granai. 11Bórok norokno khaui kuto tlang phuru tamo sanai hwnwi swkang baira ta uana di; aphuru sa di hwnwi hwnjakma hai’-no norok sa di, tamni hwn khe norok samani kókno norok sa glak, abo Phola Kwthar se sanai.Mat 10.17-20; Luk 12.11-12. 12Takhuk takhukno butharna bagwi rom rwui rohor anw, buphabo haino bwsano rom rwui rohor anw; bwsarok buma buphano sak nang ya wngwi bórokno buthar rw anw. 13Ani bagwi bebak borok norokno naisler anw, tamo khe soiwi man suknai borok bo se mwthangjak anw.”Mat 10.22.

Gojob Khlainai Selengmasingcha

(Mat 24.15-28; Luk 21.20-24)

14“Gojob Khlainai Selengmasingchano norokbo tong maya-o nuk anw.” (Omo tamo hwnmani abo porinaisa saui man thung.) “Aphuru Judia-o tongnairok hathái bwkhak khárwi tháng thung;Dan 9.27; 11.31; 12.11. 15nuka-o13.15: nuka-o: Kók yaphango ‘núkhúng’. tongnai borok bo noksingo bini manwirok mungsa phano nauina hwnwi ta hap si thung. 16Kheto tongnai borok bo bini rí naiwina hwnwi nogo kiphilwi ta phai si thung.Luk 17.31. 17A salo sakderiya bai sagwnangmarokni bwswk se birman wng jano! 18Masing phuru omorok ta wng thung hwnwi Kaitorno suri san di. 19Tamni hwn khe yaphango Kaitor o swngcharno snam phuruni simi tabuk jora bororok tekto manẃi phaimani sai’ phano aphuruni tekto belai wng kuknai, omo hai tei w bo wng glak kha.Dan 12.1; Phu 7.14. 20Tamo khe Subrai a salrokno bara rw kha, wng ya khe khoroksa phano kwthang tong glak kha mun; hai phano bini chongjak bororokni bagwi bo a salrokno bara rw kha.

21“Aphuru norokno khoroksa swk ‘Iko, nahar di, oro se Masia!’ eba khe ‘Uko, aro se bo!’ hwnwi sa khe bini kók ta na di. 22Masia phatrarok bai diyari phatrarok bacha anw. Bórok soidom bai uanamasingcha samungrok phunuk anw, wng khe ba Kaitorni chongjak bororokno suda lama koró rw anw. 23Hakhe hus khe tong di. Swkang baira’-no ang norokno bebak’-no sa-o.”

Borokni Sajla phainani kók

(Mat 24.29-31; Luk 21.25-28)

24“A tekto rwjak bai khe sal mwnak anw, tal tei chẃng glak,Jis 13.10; Esk 32.7; Jol 2.10,31; 3.15; Phu 6.12. 25nokhani athukirirok klai anw, nokha gwnangwi jangrijak anw.Jis 34.14; Phu 6.13; Jol 2.10. 26Aphuru khe Borokni Sajla nukjak phai anw, bo chumui-o khe belai phankrak wngwi chẃngsacha khe phai anw.Dan 7.13; Phu 1.7. 27Bo suarirokno haktorni babai brwi-o rohor anw, hakhe bórok Kaitorni chongjak bororokno haktorni yaphang buchukni thum phai anw.”

Khwichang buphang bai phrwngmani

(Mat 24.32-35; Luk 21.29-33)

28“Norok khwichang buphangno naisigwi srwng di. Bini bedek khrangsaui bwlái rotomwi phai phuru tangbla sampha kha hwnwi norok saui mano. 29Omo hai kheno norok omorokno wngma nuk phuru mol sampha kha hwnwi khá ka di, sók phai se tong kha hwnwi khá ka di. 30O kókno muitu narwk di, o molni bororok bebak thwi bai ya sini’-no omorok bebak’-no wng anw. 31Ha bai nokha se kwma anw ba, ani kókrok kwma glak.”

A sal bu phuru phaino kebo saui man ya

(Mat 24.36-44)

32“A sal bai a jora bu phuru phaino kebo saui man ya; chuknohani suarirok buya, Sajla buya, Pha simi se abo saui mano.Mat 24.36. 33Hus khe tong di, sichaui tong di, a sal bu phuru wngno norok saui man ya. 34Omo ahai wngnai; borok khoroksa nokni kutulwi beraina tháng kha. Bo bini selengrokno janija samung khlai di hwnwi berwi klang kha: phiya duglam mwrwknaino sichaui tong di hwnwi dagiui klang kha.Luk 12.36-38. 35Hakhe norok sichaui tong di, tamni hwn khe nokphang bu phuru phaino norok saui man ya; sanja jora, eba hor diboro, eba aichugo, eba sal kasaui phano phaina tongo. 36Bo achomsa phai phuru norokno muktrwi thángjak nuk phai ya tẃi khe sichaui tong di. 37Hakhe ang norokno samani bebakno’-no sa-o, sichaui tong di.”

MARK 14

Jisuno butharna kók chap laimani

(Mat 26.1-5; Luk 22.1-2; Joh 11.45-53)

1Yókma ter bai Auang bángla ter nokha salnwi se tong si-o. Ochai okrarok tei Kerong phrwngnairok bising bising Jisuno romwi butharna lama naitugwi tong lai kha.Lam 12.1-27. 2“Chwng bono o terni bisingo romna kók kwrwi, wng ya khe bororok udru mudru phnangnai se,” hwnwi bórok sa lai kha.

Bethania-o Jisu thok motom phuljakmani

(Mat 26.6-13; Joh 12.1-8)

3Jisu Bethania-o biyadi chájak Simonni nogo tongmani; bo cháui tong phuru bwrwi khoroksa holong kuphurni sisi-o khe nard kahamni snamjak belai morok thok motom tubu-ui phai kha. Bo a sisi swbaiwi Jisuni bokhorogo thok motom luproui rw kha.Luk 7.37-38. 4Aroni baksa bororok jolijagwi hai hwnwi sa lai kha, “O thok motomno tamo wngwi ahai’-no khibi lang? 5Abono rang thamra khe phalwi kwrwirokno se rwui man kha mun bla!” Hakhe bórok bono rak kheno biskara sa lai kha.

6Hakhe Jisu hai hwnwi sa kha, “Ta sa lai si di! Norok tamo wngwi bono tekto rw? Ani bagwi bo samung kaham’-no tang kha. 7Kwrwirok ba norok bai máng tong bla, norokni muchung tẃi kheno bórokno chubaui man bla. Ang le norok bai máng tong glak.Uái 15.11. 8O bwrwima manma jora tẃi bo khlai kha. Ang phobjakna swkang’-no ani bwsakno tiyar khlaina bagwi bo ano thok motom lukhlai kha. 9Hakhe o kókno muitu narwk di, swngchar gwnangwi Kothoma Kaham pírjak thani’-no bono muitu khlaiwi bo o samung khlaimano sajaknai.”

Juda Jisuno rom rwna gosimani

(Mat 26.14-16; Luk 22.3-6)

10Aphuru Judas Iskariot hwnwi sagri chiknwirokni bere khoroksa kagwi Jisuno rom rwui rohorna bagwi ochai okrarokni aro tháng kha. 11Bo samano khnaui bórok snamwi’-no tongthokjak kha, hakhe bono rang rwna hwnwi kók rw kha. Aboni bagwino Juda Jisuno rom rwui rohornani lama máng rutugwi tong kha.

Jisu bini sagrirok bai Yókma Terni panda chá laimani

(Mat 26.17-25; Luk 22.7-14,21-23; Joh 13.21-30)

12Auang bángla terni puilani salo, Yókma terni pandani bagwi mera bwsa ratharma salo, Jisuni sagrirok bono hai hwnwi sẃng kha, “Yókma terni panda khlaina bagwi nwng chwngno buro tháng di hwn sla?”

13Hakhe Jisu bórokni bere khoroknwino hai hwnwi saui rohor kha, “Tháng di, tauno habwi di, hakhe twi gola tẃijak borok khoroksa norok bai malai anw. Bo bai thangwi 14bo hapmani nokni nokphangno hai hwnwi saui di, ‘Hodakra bini sagrirok bai bu khotolo Yókma Terni panda khlainai hwnwi nono sẃng rwhoro.’ 15Bo hakhe tiyar khe chithijak sakani khotol kotor kaisa norokno phunuk anw. Aro’-no chini bagwi bebak khlai sok di.”

16Sagrirok kak laiwi tauno thángwi Jisu saui rohorma hai’-no nugwi kha, hakhe bórok aro Yókma terni panda khlai kha.

17Sanja wng kheno Jisu sagri chiknwirok bai phai lai kha. 18Bórok chá lai tong lai phuru Jisu hai hwnwi sa kha, “Ang norokno o kók sa-o, norokni bere khoroksa ano rom rwnai-bo oro ang bai cháui tongo.”Lob 41.9.

19Sagrirok belai khá hamya wngwi khoroksa khoroksa khe bono “Abo ang ya na bla?” hwnwi sẃng lai kha.

20Jisu hai hwnwi sa kha, “A borok norok chiknwirokni bere’-no, mairango ang bai baksa ruti chomsanai abo’-no. 21Elembago sama hai’-no Borokni Sajla ma thwinai; tamo khe Borokni Sajlano rom rwnai a borok bwswk sw hamya sitra no! Achai ya khe se bo ham kuk kha mun.”

Subraini panda

(Mat 26.26-30; Luk 22.15-20; 1Ko 11.23-25)

22Bórok chá lai tong phuru Jisu ruti naui Kaitorno hambai rw kha, hakhe abono swkagwi bini sagrirokno rw kha. “Hi’n, na di, omo ani bahan,” hwnwi bo sa kha.

23Hakhe bo khuri naui Kaitorno hambai rwui abono bórokno yapharwi rw kha, hakhe bórok bebakno nung lai kha. 24Jisu hai hwnwi sa kha, “Omo wng kha aswk bororokni bagwi kochok rwmani ani thẃi, Kaitor ani o thẃi bai swmai tang kha. 25Ang norokno o kók sa-o, Kaitorni ha-o angur bwtwi kwtal nung ya sak ang tei o angur bwtwi nung glak.”Lam 24.8; Jir 31.31-34. 26Hakhe bórok rwchapmung tángsa rwchap laiwi Tháistwi hathái-o tháng lai kha.

Pitor gosi glak hwnwi Jisu samani

(Mat 26.31-35; Luk 22.31-34; Joh 13.36-38)

27Jisu bórokno hai hwnwi sa kha, “Norok bebak’-no ano khibi khár bai anw, tamni hwn khe elembago hai hwnwi sa-o, ‘Kaitor mera mwrwknaino butharnai, hakhe bebak merarok piring-poroi wng bainai.’Sak 13.7. 28Tamo khe ang mwthangwi tisajak baiwi norokni slái swkang Galili-o tháng anw.”Mat 28.16.

29Pitor hai hwnwi sa kha, “Bui bebak khibiui tháng phano ang le nono khibi tháng glak!”

30Jisu Pitorno hai hwnwi sa kha, “O kókno muitu narwk di, tini horo’-no tokla khuknwi kokchik ya sini nwng ano sini ya hwnwi uáitham sa anw.”

31Pitor teibo sotonwi hai hwnwi sa kha, “Nwng bai baksa butharjakna se gosi anw ba, nono sini ya hwnwi le ang sa se sa glak ta!”

Bebak sagrirokbo a kókno kók sa kha.

Getsimani-o Jisu suri sanmani

(Mat 26.36-46; Luk 22.39-46)

32Bórok Getsimani hwnwi kwrẃngsa-o phai lai kha, hakhe Jisu sagrirokno hai hwnwi sa kha, “Suri san bai ya sak norok oro achugwi tong lai di.”

33Hakhe bo Pitor, Jakob tei Johonno bini logi tlang kha. Aphuru bo khábo khákhamjak kha, ámang-chímangbo wng kha, 34hakhe bo bórokno hai hwnwi sa kha, “Ang belai khe khákham kha, abo thwi phano pok glak. Oro sichaui tong di.”

35Bo tei kisa bwskango thángwi ha-o klaiwi suri san kha, wng khe ba bo sátokjaknani mol manjak ya tẃi khe suri san kha. 36Bo hai hwnwi suri san kha, “O Apha, ani Apha, nwng jotono khlai mano. O khurino ani oroni nor di, omobo ani muchung tẃi ya, nini muchung tẃino wng thung.”

37Aphuru bo kiphilwi a sagri khorokthamno muktrwi thángjak nuk kha, hakhe Pitorno hai hwnwi sa kha, “Simon nwng muktrwi thángjak da? Nwng damsa phano sichaui tongwi man li ya diba?” 38Hakhe bo bórokno hai hwnwi sa kha, “Sichaui tong di, belokjak ya tẃi khe suri sanwi tong di. Bwkha le kwrakno, bwsak se kebel.”

39Bo tei uáisa thángwi a kókno kók saui suri san kha. 40Hakhe bo kiphilwi sagrirokno muktrwi thángjak nuk phai kha; bórok mokol phiyogwi tongwi man li ya. Hakhe bono tamo sanai bórok saui man li ya.

41Bo tei uáisa kiphilwi phaima jora bórokno hai hwnwi sa kha, “Norok tabuk phano muktrwi thángwi lenglaui tong kho, hai da? Belai se wng kha! Mol sók phai kha! Nai di, sumsok gwnangrokni yago Borokni Sajla tabuk yapharwi rohorjaknai. 42Bacha di, him di tho. Iko, nahar di, ano rom rwnaino!”

Jisuno rommani

(Mat 26.47-56; Luk 22.47-53; Joh 18.3-12)

43Jisu kók saui tong phuru Judas aro sók phai kha, sagri chiknwirokni bere bo’-bo khoroksa. Bini logi borok kwbángma seng bai tokphung tẃi laijak; bórok ochai okrarok, Kerong phrwngnairok tei okra chakrarok bai rohorjakmani. 44A rom rwnaisa a bororokno hai hwnwi phrwngwi tubu kha, “Ang motom sumani abono a borok. Bono romwi jai khe tlang di.”

45Judas sók phaima logi’-no Jisuni gana thángwi “Hodakra,” hwnwi saui bono motom su kha. 46Hakhe bórok Jisuno romwi kha lai kha. 47Aphuru aro bachaui tongnai khoroksa seng sotroui achai bokhorokni selengni khunju tankhlai rw kha. 48Hakhe Jisu bórokno hai hwnwi sacha kha, “Ang dagait da, sengrok tokphungrok bai khe norok ano romna phai ba? 49Ang sal brúm brúm noktharo phrwng tw tẃi ang norok bai máng se, aphuru norok ano rom ya. Hai kheno Elembakni kók ma nang phainai ba.”Luk 19.47; 21.37.

50Aphuru bebak sagrirok bono khibi khár bai kha.

51Rítrak simi chumjak khe sikla khoroksa Jisuno rwkthar kha. Bórok bono romna nai lai kha, 52hakhe bo rítrak khibi klangwi sak lánga khe khár lang kha.

Kaunsil bwskango Jisu

(Mat 26.57-68; Luk 22.54-55,63-71; Joh 18.13-14,19-24)

53Bórok Jisuno ochai bokhorokni nogo tlang lai kha, aro bebak ochai okrarok, okra chakrarok tei Kerong phrwngnairok kuthum laijak 54Pitor hakchalo tong tw tẃi bono rwkthar kha, hakhe ochai bokhorokni nokhla-o tháng kha. Bo aro sebukrok bai baksa achugwi hór tongwi kha. 55Ochai bokhorok bai bebak Kaunsil Jisuno butharna bagwi bini majra phunukna nai lai kha, tamo khe majra mungsa phano phunugui man li ya. 56Borok kwbángma kók tatal saui bono majra ber lai kha, aile bórok aswk samani dalo klai li ya.

57Aphuru borok khoroknwi khoroktham bachaui hai hwnwi tatal saui Jisuno majra ber lai kha, 58“Chwng bono hai hwnwi sama khna kha, ‘Borok tisamani o noktharno ang swbainai, phiya salthamni ulo ang tei khungsa tisanai, abo borok tisama ya.’ ”Joh 2.19. 59Hai phano bórok sama suda dalo klai li ya.

60Ochai bokhorok bebakni bwskango bachaui Jisuno hai hwnwi sẃng kha, “Nini tháisa phano kók sana kwrwi da? O bororok nini mungwi majra bermani abo tamo?”

61Hai phano Jisu siring siring khe tong kha, kók tháisa phano sa li ya. Ochai bokhorok tei uáisa hai hwnwi sẃng kha, “Nwng Masia da, lobjaknai Kaitorni Sajla?”

62Jisu hai hwnwi sa kha, “I’n, ang’-no bo. Hakhe norok Borokni Sajlano Kwplaisa Kaitorni yagra bwkhak achukjak nuk anw, phiya nokhani chumui-o khe phaima nuk anw.”Dan 7.13.

63Ochai bokhorok bini rí sichigwi hai hwnwi sa kha, “Chini tei sakki samung kwrwi kha! 64Bo Kaitorno hamya samano norok khna bai kha. Tamo hwn bai?

“Bo majra gwnang, hakhe butharjakna nangnai,” hwnwi bórok bebak’-no sa bai kha.Leb 24.16. 65Bórokni bere baksa bono khuktwi musu kha, phiya mokol khapungwi bu kha. “Nono sabo bu sa di.” hwnwi bórok sẃng kha. Hakhe sebukrok bono tlangwi thapra rw lai kha.

Pitor Jisuno gosi ya wngmani

(Mat 26.69-75; Luk 22.56-62; Joh 18.15-18,25-27)

66Pitor nokhla-o si kho, aphuru ochai bokhorokni selengjwk khoroksa abo tẃi phai kha. 67Bo Pitorno hór tongjak nugwi bono naisigwi hai hwnwi sa kha, “Nwng’-bo Nasaretni Jisuni logini borok’-no.”

68Hakhe bo o kókno gosi li ya. “Ang saui man ya...nwng tamni kók sa abo romwi man ya,” hwnwi saui bo lama-o ongkhorwi tháng kha; hai kheno tokla kokchigwi rw kha.

69A selengjwk bono nugwi aro bachaui tongnairokno hai’-no hai hai hwnwi sa khua, “Bórokni bere bo’-bo khoroksa.” 70Pitor abono tei uáisa gosi ya wng khua.

Tei kisa tongwi aro bachaui tongnairok Pitorno hai’-no hai hai hwnwi hwn lai kha, “Nwng sói’-no bórokni bere khoroksa, tamni hwn khe nwng’-bo Galilini borok.”

71Hakhe Pitor swmai tangwi hai hwnwi sa kha, “Ang kubui sa ya khe Kaitor ano swrai thung! Nwng samani a borokno ang sini ya!”

72Aphuru kheno tokla kokchikmani khuknwi wng kha, hakhe “Tokla khuknwi kokchik ya sini nwng ano sini ya hwnwi uáitham sa anw,” hwnwi Jisu bono samano Pitor muitu manjak kha. Hakhe bo khá nangwi kap kha.

MARK 15

Pilatni bwskango Jisu

(Mat 27.1-2,11-14; Luk 23.1-5; Joh 18.28-38)

1Phung ai kheno okra chakrarok, Kerong phrwngnairok tei bebak Kaunsil bai ochai okrarok kuthum laiwi kók chap lai kha. Bórok Jisuno khaui tlangwi Pilatni yago yapharwi kha. 2Pilat bono hai hwnwi sẃng kha, “Nwng Judairokni bugra da?”

Jisu hai hwnwi sa kha, “Nwng’-no o kók saui tong kha bla.”

3Ochai okrarok Jisuno kwbángmano majra ber lai kha, 4hakhe Pilat bono tei uáisa hai hwnwi sẃng kha, “Nini tháisa phano kók sana kwrwi da? Nai di, bórok bwswk khe nono majra berwi tong kha.”

5Jisu aphurubo kók tháisa phano sa li ya, hakhe Pilat uanama hapjak kha.

Jisuno butharna dagimani

(Mat 27.15-26; Luk 23.13-25; Joh 18.39—19.16)

6Yókma Ter brúm brúm Pilat luku sanmani borokno alongni phiyók phiyógwi rohoro. 7Aphuru Baraba hwnwi borok khoroksa bulai-toklai khe borok butharwi ur pati rwnairok bai baksa alongo chopjak tongo. 8Luku kuthum phaiwi Pilatno hai hwnwi sa kha, “Bisi brúm brúm phiyókma hai khoroksano phiyók di.”

9Bo bórokno hai hwnwi sẃng kha, “Judairokni bugrano da norok ano phiyók di hwn?” 10Músúmani bai se ochai okrarok Jisuno yapharwi rohoro Pilat abono kaham khe’-no saui mano.

11Yang ochai okrarok lukuno hai hwnwi toksaui rw kha, “Barabano se phiyók di hwnwi Pilatno sa di.”

12Pilat tei uáisa lukuno hai hwnwi sa kha, “Hakhe norok Judairokni bugra hwnmani a borokno ano tamo khlai di hwn?”

13Bórok hai hwnwi chirikhók lai kha, “Bono kruso kanta bu di!”

14“Tamo wngwi? Bo tamo samung hamya tang lang ba?” hwnwi Pilat sẃng kha.

Bórok teibo sotonwi hai hwnwi chirikhók lai kha, “Bono kruso kanta bu di!”

15Pilat lukuni bwkha narwkna nai-o, aboni bagwino bo Barabano phiyógwi rw kha. Hakhe bo Jisuno swprak rwui kruso kanta buna bagwi yapharwi rohor kha.

Sengkrakrok Jisuno yasek khusek khe thwng laimani

(Mat 27.27-31; Joh 19.2-3)

16Sengkrakrok Jisuno nokhla bisingo tlangwi tei bebak sengkrakrokno aro ring kha. (Abo gobornorni pelesni nokhla.) 17Bórok bono rí kochual kan rwui busuni motok rabwi bini bokhorogo thubui rw kha. 18Hakhe “Judairokni bugra jinabad!” hwnwi bórok bono khulum kha. 19Bórok bono raidang bai bokhorogo bu kha, khuktwi musu kha, yáskú sungwi bono khulum kha. 20Bórok Jisuno yasek khusek khe thwng lai pái khe a rí kochualno khengwi naui bini ríno bono kan rwui rw phi kha. Hakhe bórok bono kruso kanta buna hwnwi tlang lai kha.

Jisuno kruso kanta bumani

(Mat 27.32-44; Luk 23.26-43; Joh 19.17-27)

21Aphuru lama-o sengkrakrok Simon hwnwi borok khoroksano nuk kha, bo kami phaisingni tauno phaimani. Bórok bono Jisuni krusno juraboli khe bal rw kha. (Omo Kurinini Simon, Aleksandar bai Ruphni bupha.)Rum 16.13. 22Jisuno bórok Golgotha hwnwi kwrẃngsa-o tlang kha, abono “Bokhorok Chárá” hwno. 23Aro bórok bono mur hwnwi bithi dalokjak angur bwtwi khan rwna nai kha, Jisu abono nung li ya. 24Bórok bono kruso kanta bu kha, hakhe bini rí sabo bubono manthai klai abono pat karwi bórok kiching bórok banta khe na lai kha.Lob 22.18. 25Bono kruso kanta bu phuru phungni kaichuku. 26Bini majra hai hwnwi swijak kha, “Judairokni bugra.” 27Bórok dagait khoroknwinobo Jisu bai baksa kruso kanta bu kha, khoroksano bini yagra, tei khoroksano yaksi. 28“Bo samung hamya tangnairokni bisingo khopjaknai,” hwnwi elembago o kók sajakmani omo hai kheno nang phai kha.Jis 52.12.

29Abo tẃi himnairok bokhorok jangriui Jisuno hai hwnwi kul kha, “Aha, nokthar swbainaisa! Salthamni bisingo abono tisa phinaisa!Lob 22.7; 109.25; Mar 14.58; Joh 2.19. 30Tabuk krusni ongkhorwi phaiwi nwng sakno mwthang gra di!”

31Kerong phrwngnairok bai ochai okrarok omo tẃi kheno Jisuno mwnwi laiwi hai hwnwi sa lai kha, “Bo buino le mwthango, sakno khe mwthangwi man ya! 32Israilni bugra Masia tabuk krusni ongkhorwi phai thung, hakhe abono nugwi chwng bono poito khlainai!”

Jisu bai baksa kanta bujaknai a khoroknwibo bono kul kha.

Jisu thwimani

(Mat 27.45-56; Luk 23.44-49; Joh 19.28-30)

33Diboro ha gwnangwi mwnagwi tong kha, ahai máng dam kwtham tong kha. 34Sarikni kwtham phuru Jisu sotonwi hai hwnwi chirikhók kha, “Eloi, Eloi, lema sabakthani?” Abo khe “O ani Kaitor, ani Kaitor tamo wngwi nwng ano khibi lang?” hwnma se.Lob 22.1.

35Aro tongnai baksa bororok bo samano khnaui hai hwnwi sa lai kha, “Khna di, bo Eliano ringwi tong kha.” 36Bórokni bere khoroksa wsponj naui do lang kha, abono angur bwtwi siringjago chomsaui raidang buchugo thepa kha. Hakhe bo Jisuni bwkhwchwi-o abono phnangwi hai hwnwi sa kha, “Toro khu di, Elia phai bono krusni da ongkhor rw phai nai grana!”Lob 69.21.

37Sotonwi chirikhógwi Jisu hama lái kha.

38Aphuru noktharni rí swngjak yaphang buchuk khaknwi khe kichigwi tháng kha.Lam 26.31-33. 39Krus bwskango bachaui tongnai sengkrak okra bahai khe Jisu chirikhógwi hama lái kha abono nuk kha. “O borok kubui’-no Kaitorni Sajla,” hwnwi bo sa kha.

40Bwrwirok khoroknwi khoroktham hakchalo bachaui naharwi tong lai-o. Bórokni bisingo Magdalani Mariam, Jakob kusu bai Josini buma Mariam, phiya Salomi tongo. 41Jisu Galili-o tong phuruno bórok bini logi tongo, phiya bono nai-o nugo. Aro teibo kwbángma bwrwirok tongo, bórok Jerusalem jora bo bai baksa phaimani.Luk 8.2-3.

Jisuno Phobmani

(Mat 27.57-61; Luk 23.50-56; Joh 19.38-42)

42-43Sanja wng twtwi-o Arimathiani Josep sók phai kha. Bo Kaunsilni bórom khlaijaknai chalai, Kaitorni ha bu phuru phino abono bo naisingwi tongo. Aphuru Tiyar Sal (abo wng kha Sabat swkangni sal); aboni bagwino Josep bwkha torwi Pilatni bwskango thángwi Jisuni mangno sanwi kha. 44Jisu thwi kha hwnwi khnaui Pilat uanajak kha. Bo sengkrak okrano ringwi “Jisu thwimani bá da balok kha?” hwnwi sẃng kha. 45Sengkrak okra samano khnaui Pilat Josepno “Bini mangno tlangwi mano,” hwnwi sa kha. 46Josep jorini rí kangsa paiwi Jisuni mangno tikhlaiwi a rí bai khe dul kha, hakhe abono holongdabo khurmani mangkhoro tonwi kha. Aboni ulo bo holongdap kotorma girok rwui duglam muthubwi rw kha. 47Magdalani Mariam bai Josini buma nai lai tongo, hakhe Jisuno buro ton kha abo bórok nuk kha

MARK 16

Jisu thangwi bachamani

(Mat 28.1-8; Luk 24.1-12; Joh 20.1-10)

1Sabat sal pái kheno Magdalani Mariam, Jakobni buma Mariam tei Salomi Jisuni mango phulna hwnwi langi-thok motom pai lai kha. 2Kaitho Salni phungo katswi aisirisiri sal ka twtwi-o bórok mangkhoro tháng lai kha. 3-4Lama-o bórok bobo bono hai hwnwi sa lai tháng lai-o, “Duglamni a holongdapno chwngno sabo norwi rwnai?” (Abo holongdap kotorma se.) Aphuru bórok naharwi nai ba holongdap norjak. 5Hakhe bórok mangkhoro habwi kha, aro rí kuphur kanjak sikla khoroksano yagra bwkhak achugwi tongma nugwi kha; hakhe bórok uanama hapjak kha.

6Bo bórokno hai hwnwi sa kha, “Ta uana di, norok kruso kanta bujaknai Nasaretni Jisuno naitugo. Bo aro kwrwi kha-bo mwthangwi tisajak kha. Nai di, orono bórok bono tonmani 7Tabuk tháng si di, bini sagrirokno hai hwnwi saui di, Pitornobo saui di, ‘Norokni slái swkang bo Galili-o thángnai, bo sama hai’-no norok bono aro nugwi anw.’ ”Mat 26.32; Mar 14.28.

8Hakhe bórok kirima hapjagwi mangkhorni khárwi phai kha. Kirima hapma bai bórok kebono kók tháisa phano sa li ya.

KÓK PÁITHAK (O kók Mark swimani Kothoma Kahamni ulo swijago)

Magdalani Mariam bai Jisu nukjakmani

(Mat 28.9-10; Joh 20.11-18)

[9Kaitho Salni aisirisiri Jisu thangwi bachaui puila Magdalani Mariamno nukjak phai kha; bini bisingni’-no Jisu mwtai hamya maksni rwkhlai kha. 10Mariam thángwi bini logisongrokno saui kha. Aphuru bórok muisubuk chaui kabwi tong laimani; 11hakhe Jisu thangcha phi kha, phiya Mariam bono nuk kha hwnwi sama khna khe bórok bono poito khlai li ya.

Sagri khoroknwi bai Jisu nukjakmani

(Luk 24.13-35)

12Aboni ulo bórokni bere khoroknwino Jisu tei potsa khe nukjak phai kha, a khoroknwi aphuru kami bwkhak him laijak. 13Bórok kiphilwi omono teirokno saui kha, tamo khe bórok omono poito khlai li ya.

Sagri chisarok bai Jisu nukjakmani

(Mat 28.16-20; Luk 24.36-49; Joh 20.19-23; Sam 1.6-8)

14Jotoni ulo Jisu sagri chisarokno bórok chá lai tong phuru nukjak phai kha. Bórokni poito kwrwini bagwi, phiya bo thangwi bachamano nuknairokni kókno poito khlaina nai yani bagwi bo bórokno khorai kha. 15Bo bórokno hai hwnwi sa kha, “Tháng di, swngchar gwnangwi bebak borokni thani Kothoma Kaham pírwi di.Sam 1.8. 16Poito khlaiwi baptisma wngnai borok bo’ se mwthangjaknai; poito khlai ya borok bo majra berjaknai. 17Poito khlainairok bai omo tẃi soidomni samung phunukjak anw: Ani mungwi bórok mwtai hamya rwkhlainai, hámung sini ya kók sanai, 18chibukno rom phano eba mungsa swk bis nung phano hamya wng glak: Bórok hamyarokni saka yak bera khe a hamyarok hamnai.”

Jisu chuknoha-o tisaui tlangjakmani

(Luk 24.50-53; Sam 1.9-11)

19Bórok bai kók sa bai kheno Subrai Jisu chuknoha-o tisaui tlangjak kha, hakhe Kaitorni yagra bwkhak achugwi kha.Sam 1.9-11. 20Sagrirok thángwi ha gwnangwi pírwi kha, phiya Subrai bórok bai baksa samung khlaiwi bórok pírmano soidomni samung bai kubui khe phunuk kha.]

TEI KAISA KÓK PÁITHAK (O kókbo Mark swimani Kothoma Kahamni ulo swijago)

[9A bwrwirok Pitor bai bini logisongrokni thani thángwi bórok sajakmani bebak kókno kisicha khe saui kha. 10Aboni ulo borok mwthangjak phlainani o tong phlainai kók kwtharno Jisu sak baithang bini sagrirokno khúk tẃi salkabai bai salthángbai bwkhak rohor kha.]

Posted by : James Deo June 05, 2022

Translate

kokborok bible

MATHAI 1

MATHAI 2

MATHAI 3

MATHAI 3

MATHAI 5

MATHAI 6

MATHAI 7

MATHAI 8

MATHAI 9

MATHAI 10

MATHAI 11

MATHAI 12

MATHAI 13

MATHAI 14

MATHAI 15

MATHAI 16

MATHAI 17

MATHAI 18

MATHAI 19

MATHAI 20

MATHAI 21

MATHAI 22

MATHAI 23

MATHAI 24

MATHAI 25

MATHAI 26

MATHAI 27

MATHAI 28

MARK 4

MARK 5

MARK 11

MARK 12

MARK 13

MARK 14

MARK 15

MARK 16

Subscribe by Email

No Comments

About

Search This Blog

Music

Nature

Trending Weekly

Most Recent

Menu Footer Widget

Social Plugin

Top Stories

What's New

Follow Us

About Me

Contact form

Footer Copyright

Tags

Sports

Technology

Breaking Ticker

Featured Section

Comments